တၚ်ပံၚ်တောဲလလောၚ်တြးဂကောံကောဒေံပိဂကောံ လ္တူပရေၚ်ဓလိုက်တမ်ရိုဟ်ဍုၚ်နာနာတံဂှ် မုသ္ဂောံအဓိပ္ပာယ်သာ်လဵုရော

ကိုဝ်က၊ ဂျူလိုၚ်(၄)

ကုညးပထုဲပလီု လ္တူကိုန်စဳမာန်ကၠုၚ်စိုပ်ဓလိုက်တမ်ရိုဟ် နူဍုၚ်သ္အာၚ်တံဂှ် ကေတ်အာအရေဝ် ဗွဲမစိုပ်တရဴရောၚ် တၚ်ပံၚ်တောဲလလောၚ်တြးဂကောံကောဒေံ(၃)ဂကောံတံဂှ် ဒှ်သွက်ဂွံစဵုဒၞါ ကိုန်စဳမာန်ကြုက်တံကဵု သွက်ဂွံထ္မံက်ဗီုပြၚ် နဒဒှ်အလဵုအသဳဗွဲမလုပ်သၞောဝ်ရဂှ် ညးခါတ်အကာဲ ပရေၚ်ဍုၚ်ကွာန်တံ ပါ်ပါဲလဝ်ရ။

ပ္ဍဲတိဍာ်ထိၚ်ဒဝ်ကေုာံတိဍာ်ချဳဒရာၚ် မၞုံအပ္ဍဲဍုၚ်ဗၟာသ္ကုတ်သၟဝ်ကျာဂှ် ကေတ်အာအရေဝ် ကုညးက္လိလောန်ပွပကီုပရာပ်တံကဵု အမှုရာဇဝတ်တံရောၚ်ဂှ် ဂကောံရပ်လွဟ်ကောန်ဍုၚ်အရေၚ် မဟာမိတ်ကောံဒေံပိဂကောံတံ ပံၚ်တောဲလလောၚ်တြးလဝ် ပ္ဍဲဂိတုဂျူလိုၚ် စၟတ်တ္ၚဲ(၁)ဂှ်ရ။

ပ္ဍဲတၚ်လလောၚ်တြးမဟာမိတ်ပိဂကောံဂှ် ပရေၚ်ဗ္တိုက်ပလီု ပွပကီုပရာပ် ပ္ဍဲဒေသထိၚ်ဒဝ်ချဳဒရာၚ် ဇကုတံကဵု ကမၠောန်ပရေၚ်ဗ္တိုက်သ္အး လ္တူပွကလိလောန်အမှုရာဇဝတ်တံ ဇြဟတ်သ္ဂောံခိုဟ်ကၠုၚ်ဂှ် သွက်ဂွံရေၚ်တၠုၚ်အာ ကတိုၚ်ကတိုၚ်ကၟိုဟ်ဟ်မွဲစွံတုဲ ထ္မံက်ထ္ၜးလဝ် တၚ် (၈)တၚ်ရ။

အပ္ဍဲဂှ်ဂှ် ပရေၚ်ဒေသသ္ဂောံညိၚ်ဝတ်၊ ပရေၚ်ဂီုကၠီု ကေုာံ ကုညးက္လိလောန်ပွပကီုပရာပ် သ္ကဵုဇီုကပိုက်ကၠေံ လမျီု၊ဒြပ်ရတ်ပိုန်ဟာန်ညးတၞဟ်သ္အာၚ်မာန်တံဂှ် ဆလအ်မှလေဝ် ဟွံကဵုဇြဟတ်တုဲ တာဒၞါဗ္တိုက်သ္အးအာရောၚ်ဂှ် သ္ဂးလဝ်ရ။

ကုညးပထုဲပလီု လ္တူကိုန်စဳမာန် ကၠုၚ်စိုပ်ဓလိုက်တမ်ရိုဟ်နူဍုၚ်သ္အာၚ်တံဂှ် ကေတ်အာအရေဝ်ဗွဲမစိုပ် တရဴတုဲ ကုညးက္လိလောန်ဒုဟ်ဒဏ် မပ္တံကဵုပွကဵုပလာပ်ပထုဲ၊ ပွအာတ်သြန်လှုဲ လ္တူကုမ္ပဏဳဓလိုက် တမ်ရိုဟ် ဟွံသေၚ်မ္ဂး လ္တူပူဂိုလ်တံဂှ် ညးလဵုမွဲဟွံဟီု ကေတ်အရေဝ်ရေၚ်တၠုၚ်အာ အတိုၚ်သၞောဝ် ဥပဒေရောၚ်ဂှ် လလောၚ်ပ္တိတ်လဝ်ရ။

