တၞၚ်သဳ၊ ဂျူလာၚ် (၄)
ပ္ဍဲပွိုၚ်ဍုၚ်တၞၚ်သဳ ရးဒေသဇၞော်တၞၚ်သဳ မလလောၚ်တြးလဝ် ပရေၚ်အုပ်ဓုပ်ပၞာန်ဂှ် ပ္ဍဲဂိတုဂျူလာၚ် (၂) မွဲတ္ၚဲဓဝ်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံစဵုဒၞါဒေသတံ ပေါဲဗ္တိုက်က္တဵုဒှ်လဝ် ၅ ဝါရောၚ် ညးတာလျိုၚ် ဂကောံဒပ်ဒမၠုက်ဟွံဗက်လ္ပာ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူထ္ပက်ကၠုၚ်ကရောၚ်ပၞာန် အပ္ဍဲကွာန်တဂျက်တဝ် ခမရ (၅၆၁) ကံၚ်ဇြဳပၞာန် ဖျေံသ္ဇိုၚ်ညံၚ် ပေန်ကွေန်ဂှ်တုဲ ပေါဲဗ္တိုက်တံ က္တဵုဒှ်လဝ် လလအ်ဗ္ဒါဲမွဲတ္ၚဲရ။
ပေါဲဗ္တိုက်ဏံဝွံ မုက်ပၞာန်သၠဲတြးအာလဝ် စဵုကဵုကွာန်တဂျက်တဝ်၊ ကွာန်လၚု ကေုာံ ကွာန်ဒံၚ်ပုၚ်တံဂှ်တုဲ ပေါဲဗ္တိုက်ဆေၚ်မုက် က္တဵုဒှ်လဝ် (၅) ဝါတုဲ လ္ပာ်ကံၚ်ဇြဳပၞာန်ဂှ် ဟွံအောန်နူကဵု (၅) တၠ ဇီုကပိုက်ချိုတ်ဂျိုၚ်မာန်ရောၚ် သ္ဂးရ။
ဟိုတ်နူပေါဲဗ္တိုက်ၜါလ္ပာ်တုဲ ညးဒေသ ဂၠိုၚ်ကဵုကၠံ နူကဵုကွာန်တဂျက်တဝ်၊ လၚု ကေုာံ ဒံၚ်ပုၚ်တံကီု နူကဵုကွာန်ဗ္ဒါဲဗ္ဒါဲတံကီုဂှ် ဒးဂြိပ်ဒဴပါဲဒလေတ်ဒၟံၚ်ရ။
ဒဵုကဵုတ္ၚဲဏံ ဂိတုဂျူလာၚ် (၃) စဵုကဵုပယျာံဂယးဂှ် က္တဵုဒှ်လဝ် ပေါဲဗ္တိုက်ဟွံမွဲဏီကီုလေဝ် အကာဲအရာ ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်ရောၚ်ဂှ် ဂွံတီကေတ် နူကဵုဇရေၚ်ဂကောံဇြဟတ်ပၠန်ဂတးတံရ။
ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန်ဂှ် နူကဵုဂကောံဒပ်ပံၚ်ကောံ PDF ၊ ဂကောံဒပ်ဒမၠုက် ဟွံဗက် လ္ပာ် ကေုာံ တမ်ဒပ်ခရိုၚ်ဗိက် ၂ တံ ဗ္တိုက်လဝ်ရောၚ် မဒှ်ရ။
ပ္ဍဲကဵုပွိုၚ်ဍုၚ်တၞၚ်သဳဂှ် အပ္ဍဲအကြာတ္ၚဲတံဏံ လ္ပာ်ကံၚ်ဇြဳပၞာန် ဗပေၚ်ဇြဟတ်ဒပ်ပၞာန်တံတုဲ ထ္ပက်ကရောၚ်ပၞာန်တံ၊ ပလံၚ်ဗစိုပ်ဇွောံမတံဂှ် ကၠောန်သ္ပဒၟံၚ်အဆက်က်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−ဂကောံဒပ်ဒမၠုက်ဟွံဗက်လ္ပာ်
sanlontai