ပံၚ်တောဲရေၚ်တၠုၚ်အာ မွဲကရောံကဵု ဂကောံပၠန်ဂတးဗတိုက်ဒၟံၚ်ကံၚ်ဇြဳပၞာန်ဏောၚ် ဥက္ကဋ္ဌ KNU ဟီု

ကဝ်ဒူလေဝ်၊ ဂျူလာၚ်(၆)

ဒးပံၚ်တောဲရေၚ်တၠုၚ်အာ မွဲကရောံကဵု ဇၟာပ်ဂကူ၊ ဇၟာပ်ဂကောံ ပၠန်ဂတးဒၟံၚ်ကဵုတၠအဝဵုပၞာန် သီုဖအိုတ်ရောၚ်တုဲ ညံၚ်တၚ်ရန်တၟံပရေၚ်ဍုၚ်ကွာန် ကောန်ဂကူကရေၚ်တအ် ဂွံဍိုက်ပေၚ်ကၠုၚ်မာန် သတိပရေၚ်ဍုၚ်ကွာန် ဒးနွံဒၟံၚ်လၟိုန်ဏောၚ်ဂှ် ဉက္ကဋ္ဌ ဗော်သွးကောန်ဂကူကရေၚ် KNU ပဒိုဝ်သဝ်ကွေဝ်ထူဝေန် ဟီုသ္ဂးလဝ်ရ။

ပ္ဍဲလိက်သဝဏ်ပလံၚ်ဗစိုပ် တ္ၚဲဒပ်ပၞာန်ဗၠးၜးကောန်ဂကူကရေၚ် (ကဝ်ဒူလေဝ်) ကၠုၚ်စိုပ် ပ္ဍဲဂိတုဂျူလာၚ် စၟတ်တ္ၚဲ (၅)ဂှ် ဥက္ကဋ္ဌ ဗော်သွးကောန်ဂကူကရေၚ် KNU ပဒိုဝ်သဝ်ကွေဝ်ထူဝေန် ဟီုသ္ဂးလဝ် သာ်ဏံရ။

သွက်တၚ်ရန်တၟံပရေၚ်ဍုၚ်ကွာန် ကောန်ဂကူကရေၚ်တအ် ကေုာံ သွက်ဂွံစဵုဒၞာ ပရေၚ်ပြိုက်ဂစိုတ် ပလီုပလာ် လမျီု၊ သ္ၚိဌာန်၊ ပိုန်ဟာန်ညးဍုၚ်ကွာန်ကရေၚ်တအ်မာန် ဒပ်ပၞာန်ဗၠးၜးကောန်ဂကူကရေၚ်ဂှ် ဒှ်ဒပ်ပၞာန် ပၟိက်ကိစ္စဇၞော် ဗွဲမလောန်တုဲ အကာဲအရာပရေၚ်ဍုၚ်ကွာန်အခိၚ်တ္ၚဲဏံ ဟွံတုပ်သၟဟ်ကဵု အကာဲအရာကၟိန်ဍုၚ်ပိုဲကေၚ်က္တဵုဒှ်ကၠုၚ်လဝ် ပ္ဍဲမွဲဒမြိပ်ဝၚ်တုဲ တၟေၚ်တၟဟ်တၞဟ်ခြာတိတ်ဒၟံၚ်ရဂှ် ဟီုသ္ဂးလဝ်ရ။

ဂကောံပၞာန်ဂှ် စွံလဝ်စိုတ်လ္တူညးဍုၚ်ကွာန် သၟဟ်ကဵုသၞတုဲ ပွမပန်ဖျေံလွဟ်ဇၞော် ပ္ဍဲကွာန်အရာပ်ကီု၊ ဂြာတ်ထောံဖျေံဗုမ် ပ္ဍဲကွာန်အရာပ်၊ ရုၚ်ဂဥုဲ၊ ဗ္ဒမ်ဂဥုဲ၊ ဘာဗ္တောန်လိက်၊ ဘာလကျာ် ကေုာံဘာခရေတ်ယာန်တအ် ကဵုက္ၜၚ်ကျာ၊ ပန်ဖျေံလွဟ်ဇၞော်ဍောတ် လေပ်ကၠောန်သ္ပဒၟံၚ်ရဂှ် ဓမံက်လဝ် ပ္ဍဲလိက်သဝဏ်ဂှ်ရ။

