ပ္ဍဲဗိက် ဗ္ဒိုပ်သၞေဟ်ကၚ်ကံၚ်ဇြဳပၞာန်မွဲဗ္ဒိုပ် ဒးဒုၚ်ဗ္တိုက်တုဲ (၃) တၠ ချိုတ်တုဲ (၅) တၠ ကလိဂွံဝပ်

ဗိက်၊ ဂျူလာၚ် (၆)

ဗ္ဒိုပ်သၞေဟ်ကၚ်ကံၚ်ဇြဳပၞာန် မဖျေံလဝ်ဒပ် ဗ္ဒါဲကွာန်တုၚ်ဗျဝ်ကျဳ ပွိုၚ်ဍုၚ်ဗိက် ရးဒေသဇၞော်တၞၚ်သဳဂှ် ဒးဒုၚ်ဗ္တိုက်တုဲ ကောန်ဒပ်ကံၚ်ဇြဳပၞာန် (၃) တၠ ချိုတ်တုဲ (၅) တၠ ကလိဂွံလဝ်ဝပ်ရောၚ် ညးတာလျိုၚ် ဂကောံဒပ်ဒမၠုက် ဟွံဗက်လ္ပာ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဗ္ဒိုပ်သၞေဟ်ကၚ်ကံၚ်ဇြဳပၞာန် ဒၞါဲဒပ်ကံၚ်ဇြဳပၞာန်တံနွံ သီုကဵုကောန်ပၞာန်ညးဍုၚ်ကွာန် သၟဝ်သြဇာကံၚ်ဇြဳ ပၞာန် ဗ္ဒါဲ (၂၀) မဖျေံဒပ်မံၚ်တန်တဴဒၟံၚ်ဂှ် တုဲကၠုၚ်နူဂိတုဂျူလာၚ် ၄ အခိၚ်လဒေါဝ်တ္ၚဲ ၁၂ နာဍဳတေံ ဂကောံဒပ်ပံၚ်ကောံစဵုဒၞါဒေသတံ ပန်ပှော်လဝ် သီုကဵုလွဟ်ဇၞော်၊ လွဟ်ဍောတ်တံ ကေုာံ သီုကဵုထောံ လဝ်မခတိုဟ် နကဵုဒရုၚ်တံရ။

ဟိုတ်နူပရေၚ်ဗ္တိုက်ဏံတုဲ ပရေၚ်ပန်ပှော်ၜါလ္ပာ် က္တဵုဒှ်လဝ် လလအ်ပွိုၚ်ဗ္ဒါဲဘာ်နာဍဳတုဲ ဂကောံဒပ် ပံၚ်ကောံ စဵုဒၞါဒေသတံ ဇီုကပိုက်ဒးဟွံမွဲမွဲသာ် ဆုတ်ကလေၚ်လဝ် ဗွဲမအံၚ်ဇၞးရောၚ် သ္ဂးရ။

အပ္ဍဲပရေၚ်ဗ္တိုက်ၜါလ္ပာ်ဏံဂှ် နူကဵုလ္ပာ်ဒပ်ကံၚ်ဇြဳပၞာန်တံ ၜိုန်ရကၠောန်သ္ပလဝ် ပရေၚ်ပန်ပှော်လွဟ် ဇၞော်တံကီုလေဝ် ညးဒေသ ဇီုကပိုက်ချိုတ်အာ ကေုာံ သ္ၚိဒၟံၚ်လီုလာ်တံ ဟွံမွဲပုဟ်ဂှ် ဂွံတီကေတ်ရ။

ဗ္ဒိုပ်သၞေဟ်ကၚ်ကံၚ်ဇြဳပၞာန်ဂှ် ဂကောံဒပ်ဒမၠုက်ဟွံဗက်လ္ပာ်တံ၊ တမ်ဒပ်ခရိုၚ်ဗိက် ၂ တံ၊ ဂကောံစဵုဒၞါ ညးဍုၚ်ကွာန် ပွိုၚ်ဍုၚ်ဗိက် (ပကဖ) တံ ပံၚ်တောဲဗ္တိုက်လဝ်ရ။

တုဲကၠုၚ် ပ္ဍဲဂိတုဂျူလာၚ် (၁) တေံဂှ်လေဝ် အကြာဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် လ္ပာ်ကွာန် တဂျက်တဝ်၊ လၚု၊ ဒံၚ်ပုၚ် ပွိုၚ်ဍုၚ်တၞၚ်သဳ ခရိုၚ်ဗိက်တံဂှ်ကဵု ဂကောံဇြဟတ်ပၠန်ဂတးတံဂှ် ပေါဲဗ္တိုက်တံ က္တဵုဒှ်လဝ် ဟွံအောန်နူကဵု (၅) ဝါဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု−ဂကောံဒပ်ဒမၠုက်ဟွံဗက်လ္ပာ်