မျာၚ်-ဂျူလာၚ်(၁)
ရးဒေသမဂွေ၊ ပ္ဍဲပွိုၚ်ဍုၚ်မျာၚ်ဂှ် ကြဴနူရေၚ်ကွဳယာဉ်စက်ကံၚ်ဇြဳပၞာန်ကဵု ပျူသဝ်ထဳတအ် ဒးဒုၚ်တံၚ်ခတိုဟ်လဝ်မာၚ်တုဲ ပျူသဝ်ထဳ ဟွံအောန်နူ (၅)တၠ ဒးချိုတ်လဝ်ရဂှ် ပ.က.ဖ မျာၚ် လလောၚ်တြးလဝ် ပရိုၚ်ရ။
ပ္ဍဲဂိတုဂျောန် စၟတ်တ္ၚဲ(၂၇) ကဵုစၟတ်တ္ၚဲ(၂၈)တုဲကၠုၚ်တေံဂှ် ရေၚ်ယာဉ်ကွဳစက်ကံၚ်ဇြဳပၞာန် ဒးဒုၚ်ဗတိုက်လဝ်တုဲ ကွဳစက်မွဲဖ္ဍိုက် ဒးခရိုဟ်လီုလဝ်ကီု ပ္ဍဲပရေၚ်ဗတိုက်လဝ် ပွိုၚ်ၜါတ္ၚဲဂှ် လ္ပာ်ကံၚ်ဇြဳပၞာန် ၜိုတ် (၉)တၠ ဒးချိုတ်လဝ်နွံမာန်ရောၚ်ဂှ်ဟီုသ္ဂးလဝ်ရ ။
“ကွဳစက်ကံၚ်ဇြဳပၞာန်ကဵု ပျူသဝ်ထဳ ဒးဒုၚ်တံၚ်ခတိုဟ်လဝ်မာၚ် ဒးခရိုဟ်လဝ်တုဲ ဟိုတ်နူဂၠံၚ်ဍာန်အဓိက လီုလာ်အာဂှ်ရ ရေၚ်ကွဳစက်ဂှ် ဟွံဂံၚ်ဆက်တိုန်အာ ဂတတေံတုဲ ဂေတ်တ္ၚေတ်ဒၟံၚ် အကြာတွောန်မကဵု တယျေတ်ကာန်ရ။ ဗဒိုပ်ပျူသဝ်ထဳ ပ္ဍဲတွောန်မဂှ်လေဝ် ပန်ဖျေံဒၟံၚ်လွဟ်ဇၞော် ပ္ဍဲကွာန်ဗ္ဒာဲဗ္ဒာဲဂှ် ကြာန်န်ရ”ဂှ် ညးတာလျိုၚ် ပ.က.ဖမျာၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုဂျောန် စၟတ်တ္ၚဲ (၂၇)ဂှ် ကွဳစက်ကံၚ်ဇြဳပၞာန် ပန်ဖ္ဍိုက် နူလ္ပာ်ပခုက္ကူ လုပ်ကၠုၚ်လ္ပာ်ဍုၚ်ကမ္မ အခိၚ်တံၚ်ခတိုဟ်လဝ်မာၚ် အကြာကာန်တဝ်ကဵု ကမ္မဂှ် ဒးလဝ်ဘဲဝပ် (၆)တၠတုဲ ဒးချိုတ်လဝ်မွဲတၠရဂှ် ဂွံတီကေတ်ရ။ ။
သ္အာန်နူဂှ်ပၠန် ပ္ဍဲဂိတုဂျောန် စၟတ်တ္ၚဲ (၂၈)အခိၚ်နူဂယးဂှ်လေဝ်် ကွဳစက်ကံၚ်ဇြဳပၞာန် တိတ်ကၠုၚ်နူပခုက္ကူမွဲဖ္ဍိုက် ဒးဒုၚ်တံၚ်ခတိုဟ်လဝ်မာၚ် အကြာဗဒိုပ်ပျူတွောန်မကဵု ဗဒိုပ်ပျူတယျေတ်ကာန်ဏီရ။
ပ္ဍဲပရေၚ်ဗတိုက်လဝ်ဂှ် ဂၠံၚ်ကံၚ်ဇြဳပၞာန်ပတှ်ေ သ္ကုတ်ဂၠံၚ်မျာၚ်-ကမ္မဂှ် ဒးလီုလာ်လဝ်တုဲ ကွဳစက်လေဝ် ဒးလီုအာလဝ်ကီု ကောန်ဒပ်ကံၚ်ဇြဳပၞာန် ၜိုတ် (၇)တၠ ဒးချိုတ်လဝ်တုဲ ဒးလဝ်ဘဲဝပ် ဗွဲမဂၠိုၚ်နွံမာန်ရောၚ်ဂှ် ဂွံတီကေတ်ရ။
အကြာဗဒိုပ်တွောန်မကဵု ကမ္မဂှ် ကြဴနူဒးဒုၚ်တံၚ်ခတိုဟ်လဝ်မာၚ်တုဲ ကောန်ဒပ်ကံၚ်ဇြဳပၞာန် ဇီုကပိုက်ဒးလဝ်ဘဲဝပ် နွံမာန်တုဲ ကွဳစက်ၜါဖ္ဍိုက်ဂှ် ဟွံဆက်အာဂတတေံတုဲ ဗဒေါံလဝ် ပ္ဍဲဗဒိုပ်ပျူတွောန်မရဂှ် ဂွံတီကေတ်ရ။
နကဵုညးဍုၚ်ကွာန်တအ်ဂှ် ညံၚ်ဟွံဂွံသုၚ်စောဲ ဂၠံၚ်သ္ကုတ် မျာၚ်-ကမ္မကီု ဂၠံၚ်ဍာန်ဒးလီုလာ်လဝ်ဂှ် အခိၚ်ကာလပၠန်ဂတးတုဲဒှ်မ္ဂး ကလေၚ်ပလေဝ်ပလေတ်ကဵုပၠန်ရောၚ်ဂှ် ပ.က.ဖမျာၚ် လလောၚ်တြးလဝ် ပရိုၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ
sanlontai