ပ္ဍဲကဵုသ္ဘၚ်ကဵုဒါန်သ္ပဒကာကျာ် က္ဍိုပ်သ္ကိုပ်ပၞာန်ဂှ် မၞိဟ်ပါလုပ်ဗပေၚ်ဇြဟတ်တံဂှ် ဒှ်သဘဴကဵုဇြဟတ်မၞိဟ်သမ္ဒိုဟ်တံရောၚ်ဂှ် တၠဂုဏ်အ္စာ မေန်သုည ဟီုမြော်

နေဗျဳဒဝ်၊ ဂျူလာၚ် (၁)

တၠကမၠောန်ပရေၚ်ပိုန်ဒြပ် မကဵုဒၟံၚ်ဒါန်ညးသ္ကအ် ပ္ဍဲကျာ်ပတိမာရုပ် မာရဝိဇာယ နေဗျဳဒဝ် နူကဵုက္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မဍဵုဍိုက်ပျဲပျာံဒၟံၚ် ညးဍုၚ်ကွာန်တံ နကဵုနဲကဲစုၚ်ဇဳ မပၠတရဴဒက်ပ္တန်လဝ်ဂှ်ဝွံ ဒှ်ရဲကဵုဇြဟတ် ကုမၞိဟ်သမ္ဒိုဟ်ရောၚ်ဂှ် တၠဂုဏ်အ္စာမေန်သုည နူတက္ကသိုလ်ဗုဒ္ဓ ဟီုမြော်လဝ်ရ။

တုဲကၠုၚ် ပ္ဍဲဂိတုဂျောန် (၂၉) တေံ ကော်ဘိက် တၠကမၠောန်ပရေၚ်ိပုန်ဒြပ်ကဆံၚ်လ္တူအပ္ဍဲဍုၚ်ဂမၠိုၚ်တုဲ စပ်ကဵုကျာ်ပတိမာရုပ် မက္တဵုဒှ်ကၠုၚ် သၠုၚ်အိုတ် လ္တူဂၠးတိဏံမာန်ဂှ်တုဲ အလဵုက္ဍိုပ်သ္ကိုပ်ပၞာန် သောၚ် ကလးတုဲဂှ် တၠကမၠောန်ပရေၚ်ပိုန်ဒြပ် ကၠုၚ်စိုပ် (၁၀၁) တၠဂှ် ကဵုလဝ်ဒါန်သြန် (၁၆) ဗဳလျာန်ပြၚ်ရောၚ် ထ္မံက်ထ္ၜးလဝ် ပ္ဍဲကဵုလိက်ပရိုၚ်တြးဝါဒတံရ။

က္ဍိုပ်သ္ကိုပ်ပၞာန်ဝွံ ပြဝဍေံမကၠောန်လဝ်ဂမၠိုၚ်ဂှ် ထ္ပက်အဇာ ကုကျာ်တုဲ ကၠောန်ဒၟံၚ်သွက်ဂွံဂြောပ်လဒဵုဂှ်ရ တုပ်တဴညံၚ်ရဴ ဂဝဵုဂဝိုက်ဒၟံၚ်ကုကျာ်တုဲ ညးမကဵုဒါန်ဂၠိုၚ်ကဵုဗဳလျာန်တံဝွံဂှ်လေဝ် ဒှ်ညးကလိလောန် ဒုဟ်ဇၞော်ဇၞော်တံရောၚ်ဂှ် သ္ဂးရ။