သ္အာၚ်နူဂှ်ပၠန် နကဵုသၟာပၠန်ဂတးရပ်လွဟ်ကောန်ဂကူကရေၚ်တအ် ဇကုဇကုဂှ် နဒဒှ်ကောန်ဂကူကရေၚ် တီကၠိုဟ်ကေတ်လဝ်တုဲ ဒးပၠန်ဂတးတဝ်စၞေဟ်ကဵု သၞကောန်ဂကူကရေၚ် ကေုာံ သၞညးဍုၚ်ကွာန်တအ်ဏောၚ်ဂှ် ဥက္ကဋ္ဌ KNU ဟီုသ္ဂးလဝ်ရ။

နကဵု ဗော်သွးကောန်ဂကူကရေၚ် KNU ကေုာံဒပ်ပၞာန်ဗၠးၜးကောန်ဂကူကရေၚ် (ကဝ်ဒူလေဝ်)ဂှ် မ္ၚးနူလမျီု သ္ၚိဌာန် ပိုန်ဟာန် ကောန်ဂကူကရေၚ် ကေုာံ ပရေၚ်ဍုၚ်ကွာန် ကောန်ဂကူကရေၚ်တုဲ သွက်ဂွံကၠောန်ရေၚ်တၠုၚ်ကဵု ပရေၚ်ဒုၚ်ဒဝ်စဵုဒၞာ ကုအလုံညးဍုၚ်ကွာန်မွဲ ဗွဲဂွံစိုပ်တရဴ နွံဒၟံၚ်ပၟိက်ရဂှ် ဟီုသ္ဂးလဝ်ရ။

သ္အာၚ်နူဂှ်ပၠန် အခေါၚ်အရာအကာဲအရာကဵုကၠုၚ်လဝ်ဂှ် ကေတ်ညံၚ်သ္ဂောံက္လိဂွံတုဲ မ္ၚးနူပရေၚ်ရေၚ်တၠုၚ်ကဵု ကေၚ်ကာညးဍုၚ်ကွာန်တုဲ ပရေၚ်အုပ်ဓုပ်ဇကုဇကုကီု သွက်ဂွံခၞံဗဒှ်တိုန်နဲကဲအခိုက်အလိုက် နကဵုသၞောတ်ပရေၚ်ဂီုကၠီုဇကုဇကုဂှ် နွံဒၟံၚ်ပၟိက်တုဲ အခိၚ်ကာလလၟုဟ်ဂှ် ညံၚ်တၚ်ကော်ချဴဇၞော်ကဵုဇြဟတ်နွံဒၟံၚ်ကီု အခေါၚ်ပျးဌာန်ဇကုဇကုကေုာံ အခေါၚ်ဖန်ဖက် ကံကုသဵုဇကုမာန်လေဝ် နွံဒၟံၚ်ရဂှ် ပဒိုဝ်သဝ်ကွေဝ်ထူဝေန် ဟီုသ္ဂးလဝ်ရ။

ပဒိုဝ်သဝ်ကွေဝ်ထူဝေန်ဂှ် ပ္ဍဲအခိၚ်ကောံဓရီုဇၞော်ဗဟဵု KNU မရနုက်ကဵု (၁၇)ဝါ ကၠောန်ဗဒှ်လဝ် ပ္ဍဲဂိတုမေ တုဲကၠုၚ်တေံဂှ် ဒှ်ညးဒးဒုၚ်ရုဲစှ်လဝ် နဒဒှ်ဥက္ကဋ္ဌ မွဲတၠတုဲ ဗော်သွးကောန်ဂကူကရေၚ် KNU ဂှ် ပံၚ်တောဲကဵု ဂကောံမဟာမိတ်တအ်တုဲ ဗတိုက်ပၠန်ဂတးဒၟံၚ်ကံၚ်ဇြဳပၞာန်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-KNU