ပ္ဍဲဍုၚ်ပရေၚ်ပိုန်ဒြပ်ကြုက်နွံဂှ် ပရေၚ်ပေါဲဗတိုက်က္တဵုဒှ် အောန်ယအ်စှ်ေကဝက်

မတ်မလီု -ဂျူလာၚ်(၂)

ပ္ဍဲပွိုၚ်ဍုၚ် ဓမံက်ဒၟံၚ်ရုပ်ရဴ ကိုန်စဳမာန်ကြုက် ကေုာံ ဍုၚ်စဳဇန်ပလေဝ်ပလေတ်လဝ် သွက်ဂွံဓမံက်ရုပ်ရဴ ကိုန်စဳမာန်စၚ်္ကြံပရေၚ်ပိုန်ဒြပ် ကြုက်-ဗၟာ ပ္ဍဲကၟိန်ဍုၚ်ဗၟာတအ်ဂှ် ပရေၚ်ပေါဲဗတိုက်က္တဵုဒှ်လဝ် အောန် ယအ်စှ်ေ ကဝက်ပြၚ်ရဂှ် ISP – Myanmar လလောၚ်တြးလဝ် ပ္ဍဲဂိတုဂျောန် စၟတ်တ္ၚဲ (၃၀)ဏံရ။

နူအခိၚ်ကံၚ်ဇြဳပၞာန်သီကေတ်အဝဵုတုဲ စဵုကဵုဂိတုမေ စၟတ်တ္ၚဲ (၃၀)သၞာံဏံ ပ္ဍဲပွိုၚ်ဍုၚ် စဳဇန်လဝ် သွက်ဂွံကၠောန်ကိုန်စဳမာန် ကြုက်-ဗၟာ ၜါကၟိန်ဍုၚ် ကေုာံ ပွိုၚ်ဍုၚ်တၞဟ် ဓမံက်ဒၟံၚ်ရုပ်ရဴ (၆၁)ပွိုၚ်ဍုၚ် တအ်ဂှ် ပေါဲဗတိုက် (၂၂၄၀)ဝါပြၚ် က္တဵုဒှ်လဝ်ရ။

ပ္ဍဲကဵုဂှ် ပေါဲဗတိုက်(၁၄၈၀) ဝါပြၚ်ဂှ် က္တဵုဒှ်လဝ် နူဂိတုဖေဖဝ်ဝါရဳ သၞာံသီအဝဵု သၞာံ ၂၀၂၁ စဵုကဵုဂိတု မာတ်ချ် သၞာံ ၂၀၂၂ ပ္ဍဲပွိုၚ်(၁၄)ဂိတုတုဲ နူဂိတုဨဗြဴ သၞာံတုဲကၠုၚ်တေံတုဲ စဵုကဵုဂိတုမေ သၞာံဏံ ပ္ဍဲပွိုၚ် (၁၄)ဂိတုဂှ်မ္ဂး လၟိဟ်ပေါဲဗတိုက် (၇၆၀)ဝါပြၚ် က္တဵုဒှ်လဝ်ရ။

ဗ္ၜတ်ပေါဲဗတိုက်က္တဵုဒှ်လဝ် ပ္ဍဲကာလ ပွိုၚ်(၁၄)ဂိတု ၜါဝါဂှ်မ္ဂး ပ္ဍဲမွဲဗွိုၚ် ဗ္ဒာဲကိုန်စဳမာန်ကြုက်ဂှ် ၜိုတ် (၅၀)တၟံကၠံ အောန်ယအ်စှ်ေကၠုၚ်ရဂှ် ဓမံက်ထ္ၜးလဝ် ပ္ဍဲတၚ်ဂၞၚ် ISP – Myanmar ရ။

ပၞောဝ်ကဵုအပံၚ်လၟိဟ်ပေါဲဗတိုက် (၂၂၄၀) ပြၚ် ပေါဲဗတိုက် (၁၀၀၀)ဝါပြၚ်ဂှ် က္တဵုဒှ်လဝ် ပ္ဍဲတွဵုရးကရေၚ် ဒၞာဲတတ်ကၠောံဂၠံၚ်ဍာန် ပရေၚ်ဆက်စၠောံဗၞိက် ကြုက်-ဠဴ-သေံ-ဗၟာတၟိတုဲ ပ္ဍဲပွိုၚ်ဍုၚ်လွိုၚ်ကဝ် ဒၞာဲလာၚ် ပၟတ်ဓာတ်လလဳတတ်ကၠောံဂှ်လေဝ် အပံၚ်လၟိဟ် ပေါဲဗတိုက် ဟွံအောန်နူ (၂၂၅)ဝါ က္တဵုဒှ်လဝ်ရ။

သ္အာၚ်နူဂှ်ပၠန် ပ္ဍဲတွဵုရးသေံ သ္ကုတ်သၟဝ်ကျာဂှ်လေဝ် အပံၚ်လၟိဟ်ပေါဲဗတိုက် ဟွံအောန်နူ (၂၂၂)ဝါနွံတုဲ ပ္ဍဲပွိုၚ်ဍုၚ်မူသေဝ် ဒၞာဲဗဒိုပ်ဆက်စၠောံဗၞိက်ပယျဵု နွံတန်တဴဒၟံၚ် ပလေဝ်ပလေတ်လဝ် သွက်ဂွံသိုၚ်ခၞံ အပိုၚ်ခြာပရေၚ်ပိုန်ဒြပ်ပံၚ်တောဲဂှ်မ္ဂး လၟိဟ်ပေါဲဗတိုက် (၈၀)ဝါပြၚ် က္တဵုဒှ်လဝ်ရဂှ် ဂွံတီကေတ်ရ။

စဵုကဵုဂိတုမေ စၟတ်တ္ၚဲ (၃၁)တုဲကၠုၚ်ဏံ အလုံမွဲကၟိန်ဍုၚ် အပံၚ်လၟိဟ်ပေါဲဗတိုက် (၉၅၀၀)ပြၚ် က္တဵုဒှ်လဝ်တုဲ လၟိဟ်ပေါဲဗတိုက် (၂၃)တၟံကၠံပြၚ်ဂှ် က္တဵုဒှ်လဝ် ပ္ဍဲပွိုၚ်ဍုၚ် (၆၁)ပွိုၚ်ဍုၚ် ဒၞာဲကိုန်စဳမာန်ကြုက် နွံဒၟံၚ်ဂှ်ရ။

လၟိဟ်ပေါဲဗတိုက် အကြာကံၚ်ဇြဳပၞာန်ကဵု ဂကောံရပ်လွဟ်ကောန်ဍုၚ်အရၚ် က္တဵုဒှ်လဝ် (၁၂၉၀)ဝါပြၚ် နွံတုဲ လၟိဟ်ပေါဲဗတိုက် ကံၚ်ဇြဳပၞာန်ကဵု PDF (၃၀၀)ဝါပြၚ် နွံတုဲ လၟိဟ်ပေါဲဗတိုက် အကြာဒပ်ပံၚ်ကောံ EAOs-PDF ကဵု ကံၚ်ဇြဳပၞာန်ဂှ် ဟွံအောန်နူ (၅၆၀)ဝါ လၟိဟ်ပေါဲဗတိုက် အကြာဂကောံရပ်လွဟ် ကောန်ဍုၚ်အရၚ် မွဲဂကောံကဵုမွဲဂကောံဂှ် ဟွံအောန်နူ (၄၆)ဝါ နွံလဝ်ရဂှ် ISP – Myanmar ဓမံက်ထ္ၜးလဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – MAGWAY PDF