“တၠအဝဵုပၞာန်တံဂှ် ထ္ပက်အဇာ ကုကျာ်တုဲ ဒှ်ပွဂြောပ်လဒဵု ကုပြဝဍေံတံရောၚ် ကော်ခဴစရ။ ညအ်ဂှ် ဒှ်ပွသ္ပဒၞန်ရဏောၚ်၊ ဒးဟီုမွဲနဲပၠန်မ္ဂး ထပ်တုဲ ဂဝဵုဂဝိုက်ထောံပၠန်ရဏောၚ်။ အေ ဂှ်တှ်ေ တီမံၚ်ကၠောန် ဒၟံၚ်သာ်ဏံဖိုဟ်ဂှ် အာစိုပ်တုဲ ကဵုဒၟံၚ်ဒါန် ဂၠိုၚ်ကဵုဗဳလျာန်ဂှ်ဝွံ ကဵုဒၟံၚ်ဍာ် ကုတၞံဂျိရဏောၚ်၊ ညံၚ်မၞိဟ်ပရံ မၞိဟ်သမ္ဒိုဟ် ဂွံဂစိုတ်ဂၠိုၚ်ၚ်မာန် ညံၚ်ဂွံဒှ်ဇြဟတ်ဂှ် ကၠောန်လဝ်ဏောၚ်။ ပူဂဵုအာစိုပ်ကဵုဒါန်သာ် ဏံဂှ်လေဝ် ဒှ်ညးကလိလောန်ဒုဟ်ဇၞော်ဇၞော်တံရဏောၚ်” ဂှ် ဟီုမြော်လဝ်ရ။

ပ္ဍဲကဵုညးကဵုဒါန် ကုကျာ်က္ဍိုပ်သ္ကိုပ်ပၞာန်ဂမၠိုၚ် ညးဒးဒုၚ်ထ္မံက်ပ္တိတ်ကၠာအိုတ်ဂှ် ဥက္ကဌတိုက်သြန် CB ဥူခေန်မာၚ်အေ ဂှ် ကိုဋ် ၜါဠက်ၜါလ္ၚီဒ္ကေဝ်ပြၚ်၊ တၠကမ္ပဏဳဝေမာ ဥူကျေ ဂှ် ကိုဋ် ၜါဠက်ဒ္ကေဝ် ကေုာံ ကမ္ပဏဳဨဒေန် ဥူဝဏ္ဏခိုၚ်ဂှ် ကဵုလဝ်ဒါန် ကိုဋ် မွဲဠက်ဘာ်ဒ္ကေဝ်ရောၚ် ထ္မံက်ထ္ၜးလဝ်ရ။

သ္အာၚ်နူဂှ်ပၠန် တၠကမ္ပဏဳ ပရေၚ်ဆက်စၠောံ ATOM ဥူတုၚ်ဇြဝ်ဂှ် (၅၆၀၀) ကိုဋ်ဒ္ကေဝ်၊ တၠကမ္ပဏဳ Asia World ဥူထောန်မျေတ်နာၚ်ဂှ် (၅၀၀၀) ကိုဋ်ဒ္ကေဝ် ကေုာံ သီအဝဵုတုဲ ဒးဒုၚ်ရပ်တုဲ ဥူမာၚ်ဝုက် မကလေၚ်တိတ်ကၠုၚ်နူထံၚ်ဂှ် ကဵုလဝ်ဒါန် (၁) လ္ၚီကိုဋ်ဒ္ကေဝ်ရ။

က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မသ္ကိုပ်သ္ကလဝ် ပရေၚ်သီအဝဵုဂှ်ဝွံ ကၠောန်သ္ပဒၟံၚ် ပွမပ္တိုန်က္ဍိုၚ်ကျာ်စေတဳတံ၊ ကဵုတဆိပ်ကြာ ကုခမဳသၚ်ဂမၠိုၚ်တံဂှ်တုဲ ပ္ဍဲကဵုဍုၚ်ရုယှာဂှ်လေဝ် ဒက်ပ္တန်လဝ် ကျာ်စေတဳ ဗီုကျာ်လ္ဂုၚ် ကဵု ရုပ်ဗီု (သီတဂူဆရာတော်)တံရ။

က္ဍိုပ်သ္ကိုပ်ပၞာန် မကၠောန်ဒၟံၚ်ပြဝ ဒစဵုဒစးကဵုဓဝ်ကျာ်တုဲ ရပ်ဒက်ဂစိုတ်ညးဍုၚ်ကွာန်၊ စံၚ်ယတ်တုဲ သ္ပမာန်ဍဵုဍိုက်ဒၟံၚ်ဂှ် ဒက်ပ္တန်ကျာ်ဂှ်ဝွံ ဒှ်ၜိုတ်ထ္ၜးစရတုဲ မဒါန်သြန်ဂမၠိုၚ်ဝွံလေဝ် သွက်ဂွံဒှ်အထံက်အရီု တၠအဝဵုပၞာန်တုဲ ကၠောန်ၜိုတ်လဝ်ရောၚ်ဂှ် တၠဂုဏ်အ္စာ မေန်သုည ထပ်ဟီုမြော်လဝ်ရ။

