အပ္ဍဲပေါဲဗ္တိုက်ပွိုၚ်ဍုၚ်ရေဝ် ပွိုၚ် ၃ တ္ၚဲဂှ် ကောန်ဒပ်ကံၚ်ဇြဳပၞာန် (၁၆) တၠ ချိုတ်အာ

ရေဝ်၊ ဂျောန် (၂၉)

တွဵုရးဍုၚ်မန် ပွိုၚ်ဍုၚ်ရေဝ် တုဲကၠုၚ် ပ္ဍဲဂိတုဂျောန် ၂၆ စဵုကဵု ၂၈ ပေါဲဗ္တိုက်ၜါလ္ပာ် မက္တဵုဒှ်လဝ် အပ္ဍဲပွိုၚ် ၃ တ္ၚဲဂှ် လ္ပာ်ကံၚ်ဇြဳပၞာန်ဂှ် ကဆံၚ်သၞာဲဒဴ ၂ တၠ၊ ကဆံၚ်ဌာနန္တရတၞဟ်ဟ် ၁၆ တၠ ချိုတ်အာလဝ်ရောၚ် ရုၚ်ဒုသ္ကိုပ်ဒေသပၞာန်ပါ် ၊ ဒေသပၞာန်ပါ် စၟတ်−၃၊ ရးသ္ကုတ်သၠုၚ်ကျာတံ လလောၚ်ပ္တိတ်လဝ်ရ။

ကရောၚ်ပၞာန်ကံၚ်ဇြဳပၞာန် ဇြဟတ်ဒပ် ပါလုပ်ၜိုတ် ၁၀၀ ဂှ်ဝွံ ဟိုတ်နူထ္ပက်ကၠုၚ်ကရောၚ်ပၞာန် ပ္ဍဲကွာန်အံၚ်သာယာ ပွိုၚ်ဍုၚ်ရေဝ်ဂှ်ရ စနူဂိတုဂျောန် ၂၆ တုဲကၠုၚ်ဏံတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA, PDF တံဂှ် ပေါဲဗ္တိုက်တံ က္တဵုဒှ်လဝ်ရ။

ပ္ဍဲကဵုတ္ၚဲဂှ် အကြာကွာန်အံၚ်သာယာ ကဵု ကွာန်ကၞေၚ်တၟံ ပွိုၚ်ဍုၚ်ရေဝ် ဗ္ဒါဲကွာန်(ပရယ်သာ) ဂှ် ပေါဲဗ္တိုက်က္တဵုဒှ်လဝ် ၜါဝါတုဲ လ္ပာ်ဒပ်ကံၚ်ဇြဳပၞာန် ၆ တၠ ချိုတ်တုဲ ၂ တၠ ကလိဂွံလဝ်ဝပ်သ္ကာတ်မြဟ်ရောၚ် ထ္မံက်ထ္ၜးလဝ် ပ္ဍဲတၚ်လောၚ်ဂှ်ရ။

ပ္ဍဲဂိတုဂျောန် ၂၇ အခိၚ်နူဂယးဂှ်လေဝ် ဗ္ဒါဲကွာန်(ပရယ်သာ) ဂှ် ပေါဲဗ္တိုက်တံ ထပ်က္တဵုဒှ်လဝ်တုဲ လ္ပာ်ကံၚ်ဇြဳပၞာန် ကဆံၚ်သၞာဲဒဴမွဲတၠချိုတ်တုဲ ကဆံၚ်တၞဟ်ဟ်မွဲတၠ ကလိဂွံလဝ်ဝပ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။

မွဲအဆက်ဓဝ် ပ္ဍဲကဵုတ္ၚဲဂှ် အခိၚ်လဒေါဝ်တ္ၚဲ ၁၂ နာဍဳဂှ်လေဝ် အကြာကွာန်စဳပျး ကဵု ကွာန်ဇီုသာဲ ပွိုၚ်ဍုၚ်ရေဝ်ဂှ် က္တဵုဒှ်လဝ်ပေါဲဗ္တိုက် ကုဒပ်ကံၚ်ဇြဳပၞာန် ခမရ−၆၁ တုဲ ဒဒှ်ရသ္ကိုပ်ဒပ်ဝေန်ဥူ သီုကဵုကောန်ဒပ် ၇ တၠ ချိုတ်အာလဝ်ဂှ် ဂွံတီကေတ် နူကဵုပရိုၚ်ဗလးတိဏံကီုလေဝ် ဂွံသ္ပဒတန်မာန်ဂှ် ဂၠိုက်ဂၠါဲဒၟံၚ်ဖိုဟ်ရောၚ် သ္ဂးရ။

တ္ၚဲဏံ ပ္ဍဲဂိတုဂျောန် ၂၈ အခိၚ်နူဂယးဂှ်လေဝ် ဂကောံဒပ်ပံၚ်ကောံတံ ပန်ပှော်ဗ္တိုက်စုတ် ကွဳစက်ကံၚ်ဇြဳပၞာန် မဒဳကၠုၚ် ဗ္ဒါဲကွာန်ကၠအ်ဇၞော် မွဲဖ္ဍိုက်ဂှ်တုဲ စရၚ်ကလိဂွံဝပ်ဘဲဒဏ်တံဂှ် သ္ပဒတန်ဒၟံၚ်ဖိုဟ်ရောၚ် လလောၚ်ပ္တိတ်လဝ်ရ။

ဟိုတ်နူကၠောန်သ္ပဒၟံၚ် ပရေၚ်ထိၚ်ဒဝ် ဂၠံၚ်ဇၞော်ဗျဳထံၚ်သု စၟတ်(၈) မတ်မလီု−ရေဝ်−ထဝါဲတံဂှ်တုဲ နကဵုညးဍုၚ်ကွာန်အာတရဴတံလေဝ် သွက်ဂွံဒ္ဂေတ်ဗက်ကဵု အတိုၚ်အမိၚ်လလောၚ်ပ္တိတ်လဝ်တံ ချိုတ်တ်ပၠိုတ်တ်ဂှ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−J.O.C