မတ်မလီု၊ ဂျူလာၚ် (၅)
ဒဒန်ဂျုၚ်အုက်ၜဳကလေၚ် လ္တူဂၠံၚ်ကွဳစက်လ္ဂုၚ်−မတ်မလီု မဒးဒုၚ်ဖံက်ဗ္တိုဟ်မာၚ်ပလီုပလာ်လဝ်ဂှ် ၜိုန်ရပလေဝ်ပလေတ်လဝ် သွက်ဂွံထ္ပက်ဒဒန် ဘေလဳယာယဳကီုလေဝ် လ္ပာ်ဒပ်ပၞာန်တံ ဟိုတ်နူကဵု ပရေၚ်ဂီုကၠီုဟွံမာန်ဂှ်ရ ပလေဝ်ပလေတ်ဟွံမာန်ဏီပုဟ်ဂှ် ညးတာလျိုၚ် ရုၚ်အလဵုအသဳတွဵုရးဍုၚ်မန် ကံၚ်ဇြဳပၞာန် ဟွံထ္မံက်ယၟုမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒဒန်ဂျုၚ်အုက် လ္တူဂၠံၚ်ကွဳစက် လ္ဂုၚ်−မတ်မလီု ဗ္ဒါဲကွာန်ယှိုဲယံၚ်ပျ အကြာပွိုၚ်ဍုၚ်သဓီုကဵု ပွိုၚ်ဍုၚ် ၜဳကလေၚ် တွဵုရးဍုၚ်မန်တံဂှ် တုဲကၠုၚ် ပ္ဍဲဂိတုဂျောန် (၂၉) အခိၚ်နူဂယး ၜိုတ် (၄) နာဍဳကဝက်တေံ လ္ပာ်ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ ဖံက်ဗ္တိုဟ်လဝ်မာၚ် မဒှ်ရ။
ဟိုတ်နူဒးဒုၚ်ဖံက်ဗ္တိုဟ်လဝ်မာၚ် ပလီုပလာ်လဝ်ဂှ်ရ ဒဒန်မွဲကရေက် သရိုဟ်စှ်ေလီုလာ်အာလဝ်တုဲ ဒဵုကဵုအခိၚ်လၟုဟ် လ္ပာ်ကံၚ်ဇြဳပၞာန် ကၠုၚ်စိုပ်ပလေဝ်ပလေတ်လဝ် ဟွံမွဲဏီရ။
ဒဒန်ဂျုၚ်အုက်ၜဳကလေၚ်ဂှ် နူကဵုဌာနက္ဍိုက်ပ်ဂၠံၚ်တံ သွက်ဂွံထ္ပက်ဒဒန်ဘေလဳယာယဳဂှ် ၜိုန်ရပလေဝ် ပလေတ်လဝ်ဒတုဲကီုလေဝ် လ္ပာ်ဒပ်ကံၚ်ဇြဳပၞာန် ဟိုတ်နူကဵုပရေၚ်ဂီုကၠီုဟွံမာန်ဂှ်ရ ညးလဵုမှ ဟွံဂံၚ်အာပုဟ်ဂှ် သ္ဂးရ။
အခိၚ်လၟုဟ်ဂှ် လ္တူဒဒန်ဂျုၚ်အုက်ဂှ် ကွဳစက်ဍောတ်တ်တံကဵု ကွဳလိုန်ဓာတ်တံ တတ်အာကၠုၚ် ဂွံဒၟံၚ်ကီုလေဝ် ကွဳစက်ဖ္ဍိုက်ဗၞိက်တံကီု ကွဳစက်အာတရဴ(မှန်လုံ) တံကီုဂှ် စွံသတိဗွဲတၟေၚ်တုဲ ဒးအာကၠုၚ်ဒၟံၚ် အကြာအန္တရာယ်အိုတ်ရောၚ်ဂှ် ဂွံတီကေတ်ရ။
အပ္ဍဲလၟေၚ်ဒဒှ် ဒဒန်ဂျုၚ်အုက် ဒးဒုၚ်ဖံက်ဗ္တိုဟ်မာၚ် ပလီုပလာ်ဂှ် သီုကဵုသၞာဲဒဴနူဌာန မဆေၚ်စပ် ကံၚ်ဇြဳပၞာန်တံဂှ် ဟွံအောန်နူကဵု (၃) တၠ ချိုတ်တုဲ (၃၁) တၠ ကလိဂွံလဝ်ဝပ်တုဲ ပ္ဍဲကဵုညးမကလိဂွံ ဝပ်ဂမၠိုၚ် လ္ပာ်ဒပ်ပၞာန်ဂှ် ပါလုပ်လဝ် ဒဵုကဵုကဆံၚ်သ္ကိုပ်ဗိုလ်ပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−TLT
sanlontai