ပ္ဍဲကဵုကျံက်တကာ(ကျောက်တံခါး) ဟိုတ်နူလွဟ်ဇၞော်တုဲ ကောန်အရာပ် ၅ တၠချိုတ်တုဲ ၄ တၠ ကလိဂွံဝပ်

ကျံက်တကာ၊ ဂျောန် (၂၉)

ပ္ဍဲပွိုၚ်ဍုၚ်ကျံက်တကာ ရးဗဂေါဂှ် အပ္ဍဲအကြာတ္ၚဲတံဏံ ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳ ပၞာန်တံတုဲ ပါလုပ်သီုကောန်ၚာ်၊ ညးဗြဴတံဂှ် ကောန်အရာပ် ၅ တၠ ချိုတ်အာလဝ်တုဲ ၄ တၠ ကလိဂွံလဝ် ဝပ်ရောၚ် ဂွံတီကေတ် အတိုၚ်ဂလာန် ညးဒေသတံရ။

ပ္ဍဲဂိတုဂျောန် (၂၇) အခိၚ်ဗ္တံ ၁၀ နာဍဳဂှ် ဒပ်ကံၚ်ဇြဳပၞာန် မဖျေံလဝ်သ္ဇိုၚ် လ္တူဍုၚ်ကျံက်တကာ၊ ခရိုၚ်ညံၚ် လေဝ်ပေန်ဂှ် ဟိုတ်နူပန်ပှော်လဝ် လွဟ်ဇၞော်ကြာန်န်ဂှ်ရ လွဟ်ဇၞော်ဒတုံဗ္တိုဟ်ထ္ကးအာလဝ် ပ္ဍဲကွာန် ဗောဓိကွေန် ကေုာံ ကွာန်သေအ်အိုဝ်လှ ဂကောံကွာန်ဗော်ဓိကွေန်တံဂှ်ရ။

အတိုၚ်ဂလာန် ညးဒေသပရိုၚ်တမ်ရိုဟ်တံဂှ်မ္ဂး တမ်ဒပ် ဒပ်အမၠံက် (၃၀၇) ကံၚ်ဇြဳပၞာန် လ္တူဍုၚ်ကျံက် တကာဂှ် နကဵုတၚ်ရန်တၟံနွံနွံ ပန်ပှော်စုတ်လဝ် လွဟ်ဇၞော် ၁၂၀ မမ ၁၄ မတုဲ မၞိဟ်တြုံဒေသ နူကဵုကွာန် သေအ်အဵုလှ ကဵု ကွာန်ဗောဓိကွေန်တံ (၂) တၠ ဒးမကမ်ကလိဂွံလဝ်ဝပ်တုဲ ကောန်ကွာန်တေန်ဂါန်ချံၚ် (၄) တၠ ကလိဂွံလဝ်ဝပ်သ္ကာတ်မြဟ်ရောၚ် ဂွံတီကေတ်ရ။

ဟိုတ်နူဒပ်ကံၚ်ဇြဳပၞာန် ပန်ပှော်စုတ်လဝ် နကဵုလွဟ်ဇၞော် မသက္ကုဟိုတ်သာ်ဏံဂှ်တုဲ ညးဍုၚ်ကွာန်ဒေသ နူကဵုကွာန် (၁၃) ကွာန်တံဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ်ဂှ်လေဝ် ပရိုၚ်တမ်ရိုဟ် အပ္ဍဲဒေသသတံ သ္ဂးလဝ်ရ။

သ္အာၚ်နူဂှ်ပၠန် တုဲကၠုၚ် ပ္ဍဲဂိတုဂျောန် ၂၅ ဂှ်လေဝ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ နူကဵုကွာန်တမေန်ကုန်၊ ပွိုၚ်ဍုၚ်ကျံက်တကာဂှ် ညးဗြဴ ၂ တၠ ကေုာံ ကောန်ၚာ်သၟတ် အာယုက်မၞုံ (၄) တၠ နူကဵုကွာန်ၚဖေတ်အေန်ဂှ် (၁) တၠ ချိုတ်အာလဝ်တုဲ သ္ၚိဒၟံၚ်တံလေဝ် လီုလာ်ဇီုကပိုက်အာတံ နွံလဝ်ရောၚ် ဂွံတီကေတ် အတိုၚ်တၚ်လလောၚ်တြး ပွိုၚ်ဍုၚ်ကျံက်တကာ (ပကဖ) တံရ။

ပ္ဍဲကဵုပွိုၚ်ဍုၚ်ကျံက်တခါ၊ ခရိုၚ်ညံၚ်လေဝ်ပေန်ဂှ် ဒပ်ကံၚ်ဇြဳပၞာန်တံ နကဵုတၚ်ရန်တၟံနွံနွံ အရိုဟ်ဒဒှ်တ္ၚဲ ပန်ပှော်ဒၟံၚ်လွဟ်ဇၞော် ပ္ဍဲကွာန်ညးဍုၚ်ကွာန်တံ မသ္ပဒတဴဒၟံၚ်တံရောၚ်ဂှ် ဂွံတီကေတ် အတိုၚ်ဂလာန် ညးဍုၚ်ကွာန်ဒေသတံရ။

ပရိုၚ်−သြၚ်လောန်တိုၚ်(မ်)

ဗီု−KNLA, PDF Kyaukkyi