ဟိုတ်နူၚုဟ်ဒဝ်ဠာကဵု ၚုဟ်ထဝ်တုဲ ၚုဟ်သြန်ၝာတ်သေံလေဝ် ဗက်တိုန်ကၠုၚ်ကီု

မတ်မလီု၊ ဂျောန် (၂၉)

ကြဴနူၚုဟ်ဒဝ်ဠာကဵု ၚုဟ်ထဝ်အပ္ဍဲဍုၚ် သၠုၚ်တိုန်ကၠုၚ်တုဲဂှ် ၚုဟ်သြန်ၝာတ်သေံလေဝ် မွဲၝာတ်ဂှ် ၚုဟ်သၠုၚ်တိုန်ကၠုၚ် စဵုကဵု ပွဳပွူ ၉၀ ဒ္ကေဝ်ရောၚ် သၟာဗၞိက်ပယျဵုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုဂျောန် ၂၁ တေံ နူကဵုတိုက်သြန်ကူသာန်သွံရာန်ဗၞိက်ဍုၚ်သ္အာၚ်ဍုၚ်ဗၟာ MFTB ကံၚ်ဇြဳပၞာန် မထိၚ်ဒက်လဝ်ဂှ်ကဵု တိုက်သြန်ဓလိုက်တမ်ရိုဟ် ကေုာံ ပရေၚ်ကူသာန်သွံရာန်ဗၟာ MICB တံဂှ် ပ္ဍဲဂိတုဂျောန် ၂၁ တေံ အလဵုအသဳအမေရိကာန် တပ်ဒဏ်ကၟာတ်လဒဵုကေတ်လဝ်ဒုဟ်တုဲ ၚုဟ်ဒဝ်ဠာကဵု ၚုဟ်ထဝ်တံ ထ္ပက်တိုန်ကၠုၚ်လဝ်ရ။

ၚုဟ်ဒဝ်ဠာအပ္ဍဲဍုၚ်ဝွံ မွဲဒဝ်ဠာဂှ် ၚုဟ်သၠုၚ်တိုန်ကၠုၚ်ဒၟံၚ် စဵုကဵု ပွဳပွူ ၃၂၀၀ ဒ္ကေဝ်တုဲ ထဝ်ဒကောၚ် မဳဠေန်ဂှ်လေဝ် မွဲဒ္ကေဝ်ဂှ် ၚုဟ်ဗက်သၠုၚ်တိုန်ကၠုၚ် စဵုကဵု ၃၂ ကိုဋ်ဒ္ကေဝ်ရ။

ဟိုတ်နူပရေၚ်ပရူဏံတုဲ ၚုဟ်သြန်ၝာတ်သေံ မွဲၝာတ် နွံကၠုၚ်လဝ် ၈၃ ဒ္ကေဝ်ဓဝ်ဂှ် ၚုဟ်သၠုၚ် တိုန်ကၠုၚ် လဝ် စဵုကဵုဗ္ဒါဲ ၉၀ ဒ္ကေဝ်တုဲ အရာဟွံညိၚ်ဝတ်တံလေဝ် က္တဵုဒှ်ဒၟံၚ် အဆက်က်ရ။

“ၚုဟ်ဒဝ်ဠာတိုန်၊ ၚုဟ်ထဝ်တိုန်တှ်ေ ၚုဟ်လှုဲဂှ် ဍေံတိုန်တွဵုရဏောၚ်။ သြန်ဗၟာပိုယ်တံဂှ်လေဝ် အတိုၚ်တီလဝ်ဂှ်ရ။ အဓိကဂှ်တှ်ေ ၚုဟ်ဒဝ်ဠာတိုန်ဂှ်ကီု၊ ၚုဟ်ထဝ်တိုန်ဂှ်ကီု တုဲတှ်ေ ၚုဟ်လှုဲၝာတ်ဂှ် ဗက်တိုန်ကၠုၚ် အတေၚ်ရ။ ပိုယ်တံဂှ် သ္ၚဳဂၠိပ်သာ်ဏံရဏောၚ်။ မူဟိုတ်ရောတှ်ေ သ္ဇက်ဂွံစဂှ် ပိဂကူဏံ ရနွံ။ သှ်ေၜါဂကူဂှ် တိုန်တှ်ေ မဏံလေဝ် တိုန်ကီုဏောၚ်။ ၚုဟ်ဗၞိက်ဖျာဂှ်တှ်ေ တိုန်အာဂၠိုၚ်ကဵုဆဂှ် ဟွံတီကၠးပုဟ်။ တိုန်အာညိညိရဏောၚ်။ တိုန်လေဝ် ဂၠိုၚ်ၚ်ဟွံသေၚ်ပုဟ်။ ၚုဟ်ဗၞိက်ဖျာဂှ် တိုန်အာစှ်ေ အာရဏောၚ်။ တ္ၚဲဏံ ပဵုအာမွဲကၠံမ္ဂး တ္ၚဲယး ဟိုတ်နူကပေါတ်လုပ်ဒၟံၚ်ဂှ်ရ မၞိဟ်မိက်ဂွံသွံဂှ် ဖအောန်တုဲသွံ၊ ကလေၚ်ဒှ်ၚုဟ်သၞောတ်တြေံပၠန်ရလေဝ်” သာ်ဝွံ သ္ဂးရ။

ဟိုတ်နူၚုဟ်သြန်ၝာတ်သေံတုဲ ၚုဟ်ဗၞိက်ဖျာတံ သၠုၚ်တိုန်ကၠုၚ်မာန်ကီုလေဝ် ဟိုတ်နူပရေၚ်ဆက် စၠောံဂၠံၚ်ဍာန် ပြေပြံၚ်ဒၟံၚ်ဏီဂှ်ရ ၚုဟ်ဗၞိက်ဖျာတံ ဂွံသၠုၚ်တိုန်ကၠုၚ် တီတီဒှ်ဒှ် ဟွံမွဲဏီပုဟ်ဂှ် သၟာဗၞိက်ပယျဵုတံ သ္ၚဳဂၠိပ်လဝ်ရ။

ၚုဟ်သြန်ၝာတ်သေံဝွံ ကၠာဒပ်ပၞာန်ဂွိုအ်သီအဝဵုတေံ မွဲၝာတ်ဂှ် (၃၀) ဒ္ကေဝ်ဓဝ် နွံကၠုၚ်တုဲ ကြဴနူဒပ်ပၞာန် သီအဝဵုတုဲ ၚုဟ်သၠုၚ်တိုန်ကၠုၚ် ၂ ဆပြၚ်တုဲ အရာဟွံညိၚ်ဝတ်တံလေဝ် က္တဵုဒှ်ဒၟံၚ် မွဲဏှမွဲဏှရ။

တွဵုရးဍုၚ်မန်ဝွံ နူကဵုပယျဵုဗြဝတဳမွဲကဆံၚ် ကပေါတ်ဗၞိက် ပ္တိတ်နူသေံဂမၠိုၚ် မပ္တံကဵုဗၞိက်စၞစသ္ဇိုၚ်၊ ဂဥုဲဇဗ၊ ဗၞိက်ပယျေဝ်၊ ဗၞိက်အရပ်စပ်မၞိဟ်၊ ကပေါတ်ဗၞိက်အရပ်စပ်ပရေၚ်သိုၚ်ခၞံတံ သီုကဵုကပေါတ်ဗၞိက် အရပ်စပ်နာနာတံဂှ် ပၠောပ်ပ္တိုန်ဒၟံၚ်အဓိကရ။

ပရိုၚ်−သြၚ်လောန်တိုၚ်(မ်)

ဗီု−Social Media