ညးလ္ၚတ်သ္ၚဳဂိၠပ်ပရေၚ်ဍုၚ်ကွာန် ဥူတာန်သဵုနာၚ်ဂှ်တှ်ေ တၚ်လလောၚ်တြးဏံဂှ် အဃောကၠောန်သ္ပမံၚ် ညံၚ်ပရေၚ်အုပ်ဓုပ် လ္တူပရေၚ်အုပ်ဓလီုဒေသကောဒေံပိဂကောံတံ ညံၚ်သ္ဂောံစှ်ေကဵုသၞောဝ်သၞောတ်ဂှ် ထ္မံက်ထ္ၜးလဝ်သွက်ဂွံစဵုဒၞါ ဂုဏ်ဖဵုပရေၚ်ပိုန်ဒြပ်ကြုက်ရဂှ် သ္ၚဳဂၠိပ်လဝ်ရ။

” ဒုၚ်ယၟုပရေၚ်ဓလိုက်တမ်ရိုဟ်ဍုၚ်သ္အာၚ်တုဲ ကၠောန်မံၚ်ပရေၚ်ကူသာန်သွံရာန်မၞိဟ်ပ္ဍဲဍုၚ်တံဂှ် ဟွံဆေၚ်စပ်ကဵုအလဵုအသဳကြုက်တံ တိုက်ရိုက်ကီုလေဝ် ဂကူကြုက်တံရ ကၠောန်မံၚ်အရာတံဏံဂှ်တှ်ေ ကိစ္စဗီုတံဏံဂှ်လေဝ် ဒှ်အဓိပ္ပာယ် ညးတံ ဗ္တိုက်ပလီုအာကီုရ။ ဂှ်တှ်ေ တၚ်လလောၚ်တြးဏံဂှ် နအလဵုကောဒေံပိဂကောံတံဂှ် သ္ပသဇိုၚ်ကဵုပရေၚ်အုပ်ဓလီုတိဍာ်ညးတံတုဲ အဟိန်ကၠောန်အာ ညံၚ်ပရေၚ်အုပ်ဓုပ် သာတုဲသ္ဂောံတေၚ်ဂြတ်စှ်ေကဵုသၞောဝ်သၞောတ်ဂှ် မွဲအခိၚ်ဓဝ် ထ္မံက်ထ္ၜးဆန္ဒမိက်ဂွံစဵုဒၞါ ဂုဏ်ဖဵုပရေၚ်ပိုန်ဒြပ်ကြုက်နွံရောၚ်ဂှ် အဲချိၚ်ခယျကေတ်ရ” ဂှ် ညးသ္ဂးရ။

အပ္ဍဲဍုၚ်ဗၟာ ပ္ဍဲဍုၚ်ထ္မံက်မံၚ်ရုပ်ရဴကိုန်စဳမာန်ကြုက်တံကဵု ပ္ဍဲဍုၚ်စဳဇန်လဝ် သ္ဇက်ဂွံထ္မံက်ရုပ်ရဴ ကိုန်စဳမာန် ဂၠံၚ်တရဴပရေၚ်ပိုန်ဒြပ်ကြုက်-ဗၟာ တံဂှ် ပရေၚ်ပေါဲဗ္တိုက်က္တဵုဒှ်တံ ယအ်စှ်ေအာကဝက်ပြၚ်ရဂှ် ISP Myanmar လလောၚ်တြးလဝ် ပ္ဍဲဂိတုဂျောန် စၟတ်တ္ၚဲ (၃၀)ဂှ်ရ။

