ဆက်စပ်ဒၟံၚ်ကဵု PDF တအ်ဂးတုဲ ကောန်ကွာန်နှေဟ်ခြေၚ် (၁၅)တၠ ဒးဒုၚ်ရပ်လဝ်

ရေဝ်၊ ဂျူလာၚ်(၅)

တွဵုရးဍုၚ်မန် ပွိုၚ်ဍုၚ်ရေဝ် ပ္ဍဲကွာန်နှေဟ်ခြေၚ်ဂှ် ဒပ်ကံၚ်ဇြဳပၞာန် ရပ်ကေတ်လဝ်ကောန်အရာပ်ညးဍုၚ်ကွာန် (၁၅)တၠ နကဵုတၚ်စောတ်စောဲ ဆက်စပ်ဒၟံၚ်ကဵု ဒပ်စဵုဒၞာညးဍုၚ်ကွာန် PDF တအ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ကြဴနူဗဒိုပ်ဗၠာဲသၟိၚ်နှေဟ်ခြေၚ်ဒးဒုၚ်တေိုက်လဝ်တုဲဂှ် ဒပ်ကံၚ်ဇြဳပၞာန် ကၠုၚ်ဖျေံလဝ်ဗဒိုပ် ပ္ဍဲဘာလကျာ် ကွာန်နှေဟ်ခြေၚ်ဂှ် ရပ်ကေတ်ဒၟံၚ်ညးဒေသတအ် ခြာကဵုတ္ၚဲရ။

ညးဒးဒုၚ်ရပ်လဝ်တအ်ဂှ် ဒှ်ညးအာယုက် အကြာ ၂၀ ကဵု ၄၀ မၞိဟ်တြုံ (၁၂)တၠ ကေုာံ သၟတ်ညးဗြဴတအ်တုဲ ညးတအ်ဂှ် ဒှ်ကောန်ကွာန်သာမည ကၠောန်ဒၟံၚ်ကၠအ် ပရေၚ်လွဳလွတ်ရဂှ် ဂွံတီကေတ်ရ၊

ညးဒးဒုၚ်ရပ်လဝ်လ္ၚဵုဂှ်မ္ဂး ဒပ်ကံၚ်ဇြဳပၞာန် ရပ်ဒက်လဝ် ပ္ဍဲဘာလကျာ်နှေဟ်ခြေၚ်တုဲ ကောန်ကွာန်မ္ၚးနူဂှ် လ္ၚဵုတအ်မ္ဂး ပလံၚ်ဗစိုပ်လဝ် ပ္ဍဲဗဒိုပ်ဗၠာဲသၟိၚ်ၝောံဍုၚ် ဇြပ်ဗုရ။

ပ္ဍဲကဵုဂှ် ဂကောံသ္ၚိကၟိန် ညးဒးဒုၚ်ရပ်လဝ် ပ္ဍဲကွာန်တအ်ဂှ် ဂွံဒၟံၚ်အခေါၚ်ပလံၚ်ပုၚ်သွ ဟွံဂွံအခေါၚ်ဆဵုဂဗနမၞိဟ်တုဲ ဂကောံသ္ၚိကၟိန် ညးဒးဒုၚ်ရပ်လဝ် ပ္ဍဲဗဒိုပ်ဗၠာဲသၟိၚ်ဂှ်မ္ဂး ဟွံဂွံအခေါၚ်ဆဵုဂဗကဵု ဂကောံကၟိန်အိၚ်ထံၚ်ညးတအ်ရဂှ် ညးဒေသမွဲတၠဟီုသ္ဂးဝ်ရ။

ဒပ်ကံၚ်ဇြဳပၞာန် ဖျေံလဝ်ဗဒိုပ်ပ္ဍဲကွာန်နှေဟ်ခြေၚ်တုဲ ဟိုတ်နူရပ်ဒက်ဒၟံၚ် ညးဒေသတအ်ဂှ်ရ ညးဒေသၜိုတ်ကဝက်ပြၚ် ဒးဂြိပ်ဒဴပါဲဓလေတ်ဒၟံၚ်တုဲ ဗွဲမဂၠိုၚ်မ္ဂး ပြံၚ်အာမံၚ်ဒၟံၚ် လ္တူဍုၚ်ရေဝ် ကေုာံမတ်မလီုတအ် နွံဒၟံၚ်ရ။

ပ္ဍဲဂိတုဂျောန် စၟတ်တ္ၚဲ (၂၅)တုဲကၠုၚ်တေံဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA လုပ်စိုပ်ဗတိုက်လဝ် ဒပ်ပၞာန် ကေုာံဗၠာဲသၟိၚ် ဖျေံလဝ်ဗဒိုပ် ပ္ဍဲဗဒိုပ်ဗၠာဲသၟိၚ် နှေဟ်ခြေၚ်ဂှ် ဗၠာဲသၟိၚ် (၁) တၠ ဒးချိုတ်လဝ်တုဲ ကောန်ပၞာန်ဒးလဝ်ဘဲဝပ် နွံ(၁)တၠရ။

ပရိုၚ်-သြၚ်လောန်တိုၚ်(မ်)

ဗီုရုပ်-Myo Thet