ဒပ်ကံၚ်ဇြဳပၞာန် ယဝ်ရဆုဲတိုန်ကၠုၚ်မ္ဂး ပေါဲဗ္တိုက်တံ သာသ္ကာတ်မြဟ်ကၠုၚ်မာန်ရောၚ် KIO ကဵုသတိ

လိုၚ်ဇြာ၊ ဂျူလာၚ် (၆)

နကဵုဒပ်ကံၚ်ဇြဳပၞာန် မထ္ပက်လဝ်ကရောၚ်ပၞာန် ဗ္ဒါဲပွဳပွူခရိုၚ်လိုၚ်ဇြာ တွဵုရးကချေၚ်ဂှ် ဟွံဆုတ်ကလေၚ်မွဲသာ် ယဝ်ရဆုဲတိုန်ကၠုၚ်မ္ဂး ပေါဲဗ္တိုက်သ္ကာတ်မြဟ်ကၠုၚ်မာန်ရောၚ် ညးဒုၚ်တာလျိုၚ် လလောၚ်ပရိုၚ် ဂကောံဗၠးၜးကချေၚ် (KIO) သ္ကိုပ်ဗိုလ်ဇၞော် နဝ်ဘူ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ်ကံၚ်ဇြဳပၞာန်ဝွံ တုဲကၠုၚ်ပ္ဍဲဂိတုဂျောန် (၂၆) တေံတုဲ ထ္ပက်လဝ်ပၞာန်ဗ္တိုက်လဝ် ပ္ဍဲကဵုတိဍာ် တမ်ဒပ် (၃) ဒပ်ပၞာန် KIA မၞုံပွိုၚ်ဍုၚ်ဝိုၚ်မဝ် တွဵုရးကချေၚ်ဂှ်တုဲ စဵုကဵုဂိတုဂျူလာၚ်မံက်ဂှ် အကာဲအရာပရေၚ် ပၞာန်ၜါလ္ပာ် ကြံၚ်မ္ၚိုဟ်ကၠုၚ်ဒၟံၚ်ရ။

စပ်ကဵုအကာဲအရာဏံတုဲ ညးဒုၚ်တာလျိုၚ်လလောၚ်ပရိုၚ် ဂကောံဗၠးၜးကချေၚ် (KIO) သ္ကိုပ်ဗိုလ်ဇၞော် နဝ်ဘူဂှ် အခိၚ်လၟုဟ် လ္ပာ်ကံၚ်ဇြဳပၞာန်တံ ကလေၚ်ရုပ်သီလဝ် ကရောၚ်ပၞာန်တံဟွံမွဲဏီတုဲ ပန်ပှော်ဒၟံၚ်ညးသ္ကအ် နကဵုလွဟ်ဇၞော်တံ နွံဒၟံၚ်ဂှ် ဟီုရ။

“လၟုဟ်လေဝ် ကရောၚ်ပၞာန် လ္ပာ်ကံၚ်ဇြဳပၞာန်တံ မထ္ပက်လဝ်ဂှ် ကလေၚ်ရုပ်သီအာလဝ် ဟွံမွဲပုဟ်။ ဟိုတ်ဂှ်ရ ဒှ်ဒၟံၚ်အကာဲအရာကြံၚ်မ္ၚိုဟ်ဒၟံၚ်ဏောၚ်။ နူဏေံတေံ ပ္ဍဲဂိတုဂျူလာၚ် (၄) တေံဂှ်လေဝ် ပန်ပှော်လဝ် ကဵုလွဟ်ဇၞော်ရ။ ညးပန်အဲပန်ရ။ ပေါဲဗ္တိုက်ဆေၚ်မုက် ပ္ဍဲဗလးတိ နကဵုလွဟ်ဍောတ်တံဂှ် ဟွံမွဲဏီပုဟ်။ ပေါဲဗ္တိုက်ပန်ကဵု လွဟ်ဇၞော်တံရ နွံ။ ဒဵုကဵုအကာဲအရာလၟုဟ်ဂှ် ဟွံတီဏီပုဟ်၊ ဒဵုကဵုအခိၚ်လၟုဟ် ရမျာၚ်သေနာတ်တံဂှ် ဟွံဂွံမိၚ်ကေတ်ဏီပုဟ်။ ဍေံတံ ဆုဲတိုန်အတေၚ်ဏောၚ်ဟီုမ္ဂး ပေါဲဗ္တိုက်ဂှ် သာသ္ကာတ်မြဟ်ကၠုၚ် နူဏံမာန်ရောၚ်” သာ်ဝွံ ညးသ္ဂးရ။

