က္ၜၚ်ကံၚ် – ဂျူလာၚ်(၄)
ကြဴနူဗော် Move Forward ဇၞးကေတ်မာဲတုဲ အခိၚ်ပ္တိတ်ဒၟံၚ်ဇြဟ် သွက်ဂွံဒက်ပ္တန်အလဵုအသဳတၟိဂှ် ဨရာဇ်သေံ မဟာဝဇိရာလံၚ်ကောန် ကၠောန်ဗဒှ်လဝ် ပေါဲပံက်ပါလဳမာန်ရဂှ် ဌာန်ပရိုၚ်ရိုက်တာ ဓမံက်ထ္ၜးလဝ်ရ။
ကြဴနူဂွံဇၞးကေတ် အခန်ကဏ္ဍပါ်ပရအ် ဒၞာဲပရေၚ်က္ဍိုက်က္ဍိုပ်တုဲဂှ် ပံၚ်တောဲကဵုဗော်ဖွေထိုၚ် မၞိဟ်ဒးဂၞပ်ဂၠိုၚ် ပ္ဍဲပါလဳမာန်တုဲ ဗတိုက်သရိုဟ်လဝ် ဒပ်ပၞာန်ဝၚ်နန် ထိၚ်ဒဝ်လဝ်အလဵုအသဳ နူကဵုသီကေတ်လဝ်အဝဵု သၞာံ ၂၀၁၄ တေံ ကေုာံ ဗော်သ္ပလဝ်မဟာမိတ်တအ်ဂှ်ရ။
ဆဂးပ္ဍဲကဵုကောံဓရီုကၠတ်ထဝ်ဂှ် ဖွေထိုၚ်ကဵု Move Forward တအ်ဂှ် ဗော်လဵု က္လိဂွံကဆံၚ်ဌာနန္တရ ဥက္ကဋ္ဌကၠတ်ထဝ် မဒှ်ဒၞာဲပၟိက်ကိစ္စဇၞော် ပ္ဍဲအရာခၞံသၞောဝ် ကေုာံ အခိၚ်ကဵုမာဲသ္ဂုတ်သွာတ်အဓိကရောဂှ်မ္ဂး ဟွံဂွံတီကေတ်လဝ္ဏီရ။
နကဵုဗော်မဟာမိတ် (၈)ဗော်ဂှ်လေဝ် သွက်ဒၞာဲဥက္ကဋ္ဌကၠတ်ထဝ်ဂှ် အခိၚ်ခြာဟွံလအ်ဏံ ဂွံဆဵုညာတ်ကေတ် ပရေၚ်ဒကးပရးမာန်ရောၚ်ဂှ် ဌာန်ပရိုၚ်ရိုက်တာ ဓမံက်လဝ်ရ။
“စပ်ကဵုကိစ္စဏံ ဗော်ဖွေထိုၚ် အုပ်လဝ်နိဂီုတုဲ ပ္ဍဲအရာရုဲစှ်ဥက္ကဋ္ဌကၠတ်ထဝ် တ္ၚဲယးမ္ဂး တၚ်ပ္တဝ်က္ဍိုပ်ချိုတ်ပၠိုတ် နွံရ။ ပ္ဍဵုပ္ဍိုက်အာ ညးဍုၚ်ကွာန်တအ်ဟွံသေၚ်ပုဟ်” ဂှ် အမာတ်ကၠတ်ထဝ် ဗော်ဖွေထိုၚ် ဇြူတေန်ကလာန်သာန် ဟီုလဝ်ကဵု သၟာပရိုၚ်တအ်ရ။
သ္အာၚ်နူဂှ်ပၠန် အခိၚ်ရုဲစှ်အာစိုပ်ဒတုဲတုဲ သွက်ဥက္ကဋ္ဌ ကၠတ်ထဝ် ဂွံပံၚ်တောဲဖျေံအာသ္ဂုတ်သွာတ် သ္ကိုပ်ဝန်ဇၞော်မွဲတၠဂှ် ပ္တိုန်ဏာတၚ်ဂလာန် ပ္ဍဲကောံဓရီုကၠတ်ထဝ်ရောၚ်တုဲ နွံဒၟံၚ်ပၟိက်ကဵု မာဲထံက်ဂလာန် ကဝက်ဒၞာဲအမာတ် ကၠတ်ထဝ်ၜါတန် (၇၅၀)ပြၚ်ရဂှ် ဂွံတီကေတ်ရ။
ဂကောံမဟာမိတ်ဂှ် ညံၚ်က္ဍိုပ်သ္ကိုပ်ဗော် Move Forward ဂွံဒှ်ကၠုၚ်သ္ကိုပ်ဝန်ဇၞော် ထံက်ကဵုလဝ်လကြဴတုဲ ပ္ဍဲဂကောံမဟာမိတ်ဂှ် က္လိဂွံခုၚ် (၃၁၂)ဒၞာဲတုဲ သွက်ဌာနန္တရပဳတာ နွံဒၟံၚ်ပၟိက် မာဲ (၃၇၆)မာဲရဂှ် ဂွံတီကေတ်ရ။
အခိၚ်လၟုဟ်ဏံ က္ဍိုပ်သ္ကိုပ်ပဳတာဂှ် ပ္ဍဲလ္တူဗော်ပြိုၚ်ပ္ကာန်တအ် ဟွံသေၚ်မ္ဂး ပ္ဍဲလ္တူညးလုပ်ဂကောံ ကၠတ်ထဝ်လ္တူ ကောန်သာဗေတေတ်ခါန်ကၞက်လဝ် သၟဝ်ဒပ်ပၞာန် ကေုာံ လ္တူမူဝါဒလ္ၚဵုတအ်တုဲ နကဵုဗော်ညးတအ်ဂှ် ထပ်နွံဒၟံၚ်ပၟိက် မာဲရဂှ် ဂွံတီကေတ်ရ။
ဆဂးပဳတာဂှ် က္လိဂွံလဝ်ပရေၚ်ထံက်ဂလာန် ပ္ဍဲဇြဳနုက်ဍိုက်က်ပေၚ်ၚ်ရဂှ် ဟီုလဝ် ပ္ဍဲသတ္တာဟတုဲကၠုၚ်တေံရ။
Ref,Reuters
sanlontai