ဟိုတ်နူသၞေဟ်ကၚ်ရုၚ်စက်စက္ခူ သေတ်တောၚ် တုၚ်ဇြယာတ် ဒးဒုၚ်ဗတိုက်တုဲ ကောန်ဒပ်ကံၚ်ဇြဳပၞာန် ချိုတ် (၂) တၠ

တုၚ်ဇြယာတ်၊ ဂျူလာၚ်(၅)

တွဵုရးဍုၚ်မန် ပွိုၚ်ဍုၚ်ကျာ်ထဝ် ကောန်ဒပ်ကံၚ်ဇြဳပၞာန် ကေတ်ဒၟံၚ်ဂီုကၠီု ပ္ဍဲသၞေဟ်ကၚ်ရုၚ်စက်စက္ခူ သေတ်တောၚ် ဍုၚ်တုၚ်ဇြယာတ်ဂှ် ဟိုတ်နူဒးဒုၚ်ဗတိုက်လဝ်တုဲ ဒးချိုတ်(၂) တၠ ဂွံလဝ်ဘဲ(၁) တၠရဂှ် ညးတာလျိုၚ် PDF ခရိုၚ်သဓီု ဟီုကဵု ဌာန်ပရိုၚ်သြၚန်လောန်တိုၚ်(မ်)ရ။

မ္ၚးနူကောန်ဒပ်ကံၚ်ဇြဳပၞာန်တုဲ ဇြဟတ်ပၞာန်ညးဍုၚ်ကွာန် မၞုံဗ္ဒာဲ (၁၀) တၠ ကေတ်ဒၟံၚ်ဂီုကၠီု သၞေဟ်ကၚ် စၟဳစၟတ်ဂှ် ပ္ဍဲဂိတုဂျူလာၚ် စၟတ်တ္ၚဲ (၃) အခိၚ်ၜိုတ် ၁၀ နာဍဳဂှ် ဒပ်ပံၚ်ကောံ ဒပ်စဵုဒၞာညးဍုၚ်ကွာန် PDF တအ် လုပ်စိုပ်ဗတိုက်လဝ်ရ၊

ဟိုတ်နူပရေၚ်ဗတိုက်ဏံတုဲ ပရေၚ်ပန်ပှော်ၜါလ္ပာ် က္တဵုဒှ်လဝ် ပွိုၚ်ဗ္ဒာဲ (၁၀) မိနေတ်တုဲ ကောန်ဒပ်ကံၚ် ဇြဳပၞာန် ဒးချိုတ်လဝ် (၂) တၠ ညးလုပ်ဂကောံ ပၞာန်ညးဍုၚ်ကွာန် ဂွံလဝ်ဘဲဝပ် (၁) တၠရ။

ပရေၚ်ပန်ပှ်ောၜါလ္ပာ်ဒှ်လဝ်တုဲဂှ် နူဒပ်အမၠံက်ကံၚ်ဇြဳပၞာန် စၟတ် (၃၁၀) ဖျေံသ္ဇိုၚ်တုၚ်ဇြယာတ် ပန်ဖျေံနၚ်လွဟ်ဇၞော် ပ္ဍဲကွာန် မၞုံတိဍာ်ထိၚ်ဒဝ် KNU ဒပ်မဟာ (၁)ရ။

ကောန်ဒပ်ကံၚ်ဇြဳပၞာန် ကေတ်လဝ်ဂီုကၠီု ပ္ဍဲသၞေဟ်ကၚ်ရုၚ်စက်စက္ခူ သေတ်တောၚ်ဂှ် အာတ်မိက်ဒၟံၚ် သြန် ညးဍုၚ်ကွာန် အာတရဴတအ်ကီု သီုၜုၚ်တက် နွံဒၟံၚ်ရဂှ် ညးတာလျိုၚ် PDF ခရိုၚ်သဓီု ကိုဝ်ဨမေန်ထောန်ဟီုသ္ဂးလဝ်ရ။

တ္ၚဲဂှ် အခိၚ်နူဂယးၜိုတ် (၇) နာဍဳဂှ်လေဝ် ကောန်ဒပ်ကံၚ်ဇြဳပၞာန် မၚ်ဒၟံၚ်တိုၚ်တာဝါမိုၚ်တေဝ် ပ္ဍဲကွာန်အၚ်္ဂဘိုဝ်ဂှ်လေဝ် ဒးဒုၚ်ဗတိုက်ထောံဖျေံလဝ်ဗုမ် နကဵုဒရုမ်တုဲ မၞိဟ်ဇီုကပိုက်ဒးလဝ် နွံဒၟံၚ်ရဂှ် သ္ဂးလဝ်ရ။

ပ္ဍဲအကံက်တေဝ်လဳဂရာမ်ဠဝ်ဗဳဒပ်ပၞာန်ဂှ်မ္ဂး ၜိုန်ရ ရုၚ်စက်စက္ခူ သေတ်တောၚ် ဒးဒုၚ်ဗတိုက်လဝ် ကီုလေဝ် လ္ပာ်ဍေံတအ် ပရေၚ်ဇီုကပိုက်ဒးလဝ်ဟၟဲရဂှ် ပရေၚ်တြးဒၟံၚ်ဝါဒနွံရ။

ပွိုၚ်ဍုၚ်ကျာ်ထဝ်ဂှ် ဒှ်ဒေသ ဂကောံဇြဟတ်ပၠန်ဂတးတအ် ဇြဟတ်ခိုဟ်ဒၟံၚ်မွဲဒေသတုဲ ပရေၚ်ဆေၚ် မုက်ပန်ပှ်ောကဵု ဒပ်ကံၚ်ဇြဳပၞာန် က္တဵုဒှ်ဒၟံၚ် ခြာဟွံလအ်ဟွံလအ်နွံရ။

ပရိုၚ်-သြၚ်လောန်တိုၚ်(မ်)

ဗီုရုပ်-CJ