“ ဒစဵုဒစး ဓဝ်ကျာ်တုဲ ဗီုမိက်ဂွံဂစိုတ်ဂှ်ဂစိုတ်၊ ဗီုမိက်ဂွံပလီုဂှ်ပလီု၊ ဗီုမိက်ဂွံစံၚ်ဂှ် စံၚ်တုဲတှ်ေ ဒက်ပ္တန်ထ္ၜးကျာ်စေတဳဟီုဂှ် ဒှ်ဆၜိုတ်ထ္ၜးစသက်က်ရ။ ဒှ်ဂၠံၚ်တရဴ ကျာ်တြဲကဵုဇြဟတ်ဟွံသေၚ်ပုဟ်။ သြန်ဂၠိုၚ်ကဵုဗဳလျာန် ခရိုဝ်နဳတံဟီုမ္ဂး ဝေၚ်ပါဲတၠအဝဵုပၞာန်တုဲ ကၠောန်ကလောန်ဟွံဂွံပုဟ်။ ကိတ်ဒၟံၚ် ကဵုဍေံတံမှ ဒှ်ဏောၚ်။ အေ ဂှ်တှ်ေ ပံၚ်တောဲကဵုတၠအဝဵုပၞာန်တုဲ ထ္ၜးဟိုတ်ကျာ်တုဲ သွက်တၠအဝဵုပၞာန် ဂွံရာန်လွဟ်ဂှ် ကၠောန်ထောံ သွက်ဂွံထံက် တၠအဝဵုပၞာန်ရဏောၚ်” သာ်ဝွံ ဟီုမြော်လဝ်ရ။

ကျာ်ပတိမာရုပ် မာရဝိဇယဂှ် ဖျေံပန္နက်ကၠောန်ဗဒှ်လဝ်အခန်ကၞာ အပ္ဍဲပွိုၚ်ဍုၚ်ဒက္ခိဏသဳရဳ တိဍာ်ကံၚ်ဇြဳနေဗျဳဒဝ် ပ္ဍဲလ္ဒေါဝ်သၞာံ ၂၀၂၀ သၞာံမကၠောန်ဗဒှ်လဝ်ပေါဲရုဲမာဲဂှ်တုဲ ကြဴနူသီအဝဵုတုဲဂှ် သၠုၚ်ပ္တိုန်လဝ်အသိၚ်ပရေၚ်ဒက်ပ္တန်တံ မွဲဒမြိပ်ဓဝ်ရ။

ကၠောန်သ္ပလဝ်သာ်ဏံဂှ်ဝွံ ပ္ဍဲကဵုကသပ်ကံၚ်ဇြဳပၞာန်ဒစးဒုၚ် သွက်ဂွံသီအဝဵုဂမၠိုၚ်ဂှ် ပါလုပ်နဒဒှ် မွဲမာန်ရောၚ် ညးသ္ၚဳဂၠိပ်တံ သ္ဂးရ။

ကြဴနူဒပ်ပၞာန်သီအဝဵု ဍုၚ်ဗၟာတုဲဂှ် ဂစိုတ်လဝ် ညးဍုၚ်ကွာန် (၃၇၀၀) ပြၚ်တုဲ သ္ၚိဒၟံၚ်စမြိုၚ် ညးဍုၚ်ကွာန် (၇၀၀၀၀) ပြၚ်ဂှ် ကံၚ်ဇြဳပၞာန် ပလီုပလာ်လဝ် နကဵုနဲကဲနာနာသာ်ရောၚ်ဂှ် ဂွံတီကေတ် အတိုၚ်တၚ်လလောၚ်တြး ဂကောံဗၠးၜးဂမၠိုၚ်ရ။

ပရိုၚ်−သြၚ်လောန်တိုၚ်(မ်)

ဗီု−MOI