ကြဴနူအဓိကိုရ် အလုံဍုၚ်မွဲ က္တဵုဒှ်တြဴဝါတုဲဂှ် သမ္မတပြၚ်သေတ် မာခရောန် ဆဵုဂဗကဵု မြုဝန်ဍုၚ် ၂၂၀ တၠဏောၚ်

ပါရေတ်၊ ဂျူလာၚ် (၄)

သမ္မတပြၚ်သေတ် အဳမာန်နျူရာမာခရောန်ဝွံ ကြဴနူနာဟေဝ်အာမ် အာယုက် ၁၇ သၞာံချိုတ်တုဲဂှ် ပ္ဍဲဂိတုဂျူလာၚ် (၄) ဏံ ဆဵုဂဗအာကဵု မြုဝန်ဍုၚ် (၂၂၀) တၠ နူကဵုဍုၚ်မဒးဂဗလဝ် အဓိကိုရ် မက္တဵုဒှ်လဝ် နမတ်တံဏောၚ်ဂှ် ဌာန်ပရိုၚ် France 24 ထ္မံက်ထ္ၜးလဝ်ရ။

လောန်ကၠုၚ် (၅) တ္ၚဲတေံ ဝန်ဇၞော်ကာအပ္ဍဲဍုၚ် မဂ္စါန်ဒၟံၚ် သွက်ဂွံလၞိန်ဗပိန် ပရေၚ်ကလိုက်ကၟဵု မက္တဵုဒှ်လဝ် ပ္ဍဲဍုၚ်ဇၞော်တံဂှ် လလောၚ်တြးလဝ် (၃) တ္ၚဲအဆက်က် တြးအာဒပ် ဗၠာဲသၟိၚ် ကေုာံ သၞာဲဒဴဗၠာဲသၟိၚ် (၄၅၀၀၀) ဏောၚ် မဒှ်ရ။

ညးသၟတ် အာယုက် (၁၇) သၞာံ မၞုံယၟု နာဟေဝ်အာမ်ဂှ်ဝွံ ပ္ဍဲတ္ၚဲအၚါ အခိၚ်နူဂယးတေံ ပ္ဍဲကဵုဍုၚ်ပါရဳ အရာပ်ဇိုၚ်ဇဵုဍုၚ် နာန်တာရဳဂှ် ဒးဒုၚ်ပန်ဂစိုတ်လဝ် ကဵုသၞာဲဒဴဗၠာဲသၟိၚ်မွဲတၠတုဲ ညးဝွံ ဒဳလဝ်ကွဳစက်မာသဳဒဳ အရံၚ်ဍာ်မိတ်တုဲ ဟိုတ်နူဖံက်ပ္ကဝ်လဝ်စေဝ်ပၞောန်ဂၠံၚ်ရောၚ်ဂှ် သ္ဂးရ။

နာဟေဝ်အာမ်ဝွံ အခိၚ်ဒဳဒၟံၚ်ကွဳစက်ညးဂှ် ဒးဒုၚ်ပန်ဂစိုတ်လဝ်ကဵုသေနာတ်ရောၚ် ၜိုန်ရဗၠာဲသၟိၚ်တံ ကဵုလဝ်ပရိုၚ်ကၠာတဲကီုလေဝ် ဝဳဒဳယော မတက်လဝ်ပရူဒဒှ်ဏံဂှ်ဝွံ ပြးထၞာန်အာ လ္တူသဵုယှေဝ်မဳဒဳယာ ဗွဲမမြက်ဇက်တုဲ ဗွဲကြဴ ဒဒှ်ရဍာံဇေတ်ဂှ် နူကဵု AFP သ္ပဒတန်လဝ်ရ။

ပ္ဍဲကဵုဝဳဒဳယောသ္ကုတ်ဂှ် ကောန်ဒပ်ဗၠာဲသၟိၚ်ၜါတၠဝွံ ဗျာံလဝ်သေနာတ် ကုမၞိဟ်နွံဒၟံၚ်ပ္ဍဲကွဳစက်ဂှ်တုဲ သီုကဵုဟီုဂးလဝ် “ပ္ဍဲက္ဍဟ်ဗှ်ေ ဒးအာမကမ်မာန်ဏောၚ်” ဂှ်တုဲ ကွဳစက်ဂှ် ဒဳတိတ်အာ လွာဲဂှ်ရ။ အခိၚ်ဒဳတိတ်အာလွာဲဂှ် သာ်ဏံဂှ်ရ သၞာဲဒဴဗၠာဲသၟိၚ်ဂှ် စပန်ပှော်လဝ်တုဲ ကွဳစက်ဝွံ ဒေါအ်ဒေၚ်အာသိုက်က် မဒှ်ရ။

ပရူဒဒှ်ဏံဝွံ သ္ကဵုက္တဵုဒှ်လဝ် ကလိုက်ကၟဵု အလုံဍုၚ်ပြၚ်သေတ် သီုဍုၚ်ဇၞော် ဍုၚ်ဍောတ်တံဂှ်တုဲ အကြာညးထ္ၜးဆန္ဒတံကဵု ကောန်ဂကောံဒပ်ဗၠာဲသၟိၚ်တံဂှ် ပရေၚ်ဆေၚ်မုက်ဒိဓဗတ်တံ က္တဵုဒှ်လဝ် အဆက်က်ရ။

Ref: France 24