ဒပ်ပၞာန်သာကလိလောန်ကၠုၚ် ဂဗုတ်ပြိုက်ဂစိုတ်မၞိဟ်၊ ဂဗုတ်သ္ပကောန်ဗြဴ သီုကဵုဂဗုတ်ရာဇဝတ် ပၞာန်ရဂှ် IIMM ဟီု

နေပျဳဒဝ် – ဂျူလာၚ်(၁)

ဒပ်ပၞာန်သီကေတ်လဝ်အဝဵုညးဍုၚ်ကွာန်ဂှ် သာက္လိလောန်ကၠုၚ်ဒၟံၚ် ဂဗုတ်ပြိုက်ဂစိုတ်မၞိဟ်၊ ဂဗုတ်သ္ပ ကောန်ဗြဴ သီုဂဗုတ်ရာဇဝတ်ပၞာန် လ္တူညးဍုၚ်ကွာန်တအ် ဂၠိုၚ်တိုန်ကၠုၚ်ရဂှ် ဂကောံလ္ၚတ်ဂၠိုက် ဂၠာဲ ဗၠးၜး ကုသမဂ္ဂဆေၚ်ရာကဵုကၟိန်ဍုၚ်ဗၟာ (IIMM) လလောၚ်တြးလဝ် ပ္ဍဲဂိတုဂျောန် စၟတ်တ္ၚဲ(၂၉)တေံရ။

ကံၚ်ဇြဳပၞာန်ဂှ် မ္ၚးနူဂဗုတ်ပြိုက်ဂစိုတ်မၞိဟ်၊ ဂဗုတ်သ္ပကောန်ဗြဴ၊ ဂဗုတ်ဍဵုဍိုက်ပျဲပျာံတုဲ ကလိလောန်ဒၟံၚ် ပရေၚ်ဖျေံဒဏ်ထံၚ် ဟွံလုပ်ကဵုသၞောဝ် သီုဂဗုတ်ရာဇဝတ်ပၞာန် ဂၠိုၚ်တိုန်ကၠုၚ်ဒၟံၚ် တီတီရဂှ် ဟီုသ္ဂးလဝ်ရ။

စပ်ကဵုဂဗုတ်ရာဇဝတ် ကလိလောန်လဝ် လ္တူညးဍုၚ်ကွာန်တအ်တုဲ ဒဒှ်ရဂွံလဝ်သက်သဳသာဓက ခိုၚ်ၚ်ကၠိုက်က်ကီု တၚ်ဂၞၚ်သောဲသောဲဗြောဲတအ်ဂှ်မ္ဂး ဓမံက်ထ္ၜးအာ ပ္ဍဲလိက်ဒုၚ်စဳရေၚ်ပေၚ်သၞာံ ဂကောံလ္ၚတ်ဂၠိုက်ဂၠာဲ ဗၠးၜး ကုသမဂ္ဂ ဆေၚ်ရာကဵုကၟိန်ဍုၚ်ဗၟာ (IIMM)ရောၚ်ဂှ် ဂွံတီကေတ်ရ။

ဒုဟ်ရာဇဝတ်ပၞာန်ဂှ် နကဵုတၚ်ဂၞၚ်ကံက်ကေတ်လဝ် နူတံရိုဟ်တၚ်ဂၞၚ် ပရိုၚ် (၇၀၀)ပြၚ် သက်သဳ သာဓက တၚ်တိတ်ဟီုဂးလဝ် (၂၀၀)ပြၚ် ပါလုပ်ဒၟံၚ်တုဲ ပ္ဍဲကဵုဂှ် သွက်ဂွံပတိုန်အာလိက်ဒုၚ် စဳရေၚ် ဇရေၚ်ကံၚ်ဇြဳအခေါၚ်အရာမၞိဟ် ဂဗုတ်တောဲခိုၚ်ကၠိုက် (၁၃၅)ဂဗုတ်ပြၚ် နွံရောၚ်ဂှ် ဓမံက်လဝ် ပ္ဍဲတၚ်လလောၚ်တြးရ။

ပွပ္ကီုပရာပ္ဍဲကၟိန်ဍုၚ်ဗၟာဂှ် ဟိုတ်နူဂၠိုၚ်တိုန်ကၠုၚ်ဒၟံၚ် တီတီတုဲ ကၠောန်ရေၚ်တၠုၚ်ဒၟံၚ် ပရေၚ်ဂၠိုက်ဂၠာဲစၟဳစၟတ် အရာဇီုကပိုက်ဒး လတူညးဒးဒုၚ်ကလိလောန်လဝ် သ္ကာတ်မြဟ်အိုတ်ဂမၠိုၚ် ဗွဲအဓိကရဂှ် ဂကောံ IIMM ကဵုလဝ်သမ္တီရ။

သ္အာၚ်နူဂှ်ပၠန် ကိစ္စကံၚ်ဇြဳပၞာန် ကလိလောန်ပြိုက်ဂစိုတ်လဝ် ရိုဝ်ဟေန်ဂျာဗွဝ်ကဵုဗွဝ်ဂှ်လေဝ် ကၠောန်သ္ပဒၟံၚ် ပရေၚ်ဂၠိုက်ဂၠာဲစၟဳစၟတ်ရဂှ် ဂွံတီကေတ်ရ။

ဂကောံလ္ၚတ်ဂၠိုက်ဂၠာဲ ဗၠးၜး ကုသမဂ္ဂဆေၚ်ရာကဵုကၟိန်ဍုၚ်ဗၟာ (IIMM)ဂှ် သွက်ဂွံပကောံပကေဝ်တၚ်ဂၞၚ် ဒပ်ပၞာန်ဖံက်ပ္ကဝ်လဝ် အခေါၚ်အရာမၞိဟ် လ္တူရိုဝ်ဟေန်ဂျာဂှ် ပ္ဍဲသၞာံ ၂၀၁၈ တုဲကၠုၚ်တေံ ဒှ်ဂကောံ ကံၚ်ဇြဳအခေါၚ်အရာမၞိဟ် ဒက်ပ္တန်ကဵုလဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – IIMM