ဗ္ဒါဲသၞေဟ်ကၚ်ဗၠာဲသၟိၚ် ဒဒန်ၜါသွာၚ်ဂှ် ကောန်အရာပ်မွဲတၠ ဒးဒုၚ်ပန်ဂစိုတ်

ကျာ်မြဟ်၊ ဂျူလာၚ် (၄)

ဗ္ဒါဲသၞေဟ်ကၚ်ဗၠာဲသၟိၚ်ပရေၚ်ဂီုကၠီု ဒဒန်ၜါသွာၚ် မၞုံကွာန်ၜါသွာၚ် ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ် ကောန်အရာပ်မွဲတၠ ဒးဒုၚ်ပန်ဂစိုတ်လဝ်ကဵုသေနာတ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တုဲကၠုၚ် ပ္ဍဲဂိတုဂျူလာၚ် (၂) အခိၚ်နူဂယး ၜိုတ် (၁၁) နာဍဳဂှ် ဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ပံၚ်ကောံ PDF တံ ထောံလဝ်မခတိုဟ် (၂) မ နကဵုဒရုၚ် ဗ္ဒါဲသၞေဟ်ကၚ်ဗၠာဲသၟိၚ် ဒဒန်ၜါသွာၚ်တုဲ ဗ္တိုက်လဝ်ရ။

ကြဴနူသၞေဟ်ကၚ်ဂီုကၠီုဗၠာဲသၟိၚ် ဒးဒုၚ်ဗ္တိုက်တုဲဂှ် လ္ပာ်ကံၚ်ဇြဳပၞာန် ပန်ပှော်စမ်ၜတ်လဝ် နကဵုသေနာတ် ဟွံပိုတ်သ္ကုတ်ရ။

ဟိုတ်နူပရေၚ်ပန်ပှော်ဂှ်တုဲ ကိုဝ်ညုၚ်ဆာန် အာယုက် (၃၀) သၞာံ မဒှ်ကောန်ကွာန်ၜါသွာၚ် အာပလံၚ်အပါညး ပ္ဍဲကၠအ်ထၜိုတ်တုဲ ကလေၚ်စဴကၠုၚ်ဂှ်ဝွံ ဒးလွဟ်တုဲ ချိုတ်အာလဝ်ရ။

ဟိုတ်နူဗ္ဒိုပ်ကၚ်ဂီုကၠီုဗၠာဲသၟိၚ် ဒးဒုၚ်ဗ္တိုက်ဂှ်ရ လ္ပာ်ကံၚ်ဇြဳပၞာန် ကၟာတ်လဝ် ဒဒန်ၜါသွာၚ်ဂှ် လလအ်ပွိုၚ်မွဲနာဍဳပြၚ်တုဲ ၜိုတ်အခိၚ်ကလေၚ်မွဲနာဍဳဂှ် ကလေၚ်ပံက်ကဵုလဝ်ရောၚ် ဂွံတီကေတ်ရ။

ဆ္ဂး ပ္ဍဲဂိတုဂျူလာၚ် (၃) ဂှ် ပ္ဍဲဒဒန်ၜါသွာၚ်ဂှ် အာကၠုၚ်ဒၟံၚ် အတိုၚ်တြေံ နွံကီုလေဝ် ညးဒေသၜါသွာၚ်ဗွဲမဂၠိုၚ် တိတ်ကၠုၚ်အာမ္ၚး စဵုကဵုဟွံမွဲအောန်ကြဳဒၟံၚ်ရောၚ် ညးဒေသတံ ဟီုရ။

သၞာံတုဲကၠုၚ် ပ္ဍဲဂိတုနဝ်ဝေမ်ဗာ (၂၂) ဂှ်လေဝ် ဟိုတ်နူလုပ်စိုပ်ဗ္တိုက်လဝ် သၞေဟ်ကၚ်စၟဳစၟတ် ကေုာံ သၞေဟ်ကၚ်ဗၠာဲသၟိၚ်ၜါသွာၚ်တံဂှ်ရ ကောန်ပၞာန် ကေုာံ ဗၠာဲသၟိၚ် (၃) တၠ ချိုတ်တုဲ ကောန်ဒပ်ဗၠာဲသၟိၚ် (၄) တၠဂှ်လေဝ် ဂကောံဒပ်ပံၚ်ကောံ KNLA တံ ရပ်ဒက်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−Saw Dragon Drone Force