ဒဳမအ်ဇြော – ဂျူလာၚ်(၅)
တွဵုရးကရေၚ်ဍာဲ၊ ဗဒိုပ်ပါဲပၞာန်လိုဝ်ပူ သ္ကုတ်ပလိုတ်ဒဳမအ်ဇြောဂှ် ဟိုတ်နူလ္ပာ်ကံၚ်ဇြဳပၞာန် ကၠုၚ်ဂြာတ်ထောံဖျေံလဝ် ဗုမ်ကဵုက္ၜၚ်ကျာတုဲ ညးဒေသ (၃)တၠ ဇီုကပိုက်ဒးလဝ်ဘဲဝပ်ရဂှ် ညးရီုဗၚ်ကဵုဒၟံၚ် ညးပါဲဘဲပၞာန်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
တ္ၚဲဏံ ဂိတုဂျူလာၚ် စၟတ်တ္ၚဲ (၄) အခိၚ်နူဂယး ၜိုတ်(၂)နာဍဳဂှ် က္ၜၚ်ကျာကံၚ်ဇြဳပၞာန် ပဝ်ကၠုၚ် ၜိုတ်(၃)ဝါတုဲဂှ် ဟိုတ်နူပန်ပှော်လဝ်ဂှ်ရ ဗဒိုပ်ပါဲပၞာန်ကဵု ဘာဗ္တောန်လိက်တအ် ဒးလီုလာ်လဝ်ရ။
ဒပ်ကံၚ်ဇြဳပၞာန်ဂှ် သ္ပတံနူတ္ၚဲတုဲကၠုၚ်တေံတုဲ ပ္တဝ်လဝ်ကဵုကောန်အရာပ် ပ္ဍဲတွဵုရးကရေၚ်ဍာဲ ပန်ပှော်ဒၟံၚ် ဂှ်ရ ပၠုပ်ဒၟံၚ်စိုတ်ဖေက်ကောန်အရာပ်တအ်ရဂှ် ညးအုပ်ကာကံၚ်ဇြဳပရေၚ်အုပ်ဓုပ် တွဵုရးကရေၚ်ဍာဲ ကာလအကြာ ဥူဗညာ ဟီုသ္ဂးလဝ်ရ။
“ဍေံတအ်ဂှ်တှ်ေ ပြိုက်ပၠုပ်ဒၟံၚ် စိုတ်ဖေက် အကြာညးဍုၚ်ကွာန်တအ်လၟိုန်ရ။ ပ္ဍဲကဵုဨရိယာ ဍေံတအ်ထိၚ်ဒဝ်ဟွံမာန်ဂှ်လေဝ် ညံၚ်ညးဍုၚ်ကွာန်တအ် မံၚ်ဟွံဂွံဂှ် ပရေၚ်မၞိဟ် ပရေၚ်ပိုန်ဒြပ် ဗွဲတၟေၚ်တှ်ေ ဘာတအ် ပရေၚ်ပညာတအ် ရုၚ်ဂဥုဲတအ်ညံၚ်ပ္တန်ဟွံဂွံမာန် ဗီုပြၚ်ကဵုဇြဟတ်ဒရိုဟ် ညံၚ်ညးဍုၚ်ကွာန်တအ် ဂွံစိုပ်အာကရေပ်၊ ဒှ်ဗီုပြၚ်ဍဵုဍိုက်ဒၟံၚ်ကဵု စိုတ်ဖေက်ရ”ဂှ် ညးဟီုသ္ဂးလဝ်ရ။
ဗဒိုပ်ပါဲပၞာန်လိုဝ်ပူ လ္ပာ်ကံၚ်ဇြဳပၞာန် ဂြာတ်ထောံဖျေံလဝ်ဗုမ် တ္ၚဲဏံအခိၚ်နူဂယးပြဟ်ဂှ် ဒှ်ဗဒိုပ်ပံက်လဝ် ပ္ဍဲသၞာံ ၂၀၂၂ တုဲ ပ္ဍဲကဵုဗဒိုပ်ဂှ် နွံဒၟံၚ်(၇)ဒကုတ်တုဲ အောန်အိုတ် မၞိဟ် (၂၀၀၀)ပြၚ် နွံဒၟံၚ်ရဂှ် ဂွံတီကေတ်ရ။
ပ္ဍဲဂိတုဂျောန်တုဲကၠုၚ်တေံလေဝ် ဟိုတ်နူကံၚ်ဇြဳပၞာန် ဂြာတ်ထောံဖျေံလဝ်ဗုမ် ပ္ဍဲကွာန်သ္ကုတ်ပလိုတ် ဖရူဇြောပိကွာန် ကဵုက္ၜၚ်ကျာတုဲ ဘာဗ္တောန်လိက် ပ္ဍဲမွဲဗွိုၚ်ဗဒိုပ်ပါဲပၞာန်ဂှ် ဒးကၟာတ်လဝ်တုဲ ဟိုတ်နူဂြာတ် ထောံဖျေံလဝ်ဗုမ် ပ္ဍဲကွာန်ဝါမ်အောၚ် ပွိုၚ်ဍုၚ်ဖာသောၚ်တုဲ ညးတြုံမွဲတၠ ဇီုကပိုက်ဒးလဝ်လွဟ်ဇၞော်တုဲ ဒးချိုတ်အာလဝ်ရ။
ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ သ္ကုတ်လကြဴဏံ ဟိုတ်နူပရေၚ်ဗတိုက်ကဵုပၞာန်ကျာဂှ် ညးဍုၚ်ကွာန် (၇၀၀)ပြၚ် ဒးချိုတ်လဝ်ရဂှ် ဂကောံဗၠးၜးတအ် လလောၚ်တြးလဝ်တုဲ အလဵုအသဳ NUG ဗ္ဂပ်ဖျပ်ကဵု လွဟ်ပန်က္ၜၚ်ကျာဟွံမာန်ဂှ်လေဝ် ပရေၚ်ဟီုဂးပါ်ပါဲ သၠုၚ်တိုန်ဒၟံၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ
sanlontai