ပေါဲဗတိုက်ဆေၚ်မုက် ပ္ဍဲတိဍာ်ဒပ်မဟာ (၃)ဂှ် ကောန်ဒပ်ကံၚ်ဇြဳပၞာန် ဒးချိုတ်လဝ် (၁၀)တၠ

ညံၚ်လေဝ်ပေန်- ဂျူလာၚ်(၆)

ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲတိဍာ်ဒပ်မဟာ (၃) ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ကဵု ဒပ်ပၠန်ဂတးတအ် ပေါဲဗတိုက်ဆေၚ်မုက် က္တဵုဒှ်လဝ်တုဲ လ္ပာ်ကံၚ်ဇြဳပၞာန် ဒးချိုတ်လဝ် (၁၀)တၠတုဲ ဒးလဝ်ဘဲဝပ် (၁၅)တၠရဂှ် ဓမံက်လဝ် ပ္ဍဲတမ်ရိုဟ် တၚ်ဂၞၚ်ပရိုၚ်ပၞာန်ရ။

ပ္ဍဲဂိတုဂျူလာၚ် စၟတ်တ္ၚဲ(၂) ကဵုစၟတ်တ္ၚဲ(၃) တုဲကၠုၚ်တေံဂှ် အကြာဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲကွာန်တမေန်အေန်ကုမ် ပွိုၚ်ဍုၚ်ကျောက်တခါ ကေုာံ ပ္ဍဲကွာန်ယျေတွောန်ကုမ် ပွိုၚ်ဍုၚ်ကျောက်ဂျဳကဵု ဒပ်ပံၚ်ကောံ KNLA/PDF တအ် ပေါဲဗတိုက်က္တဵုဒှ်လဝ် ပွိုၚ်(၁)နာဍဳပြၚ်ရ။

ပ္ဍဲပေါဲဗတိုက်ဂှ် လ္ပာ်ကံၚ်ဇြဳပၞာန် ဒးချိုတ်လဝ် (၁၀)တၠ ဒးလဝ်ဘဲဝပ် (၁၅)တုဲ ညးဇီုကပိုက်ဒးလဝ်ဘဲဝပ်တအ်ဂှ် ယိုက်ပလံၚ်ဏာလဝ် ပ္ဍဲရုၚ်ဂဥုဲ ကျောက်တခါရဂှ် ဓမံက်ထ္ၜးလဝ် ပ္ဍဲ KNLA/PDF Kyaukkyi မဒှ်တမ်ရိုဟ်တၚ်ဂၞၚ်ပရိုၚ်မွဲဂှ်ရ။

ဟိုတ်နူလွဟ်ဇၞော်ဍောတ် ဒပ်ကံၚ်ဇြဳပၞာန် ထ္ပက်ကၠုၚ်ပၞာန် ပန်ဖျေံလဝ်တုဲ ညးဒေသ နူကွာန်ယျေတွောန်ကုမ်၊ ပွိုၚ်ဍုၚ်မုမ်-KNU (၂)တၠ ဇီုကပိုက်ဒးလဝ်ဘဲဝပ်တုဲ ညးဍုၚ်ကွာန် နူကွာန် (၃)ကွာန်ပါလုပ် သီုကွာန်ယျေတွောန်ကုမ် (၁၄၀၀)ပြၚ် ဒးဂြိပ်ဒဴပါဲဓလေတ်ဒၟံၚ်ရဂှ် ဗဟဵု KNU လလောၚ်တြးလဝ်ရ။

ပ္ဍဲဌာန်ပရိုၚ်တြးဝါဒကံၚ်ဇြဳပၞာန်တအ်ဂှ်မ္ဂး ဗ္ဒာဲကွာန်ယျေတွောန်ကုမ်၊ ပွိုၚ်ဍုၚ်ကျောက်ဂျဳ၊ ရးဗဂေါဂှ် ပ္ဍဲဂိတုဂျူလာၚ် စၟတ်တ္ၚဲ (၂)ဂှ် အကြာကံၚ်ဇြဳပၞာန်ကဵု ဒပ်ပံၚ်ကောံ KNLA/PDF တအ် ပေါဲဗတိုက်က္တဵုဒှ်လဝ် လအ်ပွိုၚ်ကဝက်နာဍဳတုဲ လ္ပာ်ဒပ်ပံၚ်ကောံ ဒးချိုတ်လဝ် (၂)တၠတုဲ သီဂွံလဝ် လွဟ်လက်နက်ရဂှ် ဟီုသ္ဂးလဝ်ရ။

အခိၚ်လၟုဟ်ပြဟ်ဟ်ဏံမ္ဂး ဟိုတ်နူပရေၚ်ကံၚ်ဇြဳပၞာန် ဗတိုက်ပ္တဝ်လဝ်က္ဍိုပ်ကဵု ကောန်အရာပ်တအ်ကီု သီုပရေၚ်ချဳဒရာၚ်ပၞာန်တုဲ ညးဍုၚ်ကွာန်တအ် ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဌာန်ဗၠးဘဲတုဲ နွံဒၟံၚ်ပၟိက်ကဵု အရီုဗၚ်ဗ္စာရဏာပရေၚ်မၞိဟ်ရဂှ် ဂကောံပရေၚ်မၞိဟ်ကရေၚ်တအ် ဟီုသ္ဂးလဝ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – CJ