ဂကောံမဟာမိတ်ကောဒေံပိဂကောံဂှ်တှ်ေ ကုညးကဵုမံၚ်ပွစဵုဒၞါ လ္တူညးက္လိလောန်ပွပကီုပရာပ်တံကဵု ညးက္လိလောန်ရာဇဝတ်ပၞာန်တံဂှ် ဗ္တိုက်ပလီုအာတုဲ ကုညးကၠောန်သ္ပမံၚ် ပရေၚ်ကူသာန်သွံရာန်မၞိဟ် တံကဵု စကာကမၠောန်ဗွဲအဓမ္မတံဂှ် ကေတ်အာအရေဝ်ဗွဲမစိုပ်တရဴရောၚ်ဂှ် သ္ဂးရ။

သ္အာၚ်နူဂှ်ပၠန် ဆဵုညးကလိလောန်မံၚ်ပွပကီုပရာပ်တံမ္ဂးလေဝ် ညံၚ်သ္ဂောံကဵုပရိုၚ်ဇရေၚ်ညးတံ ဗွဲမဂတာပ်အခိၚ်ဂှ် ဒုၚ်လဝ်ဂုဏ်တုဲ အိုဿီုကဵုကောန်ဍုၚ်ဗၟာတံကဵု ညးကဵုဇြဟတ်ထံက်ဂလာန် လ္တူဂကောံပၠန်ဂတးဇကုတံဂှ် သွက်ဂွံပံၚ်တောဲကၠောန်အာ ကမၠောန်ပရေၚ်ဗ္တိုက်ပလီု လ္တူညးက္လိ လောန်မံၚ် ပွပကီုပရာပ်ကဵုအမှုရာဇဝတ်တံ မွဲစွံဂှ်လေဝ် မဟာမိတ်ကောဒေံပိဂကောံတံ ဖ္တိုက်ဖ္အောဝ်လဝ်ရ။

ညးစိုန်သကီုပရေၚ်ကြုက် ဒံက်တာလှကျဝ်ဇြဝ်ဂှ်တှ်ေ ပ္ဍဲသ္ကုတ်သၟဝ်ကျာဂှ် ကောန်ဍုၚ်ကြုက်တံကဵု မၞိဟ်အပ္ဍဲဍုၚ်တံ ပံၚ်တောဲတုဲ လ္တူပွက္လိလောန်မံၚ် အမှုရာဇဝတ်ဂှ် အလဵုအသဳကြုက်တံ ကဵုဇြဟတ်ဂရိုဟ် ကဵုသောၚ်ကလးလဝ်တုဲ နကဵုကောဒေံပိဂကောံ ဒက်ပ္တန်လဝ်ပရေၚ်အုပ်ဓုပ်ဂှ် မိက်သ္ဂောံထ္မံက်ဗီုပြၚ် နဒဒှ်အလဵုအသဳ ဗွဲမလုပ်သၞောဝ်ရဂှ် သ္ၚဳဂၠိပ်လဝ်ရ။

“ပ္ဍဲဍုၚ်ဗၟာသ္ကုတ်သၟဝကျာဂှ် ဂိုဏ်နူဍုၚ်ကြုက်တံ ယှုက်ကွေံကွေံရ။ အေဂိုဏ်တံဏံကဵု မၞိဟ်ပ္ဍဲဍုၚ်ဗၟာ တံပံၚ်တုဲ လ္ၚဵုတံထေၚ်ဂှ်ေ ကဵုဂကောံညးတံ(ကောဒေံပိဂကောံ) ပံၚ်ကဵုကြုက်တုဲကၠောန်ရဂှ် ထၚ်ခယျစအိုတ်ရ။ ညးတံ ဟွံပါပ္ဍဲဏံပုဟ်ဂှ် ညးတံမိက်ဂွံဟီုရ။ တုဲပၠန် ဍုၚ်ကြုက်(အလဵုအသဳ)တံ ကဵုဇြဟတ်ဂရိုဟ်ကဵုညးတံလေဝ်ပါရ။ဖျေံသ္ဇိုၚ်ဇရေၚ်ညးတံတုဲ ယှုက်မံၚ်မွဲဂအုံရ။ ဂှ်တှ်ေ ဍုၚ်ဗၟာ သ္ကုတ်သၟဝ်ကျာဂှ် ယၟုလီုကွေံကွေံရ။ ပ္ဍဲဒေသဂှ် ပံၚ်တောဲကဵုဂိုဏ်ကြုက်တံတုဲ ကၠောန်မံၚ်ဟီုဂှ် ပ္ဍဲဍုၚ်ကြုက်လေဝ်ယၟုလီု၊ ပ္ဍဲဍုၚ်နာနာလေဝ် လီုရ။ ရံၚ်ကေတ်တှ်ေ မိက်ဂွံထိၚ်လေဝ်ဒှ်ရ။ ပ္ဍဲဒေသတံ ဏံ ညးတံ(ကောဒေံပိဂကောံ) ဒက်ပ္တန်လဝ်ပရေၚ်အုပ်ဓုပ်တုဲ ညးတံဟေၚ် ဒှ်အလဵုအသဳလုပ်သၞောဝ်ဂှ် မိက်ဂွံထ္မံက်ဗီုပြၚ်လေဝ် ပါကီုရ”ဂှ်လေဝ် သ္ဂးရ။

