နေဗျဳဒဝ်၊ ဂျူလာၚ် (၅)
အခေါၚ်အရာညးဗြဴဍုၚ်ဗၟာတံဂှ် ရေၚ်တၠုၚ်ကဵုဗွဲမဇြိုဟ်နက်တုဲ သွက်ဂွံထ္မံက်ပ္တိတ်ကဵု အစောံစရာဲ ဍာ်ဒကေဝ်တံဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဖ္တိုဟ်ဖ္အောဝ်ဟီုဂးလဝ် ပ္ဍဲကဵုဂလာန် မဟီုမြော်လဝ် ပ္ဍဲကဵုအသေအဟာန် တ္ၚဲညးဗြဴဍုၚ်ဗၟာ ပ္ဍဲဂိတုဂျူလာၚ် (၃) တေံဂှ်ရ။
ညးဗြဴ မသ္ပစၞး လၟိဟ်မၞိဟ်ကၟိန်ဍုၚ် ကဝက်ပြၚ်တံဂှ် ပ္ဍဲအရာဒက်ပ္တန်ကၟိန်ဍုၚ်ပံၚ်ကောံ မဒုၚ်သ္ဇိုၚ်ကဵု သၞောတ်ဒဳမဝ်ကရေဇြဳကဵု သၞောတ်ဖေဝ်ဒရာတံဂှ် ဒှ်ဂကောံဇြဟတ်ပၟိက်ဇၞော်မွဲတုဲ သွက်ကၟိန်ဍုၚ်ဂှ် ဒှ်ရိုဟ်ကၞက်မၞိဟ် မၞုံကဵုၚုဟ်မးဗွဲမလောန်ရောၚ်ဂှ် သ္ဂးရ။
သ္အာၚ်နူဂှ်ပၠန် ညးဗြဴဂမၠိုၚ်ဝွံ ဒှ်ညးကေတ်ဒၟံၚ်တာလျိုၚ် ပ္ဍဲလောကဏံ မွဲနဲမွဲဗီုကီု၊ ဒှ်ဇမၞော်ဥဒျာန် ရဲခၞံဗဒှ် အနာဂတ်ညးသၟတ်တံ ဂွံကျေဝ်ဂေါဝ်တုဲ ဒှ်တၠပညာသၟာဓဇဲ မပၠောပ်ဒၟံၚ်ဗီု ကုတမ်ရိုဟ်မၞိဟ်တံရောၚ်ဂှ် က္ဍိုပ်သ္ကိုပ်ပၞာန် ထပ်ဟီုလဝ်ရ။
ပ္ဍဲပရေၚ်ဘဝပိုန်ဒြပ် ပရေၚ်မၞိဟ် သၟတ်ဗြဴတံ ဂွံသၠုၚ်တိုန်ဂှ် ညံၚ်ဘဝညးဗြဴတံ ဂွံဖောအ်ဗြေဝ်တောတက်တိုန်ဂှ်ကီု၊ ပ္ဍဲသွာၚ်ဇဳ မၞိဟ်ဗြဴ မၞိဟ်တြုံ အခေါၚ်ပါလုပ်တုပ်သၟဟ် ညံၚ်ဂွံကလိဂွံဂှ်ကီု ကေုာံ ကဏ္ဍညးဗြဴ ညံၚ်ဂွံဒှ်ကၠုၚ်သၠဲသၠဲလးလး သွက်ဂွံရေၚ်တၠုၚ်အိုတ်ဂှ်လေဝ် ဗ္ကန်ဖျန်လဝ်ဏီရ။
စပ်ကဵုဂလာန်က္ဍိုပ်သ္ကိုပ်ပၞာန် ဟီုဂးလဝ်ဂှ်တုဲ ညးအုပ်ကာနာနာ ဂအုပ်ဂကောံညးဗြဴ (WLB) နာန်မိုအ်အ်ဂှ် နကဵုဂကောံပၞာန် အရာမဟီုဒၟံၚ်ဂှ်ကဵု ပြဝမကၠောန်ဒၟံၚ် ကဵုအကာဲအရာဗလးတိဏံဂှ် ဒစဵုဒစးဒၟံၚ်ပေၚ်ၚ်ရောၚ် ပါ်ပါဲလဝ်ရ။
“အရာက္ဍိုပ်သ္ကိုပ်ပၞာန်ပကီုပရာပ် မေန်အံၚ်လှာၚ်မဟီုဂးဒၟံၚ်ဂှ် ဍာံဍာံတေံ အရာဍေံတံဟီုဒၟံၚ်ဂှ်ကဵု ကၠောန်ဒၟံၚ်နတဲဏံဂှ် ဒစဵုဒစးဒၟံၚ်ပေၚ်ၚ်ဏောၚ်။ မၞိဟ်တံဏံဂှ် စွံပွန်ကဵုမၞိဟ်ဗြဴ ကေုာံ ကောန်ၚာ်သၟတ်တံတုဲ ဂစိုတ်ဂယိုၚ်၊ ကၠဟ်ဗုမ်ကဵုက္ၜၚ်ကျာ၊ ရပ်ဒက်တံဂှ် ဒှ်အရာဂွံဆဵုဒၟံၚ်တံရ။ ခေတ်အဆက်က်ဂှ်လေဝ် ပ္တဝ်က္ဍိုပ်ကဵု