ဟိုတ်နူကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် လ္ပာ်ဂကောံကွာန် အခၠဵု၊တဂေါန်ဒေၚ်ဂှ်တုဲ ညးဒေသ ဂၠိုၚ်ကဵုလ္ၚီ ဒးဂြိပ်ဒဴဒၟံၚ်

လှာဒကှ်၊ ဂျူလာၚ် (၁)

ဟိုတ်နူဒပ်ကံၚ်ဇြဳပၞာန်တံ လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲဂကောံကွာန်အခၠဵု၊ တဂေါန်ဒေၚ် ပွိုၚ်ဍုၚ်လှာဒကှ်၊ တွဵုရးကရေၚ်ဂှ်ရ ညးဒေသဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် ဇရေၚ်ပရိုၚ်တမ်ရိုဟ် အပ္ဍဲဒေသတံရ။

စနူမွဲၜါတ္ၚဲတုဲကၠုၚ်တေံတုဲ ဟိုတ်နူကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ရ ညးဒေသ ၜိုတ် (၃၀၀၀) ပြၚ် နူကဵုကွာန်ပုလိၚ်၊ အခၠဵုတဂေါန်ဒေၚ်၊ (မြို့ဟောင်း)၊ ကွာန်အခၠဵုဍောတ်၊ ကွာန်ကျာ်မသုန် ကေုာံ နူကဵု ကွာန်နံၚ်သိုၚ်ထောန်တံဂှ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံတုဲ ဒးဆေၚ်ဒၟံၚ်မုက်ကဵု အခက်အခုဲ ဂမၠိုၚ်ရောၚ် ဂွံတီကေတ်ရ။

သ္အာၚ်နူဂှ်ပၠန် ပ္ဍဲကဵုဂကောံကွာန်အခၠဵုတဂေါန်ဒေၚ်ဂှ် ဟိုတ်နူဒပ်အမၠံက် (၃၈၁) ကံၚ်ဇြဳပၞာန် ဖျေံသ္ဇိုၚ် ကွာန်အၜေတ် ပွိုၚ်ဍုၚ်မုဟ်ဍုၚ်တံ အရိုဟ်ဒဒှ်တ္ၚဲ ပန်ပှော်ဒၟံၚ်လွဟ်ဇၞော်တံဂှ်ရ ညးဒေသတံ ဇီုကပိုက်ကလိဂွံဝပ် က္တဵုဒှ်ဒၟံၚ်ရ။

လ္ပာ်ကံၚ်ဇြဳပၞာန်ဂှ် မ္ၚးနူပန်ပှော်ကဵုလွဟ်ဇၞော်တံဂှ် စနူဂိတုဂျောန် (၂၆) တုဲကၠုၚ်တေံတုဲ နူတွဵုရးဍုၚ်မန်၊ ပွိုၚ်ဍုၚ်ကျာ်မြဟ်၊ ကွာန်(တော့ပလော့) ကဵု ကွာန်တၟအ်ဗြဴဂှ် ထ္ပက်ကၠုၚ်ကရောၚ်ပၞာန် လ္ပာ်ပွိုၚ်ဍုၚ် လှာဒကှ်၊ ဂကောံကွာန်အခၠဵုတဂေါန်ဒေၚ်၊ လ္ပာ်ဇိုၚ်ဒဵုဒံၚ်ညဵုတံဂှ်ရ က္တဵုဒှ်လဝ် ပရေၚ်ပန်ပှော်ဇီုမုက် ကုဂကောံဒပ်ပံၚ်ကောံ KNLA တံရောၚ်ဂှ် ညးဒေသတံ ဟီုရ။

ကရောၚ်ပၞာန်ဏံဝွံ ပ္တဝ်အာက္ဍိုပ် လ္ပာ်ဗ္ဒိုပ်ဗၠာဲသၟိၚ် ဒၞါဲဒပ်ကံၚ်ဇြဳပၞာန်ကဵု ဒပ် BGF တံ မဖျေံဒၟံၚ်သ္ဇိုၚ် အပ္ဍဲကွာန်အခၠဵုတဂေါန်ဒေၚ် ပွိုၚ်ဍုၚ်လှာဒကှ်တံမာန်ရောၚ်ဂှ် သ္ဂးဒၟံၚ်အိုတ်ရ။

ပ္ဍဲကဵုဂကောံကွာန်အခၠဵုတဂေါန်ဒေၚ်ဂှ် က္တဵုဒှ်ပေါဲဗ္တိုက်ဟွံမွဲမွဲသာ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ညးဍုၚ်ကွာန်ကောန်အရာပ် နူကဵုကွာန်တဂေါန်ဒေၚ် (၃) တၠ ဒးချိုတ်အာလဝ်တုဲ သ္ၚိဒၟံၚ် (၅) မ လီုလာ်ဆောံလေၚ်အာလဝ်ဂှ် ဌာန်လလောၚ်ပရိုၚ် ခရိုၚ်ဒူပလာယာ KNU လလောၚ် ပ္တိတ်လဝ်ရ။

အတိုၚ်ဌာန်လလောၚ်ပရိုၚ် ခရိုၚ်ဒူပလာယာ KNU တံ လလောၚ်ပ္တိတ်လဝ်ဂှ်မ္ဂး ပ္ဍဲသၞာံ ၂၀၂၃ အပ္ဍဲဂိတုမေတေံ ပ္ဍဲကဵုဒပ်မဟာ (၆) ဂှ် လၟိဟ်မၞိဟ်ပါဲဒဴဘဲပၞာန် (၂၂၅၂၃) တၠ နွံတုဲ ဟိုတ်နူဒှ်ဒၟံၚ်အခိၚ် ကသီုဂှ်ရ နွံပၟိက်ဒၟံၚ်ကဵု ဒၞါဲမံၚ်စံၚ်၊ ဇွောံမစၞစ၊ ဂဥုဲဇဗ ကေုာံ ကပေါတ်အရပ်စပ်သ္ဇိုၚ်တံတုဲ ဒးဆေၚ်ဒၟံၚ်မုက်ကဵု အခက်အခုဲတံရောၚ်ဂှ် သ္ဂးလဝ်ရ။

ပရိုၚ်−သြၚ်လောန်ုတိုၚ်(မ်)

ဗီု−CJ