ဍုၚ်ဗၟာသ္ကုတ်သၟဝ်ကျာ ဂကောံရပ်လွဟ်ကောန်ဍုၚ်အရေၚ်တံဒိၚ်ဒဝ်လဝ် ပ္ဍဲဒေသပယျဵု ကြုက်-ဗၟာဂှ် ကမၠောန်ကာဇြဳနို ဝေၚ်ၛေၚ်ဟွံလုပ်သၞောဝ်တံ အုပ်ဓလီုမံၚ်တုဲ ပရေၚ်ကူသာန်သွံရာန်မၞိဟ်ကဵု ပရေၚ်လီဠာန်လ္တူလပှ်ကျာတံလေဝ် ဇၞော်သၠုၚ်ကၠုၚ်မံၚ်ရ။

တိဍာ် မဟာမိတ်ကောဒေံပိဂကောံ ဒပ်ပၞာန်ရခေၚ် (AA)၊ ဒပ်ပၞာန်ဗၠးၜးကောန်ဂကူတအာၚ်(ပလံၚ်) (TNLA) တံကဵု ဒပ်မဟာမိတ် ဒဳမိုကရေတ်တေတ်ကောန်ဂကူ ဂကောံကိုဝ်က (MNDAA)တံ ထိၚ်ဒဝ်ချဳဒရာၚ်မံၚ်ဂှ် ဆက်စပ်မံၚ်ကဵု ဍုၚ်ဇိုၚ်ဝုတ်ဒိုဟ်ကြုက်တုဲ ပရေၚ်ဆက်ဆောံခိုဟ်တံနွံမံၚ်ရ။

နကဵုသြၚ်လောန်တိုၚ်မ် ဆေၚ်စပ်ကဵုတၚ်ပံၚ်တောဲလလောၚ်တြးဂကောံကောဒံပိဂကောံတံတုဲ ၜိုန်ရဆက်စၠောံလဝ်ကဵု သ္ကိုပ်ဗိုလ်ဇၞော် နူဒပ်ပၞာန်ဗၠးၜးကောန်ဂကူတအာၚ်(ပလံၚ်) (TNLA) မာၚ်အိုက်ကျဝ်ဂှ် ဟွံအောန်နူကဵုပိဝါကီုလေဝ် ဒုၚ်တဲသှ်ကဵုလဝ်ဟွံမွဲရ။

တုဲကၠုၚ်ပ္ဍဲဂိတုဂျောန်လ္ပာ်မံက်တေံဂှ်လေဝ် ဟိုတ်နူကြုက်လုပ်ပ္ညဳပ္ညပ်အကြာတုဲ မဟာမိတ်ကောဒေံ ပိဂကောံကဵု ကဝ်မတဳသဳကၠဳပရေၚ်ၜိုဟ်လလမ်ကံၚ်ဇြဳပၞာန် (NSPNC)တံ ဆဵုဂဗလဝ်ညးသ္ကအ် ပ္ဍဲတွဵုရးသေံသ္ကုတ်ဗၟံက် ဒေသတၟေၚ် (၄)ဂှ်ကီုလေဝ် ဟွံဂွံသွဟ်မွဲသာ် ပေါဲသဳကၠဳ လီုအာလဝ်ဏီရ။

ပရိုၚ်-သြၚ်လောန်တိုၚ်မ်

ဗီု- Mongla News