ပ္ဍဲကျာ်ထဝ် ကောန်ဒပ်ကံၚ်ဇြဳပၞာန် ဒးဒုၚ်ဗတိုက်လဝ်တုဲ ပရေၚ်ဇီုကပိုက်ဒးချိုတ်လဝ် နွံ

ကျာ်ထဝ်၊ ဂျူလာၚ်(၄)

တွဵုရးဍုၚ်မန် ပ္ဍဲကွာန်အၚ်္ဂဗိုဝ်ကဵု ကွာန်တေဝ်ဖျူချောၚ် ပွိုၚ်ဍုၚ်ကျာ်ထဝ်ဂှ် ကောန်ဒပ်ကံၚ်ဇြဳပၞာန် ကေတ်ဒၟံၚ်ဂီုကၠီုဂှ် ဟိုတ်နူဒးဒုၚ်ဗတိုက်လဝ်တုဲ ပရေၚ်ဇီုကပိုက်ဒးချိုတ်လဝ် နွံရဂှ် ကဝ်မတဳကောပ်ကာဲကေၚ်ကာမိတ် KNU ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ပ္ဍဲဂိတုဂျူလာၚ် တုဲကၠုၚ် စၟတ်တ္ၚဲ (၂) အခိၚ်နူဂယး ၜိုတ်(၈)နာဍဳဂှ် ပ္ဍဲကွာန်အၚ်္ဂဗိုဝ်၊ ကောန်ဒပ်ကံၚ်ဇြဳပၞာန် ကၠုၚ်ဂေတ်ဒၟံၚ်ကၚ် ဗ္ဒာဲကၠအ်သဳဠဴခိုၚ်ယှိုဲသုၚ် ဇိုၚ်ဂၠံၚ်လဂုၚ်- မတ်မလီုဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ် လုပ်စိုပ် ကၠတ်ဗတိုက်လဝ်ရ။

ဟိုတ်နူပရေၚ်ပန်ပှ်ောဏံတုဲ ကောန်ဒပ်ပၞာန်တိုက်ကံၚ်ဇြဳပၞာန် ခမရ (၂၀၇) ကၠုၚ်ဂေတ်ဒၟံၚ်ကၚ်ဂှ် ဟွံအောန်နူ(၃)တၠ ဇီုကပိုက်ဒးချိုတ်လဝ် နွံမာန်ရဂှ် ဥက္ကဋ္ဌကောပ်ကာဲကေၚ်ကာမိတ် KNU ခရိုၚ်သဓီု သ္ကိုပ်ဗိုလ်သဝ်ကျဝ်မျေတ် ဟီုသ္ဂးလဝ်ရ။

မွဲအဆက်ဓဝ် ပ္ဍဲတ္ၚဲဂှ် အခိၚ်ဒေါဝ်တ္ၚဲ ၜိုတ် (၁) နာဍဳ သၞေဟ်ကၚ်စၟဳစၟတ်ဒဒန်ပသဲ ပ္ဍဲဗ္စပ်ကျာ်ထဝ်ကဵု ၜဳကလေၚ် ကွာန်တေဝ်ဖျူချောၚ်ဂှ် ဒပ်ပံၚ်ကောံ KNLA ထောံဖျေံလဝ်ဗုမ် ကဵုဒရုမ် (၁၄)မ ဗတိုက်လဝ်တုဲ ပရေၚ်လ္ပာ်ကံၚ်ဇြဳပၞာန် ဇီုကပိုက်ဒးချိုတ်လဝ် ၜိုန်နွံကီုလေဝ် ဆက်ဂၠိုက်ဂၠာဲဒၟံၚ် လၟိဟ်ဂၞန်ရဂှ် ဟီုသ္ဂးလဝ်ရ။

ကြဴနူကဵုကောန်ဒပ်ကံၚ်ဇြဳပၞာန် ဒးဒုၚ်ဗတိုက်လဝ်တုဲ တ္ၚဲဏံ ဂိတုဂျူလာၚ် စၟတ်တ္ၚဲ (၃) အခိၚ်နူဂယးဂှ် နူကဵုတံဒပ်ကံၚ်ဇြဳပၞာန် ဖျေံသ္ဇိုၚ်ကျာ်ထဝ် ဟိုတ်နူပန်ဖျေံလွဟ်ဇၞော် ပ္ဍဲလ္ပာ်ကွာန်သောၚ်နိုၚ်ဂျဳဂှ်ရ လကျာ်မွဲဇကု ဂွံလဝ်ဘဲဝပ်ရဂှ် ဂွံတီကေတ် နူညးဒေသတအ်ရ။

ပ္ဍဲပွိုၚ်ဍုၚ်ကျာ်ထဝ် KNU ဂှ် ပ္ဍဲဂိတုဏံ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် အကာဲအရာပရေၚ်ပၞာန်ၜါလ္ပာ် ကြံၚ်မ္ၚိုဟ်ကၠုၚ်ဒၟံၚ်ကီု ဟိုတ်နူလွဟ်ဇၞော်ကံၚ်ဇြဳပၞာန် ပန်ဖျေံလဝ်တုဲ ကောန်အရာပ်ညးဍုၚ်ကွာန်တအ် ဒးချိုတ်လဝ် နွံဒၟံၚ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – PDFသဓီု