ဗဒိုပ်ဗၠာဲသၟိၚ် ပွိုၚ်ဍုၚ်လံၚ်လုၚ်ကဵု ပွိုၚ်ဍုၚ်ဍာ်ဗု (၂) ဗဒိုပ် ဒးဒုၚ်ဗတိုက်လဝ်

လံၚ်လုၚ်၊ ဂျောန်(၂၉)

ရးဒေသဇၞော်တၞၚ်သြဳ ဗဒိုပ်ဗၠာဲသၟိၚ် ပ္ဍဲပွိုၚ်ဍုၚ်လံၚ်လုၚ်ကဵု ပွိုၚ်ဍုၚ်ဍာ်ဗု (၂)ဗဒိုပ်ဂှ် ဒးဒုၚ်ဂြာတ်ထောံဖျေံ လဝ် ဗုမ်ကဵုဒရုမ်ရဂှ် ဒပ်စဵုဒၞာညးဍုၚ်ကွာန် ပွိုၚ်ဍုၚ်လံၚ်လုၚ် (LLPDF) ဟီုကဵု ဌာန်ပရိုၚ်သြၚ်လောန် တိုၚ်(မ်)ရ။

ဒပ်ပံၚ်ကောံ ဒပ်စဵုဒၞာဒေသတအ်ဂှ် ပ္ဍဲဂိတုဂျောန် စၟတ်တ္ၚဲ (၂၇) တ္ၚဲတုဲကၠုၚ်တေံ ၜိုတ် ၁၁ နာဍဳဂှ် ဗဒိုပ်ဗၠာဲသၟိၚ်ပွိုၚ်ဍုၚ်လံၚ်လုၚ်ဂှ်မွဲဝါ၊ အခိၚ်ဇိုၚ်သဝ်တ္ၚဲ ၜိုတ် (၅)နာဍဳဂှ် ဗဒိုပ်ဗၠာဲသၟိၚ်ၝောံဍုၚ်ဍာ်ဗု မၞုံပွိုၚ်ဍုၚ်ဍာ်ဗုဂှ်မွဲဝါ အပံၚ်လၟိဟ် (၂) ဝါ ဗတိုက်လဝ် နကဵုဒရုမ်ရ။

ပ္ဍဲပရေၚ်ဗတိုက်လဝ် ဗဒိုပ်ဗၠာဲသၟိၚ်မောၚ်မကာန် ကဵုဒရုမ်ဂှ် ဟိုတ်နူမဗုမ် ဒတုံစှ်ေခတိုဟ်လဝ် အကြာဗ္ဒမ်အချုက်ကဵု ဗ္ဒမ်ရုၚ်တုဲ ပါ်ခတိုဟ်လဝ်ကီု ပ္ဍဲပရေၚ်ဗတိုက်လဝ် ဗဒိုပ်ဗၠာဲသၟိၚ်ဍာ်ဗုဂှ်လေဝ် ဗုမ်ဒတုံစှ်ေလဝ် ဗ္ဒာဲလိုၚ်ဗ္ဒမ်ဗၠာဲသၟိၚ်တုဲ ပါ်ခတိုဟ်လဝ်ရ။

ပ္ဍဲကဵုပရေၚ်ဗတိုက်ဏံဂှ် ကောန်ဒပ်ဗၠာဲသၟိၚ်ကံၚ်ဇြဳပၞာန် ဇီုကပိုက်ဒးချိုတ်လဝ်နွံတုဲ ဆက်လ္ၚတ်ဂၠိုက် ဂၠာဲဒၟံၚ် အကာဲအရာ ပ္ဍဲဗလးမုက်တိ သောဲသောဲဗြောဲဗြောဲရဂှ် ညးတာလျိုၚ်လလောၚ်ပရိုၚ် ဒပ်စဵုဒၞာညး ဍုၚ်ကွာန် ပွိုၚ်ဍုၚ်လံၚ်လုၚ် (LLPDF) ဟီုသ္ဂးလဝ်ရ။

ကြဴနူဒးဒုၚ်ဗတိုက်လဝ်ကဵုဒရုမ်တုဲ နူလ္ပာ်ကံၚ်ဇြဳပၞာန် ၜိုန်ရပန်ဖျေံလဝ် လွဟ်ဇၞ်ောဍောတ်ကြာန်န် ကီုလေဝ် ပရေၚ်ဇီုကပိုက်ဒး မမိက်ကဵုမွဲမွဲဟၟဲတုဲ ကလေၚ်ဆုတ်တိတ်မာန်လဝ်ရဂှ် ဟီုသ္ဂးလဝ်ရ။

ကြဴနူဗဒိုပ်ဗၠာဲသၟိၚ် ဒးဒုၚ်ဗတိုက်လဝ်တုဲ အခိၚ်ဇိုၚ် သဝ်တ္ၚဲ (၆) နာဍဳဂှ်မ္ဂး က္ၜၚ်ပၞာန်မွဲဖ္ဍိုက် ကၠုၚ်ဖျေံ လဝ်ဂြၚ်တၟံ ပ္ဍဲဒၞာဲခြာနူပြၚ်က္ၜဳမောၚ်မကာန် ၜိုတ်မွဲမိုၚ်တုဲ ဒေါံဒၟံၚ်ဂှ်ရ ညးဍုၚ်ကွာန် နူကွာန်မပ္တံကဵုတေန် ဗဝ်ဇြုက်၊ ပါန်တေတ်အေန်၊ ကျောက်သေန်၊ မောၚ်မကာန်လ္ၚဵုတအ် ပါဲဓလေတ် နွံဒၟံၚ်ရဂှ်ဂွံတီ ကေတ်ရ။

ပ္ဍဲဂိတုဂျောန် စၟတ်တ္ၚဲ (၂၃) တုဲကၠုၚ်တေံဂှ်လေဝ် ကွဳစက်သ္ကိုပ်ဗဒိုပ်ဗၠာဲသၟိၚ်မောၚ်မကာန် ဍိုုက်ပါဗက် ကၠုၚ်ဂှ် ဒးဒုၚ်ပန်လဝ် အကြာကွာန်မောၚ်မကာန်ကဵု ဗဒိုပ်ဗၠာဲသၟိၚ်တုဲ သ္ကိုပ်ဗဒိုပ်ကီု သီုအကြာပ် ဒပ်ဗၠာဲသၟိၚ်ၜါတၠ ဒးချိုတ်လဝ်ဏီရ။

ပရိုၚ်-သြၚ်လောန်တိုၚ်(မ်)

ဗီုရုပ် – LLPDF