တၞၚ်သြဳ – ဂျူလာၚ်(၂)
ရးဒေသတၞၚ်သြဳ၊ ပွိုၚ်ဍုၚ်တၞၚ်သြဳ ပ္ဍဲလ္ပာ်ကွာန်ဗာန်လမွောတ် ဟိုတ်နူလ္ပာ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် နကဵုဇြဟတ်ၜိုတ် (၂၀၀)ဂှ်ရ အကာဲအရာပရေၚ်ပၞာန် ကြံၚ်မ္ၚိုဟ်ဒၟံၚ်တုဲ စၟတ်သမ္တီလဝ် ကဆံၚ်အရံၚ်သာ်ဗ္ကေတ် လးလဝ်ဒပ်ရဂှ် ဒပ်ဒမၠုက်ဗေတ်မလိုက် ဟီုသ္ဂးလဝ်ရ။
ပ္ဍဲဂိတုဂျောန် စၟတ်တ္ၚဲ (၃၀)တုဲကၠုၚ်တေံဂှ် ပ္ဍဲကွာန်ဗာန်လမွောတ် ကရောၚ်ပၞာန် စလုပ်ကၠုၚ်လဝ်ဂှ် ကြဴနူပေါဲဗတိုက်ဆေၚ်မုက် က္တဵုဒှ်လဝ်ကဵု ဒပ်ပံၚ်ကောံ ဂကောံစဵုဒၞာဒေသတအ်တုဲ နူလ္ပာ်ကံၚ်ဇြဳပၞာန် စံၚ်ပလီုလဝ် သ္ၚိဒၟံၚ်(၃)မရဂှ် ဂွံတီကေတ်ရ။
ကရောၚ်ပၞာန် ကံၚ်ဇြဳပၞာန်ဂှ် နူတ္ၚဲကၠာကၠာတေံ ပကောံဒၟံၚ် ဇြဟတ်တုဲ ကၠာဟွံဂွံထ္ပက်ကရောၚ်ပၞာန် ဏီဂှ်လေဝ် ကၠောန်သ္ပလဝ် ပရေၚ်ပန်ဖျေံလွဟ်ဇၞော်ကြာန်န် နွံရဂှ် ဒပ်ဒမၠုက်ဗေတ်မလိုက် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
အခိၚ်လၟုဟ်ဏံ ကရောၚ်ပၞာန်ဂှ် ဆက်တိတ်အာ လ္ပာ်ကွာန်ကာမ်တိုဝ် ပ္ဍဲဂိတုဂျူလာၚ် စၟတ်တ္ၚဲ (၁)ဂှ်တုဲ ကၠာဟွံဂွံတိတ်ကရောၚ်ပၞာန်ဏီ ပန်ဖျေံလဝ်လွဟ်ဇၞော်ဏီရဂှ် ဂွံတီကေတ်ရ။
ဟိုတ်နူကရောၚ်ပၞာန်ကံၚ်ဇြဳပၞာန်လုပ်ဒၟံၚ်တုဲ ညးဒေသနူကွာန် (၅)ကွာန် ပါလုပ် သီုကွာန်ဗာန်လမွောတ်၊ ကာမ်တိုဝ်၊ ရာမ်ဖိုဝ် ကေုာံညံၚ်ပေန်ကာန် (၃၀၀၀)တၠပြၚ် ဒးဂြိပ်တိတ်ပါဲဓလေတ်ဒၟံၚ်ရဂှ် ဂွံတီကေတ်ရ၊
ဟိုတ်နူပရေၚ်ပၞာန်ကြံၚ်မ္ၚိုဟ်ဒၟံၚ်ဂှ်ရ လဂွံကဵုပရေၚ်ဂီုကၠီု စၟတ်ပိုၚ်ခြာလဝ် ကဆံၚ်အရံၚ်သာ်ဗ္ကေတ်တုဲ ညံၚ်ဟွံဂွံအာကၠုၚ် ပ္ဍဲသ္ကုတ်ဂၠံၚ်ကၟိန်ဍုၚ် ဗိက်-တၞၚ်သြဳ-ဗုတ်ပျေန်ဂှ် ပ.က.ဖ တၞၚ်သြဳ ကဵုလဝ်တၚ်သမ္တီရ၊
ပ္ဍဲဂိတုဂျောန်တုဲကၠုၚ်တေံလေဝ် ပ္ဍဲဗ္ဒာဲကွာန်ဗာန်လမွောတ်ကဵု ကွာန်တမဳလှ ပေါဲဗတိုက်က္တဵုဒှ်လဝ် (၃)တ္ၚဲဆက်ဆက်တုဲ လ္ပာ်ကံၚ်ဇြဳပၞာန် ပါလုပ်သီုသ္ကိုပ်ဂဥုဲ၊ သၞာဒဴတအ် ဒးချိုတ်လဝ် နွံဒၟံၚ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-CJ
sanlontai