သေတ်တွေ – ဂျူလာၚ်(၁)
တွဵုရးရခေၚ် ဟိုတ်နူလဗိုတ်ကျာတုဲ လာၚ်ပၟတ် ပ္ဍဲကွာန်ဂမၠိုၚ် ပိုတ်သ္ကုတ်လီုလာ်လဝ်တအ်ဂှ် ကလေၚ်ပလေဝ်ပလေတ်လဝ် တုဲဒှ်ဒၟံၚ် (၅၀)တၟံကၠံယျရောၚ် ကံၚ်ဇြဳပၞာန် လလောၚ်တြးပ္တိတ်လဝ်ဂှ် ဒှ်တၚ်လလောၚ်တြး လီဠာန်ဟေၚ်တုဲ စဵုကဵုအခိၚ်လၟုဟ် ဒၞာဲညးဍုၚ်ကွာန်တအ် မံၚ်တန်တဴဒၟံၚ် ဟွံက္လိဂွံ ပၟတ်ဓာတ်လလဳဏီရဂှ် ညးဒေသတအ် ဟီုသ္ဂးလဝ်ရ၊
လဗိုတ်ကျာလုပ်တုဲ စဵုအခိၚ် ပွိုၚ်အကြာ(၂)ဂိတု ညးဒေသတအ် ဟွံက္လိဂွံ ပၟတ်ဓာတ်လလဳဏီတုဲ ဒးပတှ်ေဒၟံၚ် ဇြဟတ်ပၟတ်စဲတ္ၚဲ ပၟတ်ဇြောလာ ဗွဲအအဓိကရ။
ပတှ်ေပၟတ်စဲတ္ၚဲဇြောလာတုဲ ၜိုန်ရုၚ်သုၚ်စောဲဒၟံၚ်ကီုလေဝ် အခိၚ်လၟုဟ်ဏံ ဟိုတ်နူစိုပ်ကၠုၚ်ရာသဳ ကသီုဂှ်ရ ဟွံက္လိဂွံလျးတ္ၚဲပေၚ်ၚ်တုဲ ဒးဆေၚ်မဒၟံၚ်မုက် ဒးဆဵုဂဗဒၟံၚ်ကဵု တၚ်ခက်ခုဲရ။
လာၚ်ပၟတ်ဓာတ်လလဳကံၚ်ဇြဳပၞာန်ဂှ် စွံအဓိကကဵု ဌာနမဆေၚ်စပ်၊ ကျာ်စေတဳတအ်တုဲ ၜိုန်ကၠောန်ရေၚ် တၠုၚ်ဒၟံၚ်ကီုလေဝ် လ္ပာ်သ္ၚိဒၟံၚ်မၞိဟ်တအ်ဂှ် ကၠောန်သ္ပရေၚ်တၠုၚ်ကဵုလဝ် ဟၟဲရဂှ် ညးဒေသ ယျတေံတံၚ် မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္အာၚ်နူဂှ်ပၠန် အကာဲအရာပလေဝ်ပလေတ်တုဲလဝ် (၅၀)တၟံကၠံ ကံၚ်ဇြဳပၞာန်လလောၚ်တြးလဝ်ဂှ်မ္ဂး ပ္ဍဲဗလးမုက်တိ နတဲဂှ် ဒှ်အကာဲအရာ ဍာံစၟတ်ဟွံသေၚ်တုဲ ၜိုတ်(၂၅)တၟံကၠံဟေၚ် ဒှ်အကာဲအရာ ကၠောန်ရေၚ်တၠုၚ်ကဵုလဝ် နွံရဂှ် ညးဟီုသ္ဂးလဝ်ဏီရ။
ဟိုတ်နူဘဲဒဏ်လဗိုတ်ကျာတုဲ ပ္ဍဲဒေသသၟဝ်ကျာတွဵုရးရခေၚ် လာၚ်ဇြဟတ်ဓာတ်လလဳကေုာံ ရုၚ်ပါ်ဓာတ်လလဳ ဒးလီုလာ်လဝ်တအ်ဂှ် ကၠောန်သ္ပဒၟံၚ် ပရေၚ်ပလေဝ်လေတ်တုဲ လာၚ်ဓာတ်ပၟတ်လလဳ ကွာန်တအ်ဂှ် (၄၉. ၃၅) တၟံကၠံ အာစိုပ်ဒၟံၚ်ဒတုဲရဂှ် ဌာနဝန်ဇၞော်ဓာတ်လလဳကံၚ်ဇြဳပၞာန် လလောၚ် တြးလဝ် ပ္ဍဲဂိတုဂျောန် သတ္တာဟ လကြဴအိုတ်ဏံရ။
ကံၚ်ဇြဳပၞာန်ဂှ် ၜိုန်ရလလောၚ်တြးလဝ် ဒဒှ်ရပါ်တြးကဵုလဝ် ပၟတ်ဓာတ်လလဳ သွက်ညးဍုၚ်ကွာန် ပ္ဍဲတွဵုရးရခေၚ် ပ္ဍဲဂိတုဂျောန်ကီုလေဝ် ကဵုအကာဲအရာက္တဵုဒှ်ဒၟံၚ် ပ္ဍဲဗလးမုက်တိမ္ဂး တၞဟ်ခြာဒၟံၚ် နွံရ၊
ပရိုၚ်-သြၚ်လောန်တိုၚ်(မ်)
ဗီုရုပ် – MPA
sanlontai