ညးဗြဴ ကေုာံ ကောန်ၚာ်တံတုဲ နကဵုဗီုပြၚ်ပကီုပရာပ်ဂမၠိုၚ် မပ္တံကဵုပွပကီုပရာပ် စပ်ကဵုလိၚ်တံ၊ ပွမဍဵုဍိုက်တံ၊ ပွမပါ်ကဆံၚ်တံဂှ် ကၠောန်ဒၟံၚ် ကဵုအစဳဇန် ချိုတ်တ်ပၠိုတ်တ်ဏောၚ်။ ပရေၚ်ပကီုပရာပ် စပ်ကဵုလိၚ်တံဂှ်မ္ဂး နကဵုအစဳဇန်စှ်ေစှ်ေ ပ္တဝ်က္ဍိုပ်ကၠောန်ဒၟံၚ်လှဲလှဲလးလးတုဲ ဒပ်ပၞာန်မွဲဓဝ်ရ ဗၠးဒၟံၚ် နူကဵုပွမကဵုဒုဟ်ဒဏ်တံဂှ်ရ။ အေ ဂှ်တှ်ေ အရာဍေံတံဟီုဒၟံၚ်ဂှ်ကဵု နတဲဏံဂှ် ဒစဵုဒစးဒၟံၚ်ပေၚ်ၚ်ေဏောၚ်ဟီုဂှ် သရောပ်တုဲ မိက်ဂွံဟီုရ” သာ်ဝွံ ညးသ္ဂးရ။
ဒပ်ပၞာန် မသီလဝ်အဝဵုကၟိန်ဍုၚ် နကဵုတၚ်ထ္ၜးဟိုတ် မာဲဟွံဓဝ်ယာ သၞာံ ၂၀၂၀ ဂှ်ဝွံ ပါ်ထ္ကးပကီုပရာပ် ညးဍုၚ်ကွာန်ကောန်အရာပ် ဟွံမွဲကဵုလွဟ်လက်နက် မဒစဵုဒစးဒၟံၚ် ပရေၚ်ပၞာန်သီအဝဵုတံတုဲ ရပ်ဒက်ဍဵုဍိုက်တံဂှ်လေဝ် ကၠောန်သ္ပလဝ်ရ။
ပ္ဍဲကဵုဏံ ကုညးဗြဴ ချဳဒရာၚ်ဒၟံၚ်အခေါၚ်အရာမၞိဟ် ကေုာံ ပရေၚ်ဒဳမဝ်ကရေဇြဳတံဂှ် ရပ်ဒက်ဖျေံထံၚ် သၟးဟွံက ပ္ဍဲကဵုဒၞါဲစၟဳစၟတ်တံဂှ်လေဝ် ပျဲပျာံတုဲ ကၠောန်သ္ပဖ္ဍိုက်ဂရိုက် စပ်ကဵုလိၚ်တံဂှ်လေဝ် နူကဵုဂကောံ ဒပ်ကံၚ်ဇြဳပၞာန်တံ ကလိလောန်ဒၟံၚ်အိုတ်ရောၚ်ဂှ် ညးချဳဒရာၚ်ကတိုၚ်ကၟဟ် ပရေၚ်ညးဗြဴတံကဵု ညးဗြဴမလေၚ်ဗၠးကၠုၚ်တံ ဟီုလဴထ္ၜးဒၟံၚ်အိုတ်ရ။
ပ္ဍဲသၞာံဏံ နူဂိတုဨပရဴ စဵုကဵုဂိတုဂျောန် (၂၅) အပ္ဍဲပွိုၚ်ပိသၞာံဏံ မၞိဟ်ဗြဴဒးဒုၚ်ရပ်ထိၚ်လဝ် နူကဵုဒပ်ကံၚ်ဇြဳပၞာန်တံဂှ် အပံၚ်ဖအိုတ် (၁၁၁) တၠ နွံလဝ်တုဲ မၞိဟ်ဗြဴ မဒးဆောံလေၚ်လဝ်လမျီုဂှ် နွံလဝ် (၆၇) တၠရောၚ် တၚ်နၚ်သမဂ္ဂညးဗြဴဍုၚ်ဗၟာတံ ထ္မံက်ထ္ၜးလဝ်ရ။
ညးဗြဴ မဒးချိုတ်အာလဝ်ဂမၠိုၚ်ဝွံ ဟိုတ်နူပရေၚ်ဗ္တိုက်တရဴကျာဂှ် (၆၂) တၠ၊ ဟိုတ်နူပရေၚ် လွဟ်ဇၞော်ဗ္တိုဟ်ထ္ကးဂှ် (၂၂) တၠ၊ ရပ်ထိၚ်တုဲ ဒးဒုၚ်ဂစိုတ်ဂှ် (၅) တၠ၊ ဒးဒုၚ်စံၚ်ယတ်ဂျိုၚ်ၚ်ဂှ် (၁၆) တၠ ကေုာံ ဒးဒုၚ်ပန်ဂစိုတ်ဂှ် (၁၀) တၠ နွံလဝ်ရောၚ် သမဂ္ဂညးဗြဴဍုၚ်ဗၟာ လလောၚ်ပ္တိတ်လဝ် ပ္ဍဲဂိတုဂျောန် (၂၈) တေံရ။
ပရိုၚ်−သြၚ်လောန်တိုၚ်(မ်)
ဗီု−ဗီုတြေံ
sanlontai