သေန်ကာပေါဝ်၊ ဂျူလာၚ် (၂)
ဒမြိပ်ဂဗုတ်ဂစိုတ်ဇကုဇကု ပ္ဍဲသေန်ကာပေါဝ်ဂှ်ဝွံ နူကဵုသၞာံတုဲကၠုၚ်တေံဂှ် သၠုၚ်တိုန်လဝ် ဗ္ဒါဲ ၂၆ တၟံကၠံတုဲ ဣဏံဝွံ အပ္ဍဲပွိုၚ်ၜါစှော်သၞာံဏံ ဒှ်ဗ္ၜတ်သၠုၚ်တိုန်လဝ်ရောၚ်ဂှ် ဂကောံအပ္ဍဲဒေသ အလဵုအသဳဟွံသေၚ် (NGO) တံ ထ္မံက်ထ္ၜးလဝ်ရ။
ဒမြိပ်ဂဗုတ်ဂစိုတ်ဇကုဇကု အကြာညးသၟတ် နူအာယုက် (၁၀) သၞာံကဵု အာယုက် (၂၉) သၞာံတံဂှ်ကဵု ညးဇၞော်ဇၞော် အာယုက် ၇၀−၇၉ တံဂှ်ဝွံ စဵုကဵုသ္ဇက်ဒးဂွိၚ်ခိုဟ် သၠုၚ်တိုန်ကၠုၚ်လဝ်ရောၚ်ဂှ် ထ္မံက်ထ္ၜးလဝ် ပ္ဍဲကဵုလိက်ဒုၚ်စဳရေၚ် လၟေၚ်သၞာံ ဂကောံအလဵုအသဳဟွံသေၚ် သေန်ကာပေါဝ် (SOS) ရ။
အပ္ဍဲသၞာံ ၂၀၂၂ ပ္ဍဲကဵုဍုၚ်သေန်ကာပေါဝ်ဂှ် မၞိဟ်ဂစိုတ်ဇကုဇကု နွံလဝ် ၄၇၆ တၠတုဲ ကၠာသၞာံဏံမွဲသၞာံဂှ် နူကဵုနွံလဝ် ၃၇၈ တၠဂှ် သာဂၠိုၚ်ကၠုၚ်လဝ်တုဲ ကြဴနူသၞာံ ၂၀၀၀ တုဲဂှ် ဒှ်လၟိဟ်ဂၠိုၚ်အိုတ်ရောၚ် ဂွံတီကေတ် အတိုၚ်တၚ်လလောၚ်တြး SOS ရ။
ပရေၚ်ဂစိုတ်ဇကုဇကု ဂၠိုၚ်ကၠုၚ်သာ်ဏံဂှ်ဝွံ ဗွဲတၟေၚ် ပ္ဍဲကဵုတွဳဗွိုၚ်ဂကောံမၞိဟ်သေန်ကာပေါဝ်ဂမၠိုၚ် အကြာမၞိဟ်ဍောတ်တ်ကဵု မၞိဟ်အာယုက်ဇၞော်ဇၞော်တံဂှ် ဇြဟတ်ဂရိုဟ်စပ်ကဵုစိုတ် အရာညာတ်ကေတ်ဟွံမာန်တံ သာဂၠိုၚ်ကၠုၚ်ဂှ် ဒဒှ်ရစဳထ္ၜးပျးကဵုဒၟံၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဟိုတ်နူအကာဲအရာသာ်ဏံတုဲ နကဵုညးတာလျိုၚ်ဂမၠိုၚ် ပြသၞာစပ်ကဵုလ္ၚုလ္ၚန် ပ္ဍဲညးဍုၚ်ကွာန်တံဂှ်ကဵု ပြသၞာစပ်ကဵုစိုတ် ညံၚ်ကဵုဒှ်ဒၟံၚ်မၞိဟ်မွဲဓဝ် တၞဟ်ခြာဒၟံၚ် ပ္ဍဲပရေၚ်မၞိဟ်တံ အရာတံဏံဒှ်တမ် မသ္ကဵုဇီုကပိုက်တဴစိုတ် ဇၞော်ကဵုဇြဟတ်မာန်ဂှ် ဂပ်ဝ်ဒးသောၚ်ကလး ဗွဲမဇြိုဟ်နက်ထေက်ရောၚ်ဂှ် ဒံက်တာဂျာရက်အာန် ညးကဵုကသပ်ပရေၚ်ထတ်ယုက်စိုတ် SOS ဟီုဂးလဝ်ရ။
ပ္ဍဲကဵုညးမချိုတ်အာ အကြာ ၁၀ သၞာံကဵု ၂၉ သၞာံ ပ္ဍဲကဵုသေန်ကာပေါဝ်ဂှ် ပရေၚ်ဂစိုတ်ဇကုဇကုဂှ် ဒှ်ဒၟံၚ်ဂၠိုၚ်အိုတ်တုဲ ပန်သၞာံအဆက်က် သၠုၚ်တိုန်ကၠုၚ်လဝ်ရ။ ပ္ဍဲကဵုသေန်ကာပေါဝ်ဂှ် ညံၚ်ရဴညးသၟတ်ဂမၠိုၚ်ကီု အကြာအာယုက် ၇၀ ကဵု ၇၉ တံဂှ်လေဝ် မၞိဟ်ဂစိုတ်ဇကုဇကုတံ သာဂၠိုၚ်ကၠုၚ်လဝ်ရ။
ပ္ဍဲကဵုသေန်ကာပေါဝ် မဒှ်ဍုၚ်သၠးဂဝ်အောန်အိုတ်မွဲဍုၚ် လ္တူဂၠးတိဏံဂှ် မၞိဟ်အာယုက်ဇၞော်ဇၞော်တံ ဂၠိုၚ်ကၠုၚ်ဒၟံၚ်တုဲ ပ္ဍဲကဵုကောန်ဍုၚ်သေန်ကာပေါဝ် ပန်တၠမ္ဂး မွဲတၠဝွံ ၆၅ သၞာံ ဟွံသေၚ်မ္ဂး ဇၞော်နူဏံတံ ဒှ်ဒၟံၚ်ရောၚ်ဂှ် တၚ်နၚ်ကံက်ကပှ်လဝ်ဂမၠိုၚ် ထ္မံက်ထ္ၜးလဝ်ရ။
နကဵုသၞောတ်ဗ္ၜတ်ဂၠးတိမ္ဂး လၟေၚ်သၞာံ အပံၚ်မၞိဟ် (၇) ကိုဋ်ပြၚ်ဝွံ ဟိုတ်နူပရေၚ်ဂစိုတ်ဇကုဇကုတုဲ ဒးချိုတ်ဒၟံၚ်ရောၚ်ဂှ် ဂကောံပရေၚ်ထတ်ယုက်ဂၠးတိ WHO ဟီုရ။
Ref: Bangkok Post
sanlontai