အခိၚ်လၟုဟ်ဂှ် ညးဍုၚ်ကွာန်ကောန်အရာပ် မၞုံအပ္ဍဲဒေသ ပေါဲဗ္တိုက်က္တဵုဒှ်ဒၟံၚ် မွဲဒမြိပ်ဍုၚ်လိုၚ်ဇြာတံ ဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံနွံတုဲ ပ္ဍဲကဵုဏံ မၞိဟ်အာယုက်ဇၞော်ဇၞော်တံ၊ မၞိဟ်ဗြဴတံကဵု ကောန်ၚာ်သၟတ် တံ ပါလုပ်ဒၟံၚ် ဗွဲမဂၠိုၚ်ဂၠေၚ်ရောၚ်ဂှ် သ္ကိုပ်ဗိုလ်ဇၞော် နဝ်ဘူ သ္ဂးရ။

ပ္ဍဲဂိတုဂျူလာၚ် (၃) တေံဂှ်လေဝ် ပ္ဍဲကဵုကွာန်နာမ်သာန်ယာန် ပွိုၚ်ဍုၚ်ဝိုၚ်မဝ် နွံခြာဇမ္ၚောဲ ၁၁ မိုၚ် နူကဵုဍုၚ်လိုၚ်ဇြာ ဒၞါဲဒဒန်ဌာန်ဂအုပ်ဗဟဵု ဂကောံဗၠးၜကချေၚ် KIO နွံတံဂှ် အကြာဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကချေၚ် (KIA) တံ ပေါဲဗ္တိုက်တံ က္တဵုဒှ်လဝ်ဏီရ။

အပ္ဍဲတိဍာ်အုပ်ဓုပ် ခရိုၚ်လိုၚ်ဇြာ KIO ဂှ် ဟိုတ်နူပရေၚ်ချဳဒရာၚ်ပရေၚ်ပၞာန် ဒပ်ကံၚ်ဇြဳပၞာန်တံ နွံဒၟံၚ်ဂှ်ရ ပေါဲဗ္တိုက်တံ အခိၚ်ဟွံရုဲက္တဵုဒှ်ကၠုၚ်မာန်တုဲ ညးဍုၚ်ကွာန်တံ စွံသတိတုဲ သွက်ဂွံအာကၠုၚ်အိုတ်ဂှ် ပ္ဍဲဂိတုဂျူလာၚ် (၄) တေံ နူကဵုရုၚ်အုပ်ဓုပ် ခရိုၚ်လိုၚ်ဇြာ လလောၚ်ပ္တိတ်ကဵုလဝ်သတိရ။

ပ္ဍဲကဵုတၚ်လလောၚ်တြးဏံဂှ် ပွမအာကၠုၚ် မွဲဒမြိပ်ဂၠံၚ်ကွဳစက် ဗာန်မဝ်−မျေတ်ကျဳနာတံဂှ် ၜိုတ်သ္ပမာန် သွက်ဂွံဝေၚ်ပါဲကဵုဂှ်ကီု၊ ယဝ်ရကိစ္စဒးအာတရဴ ဟွံဒေါအ်ဟွံဂွံ နကဵုကွဳစက်၊ ကွဳလိုန်ဓာတ် ကေုာံ တရဴတွာ်တံ မံက်တိုန်မ္ဂး စွံသတိကလၚ် ပရိုၚ်ပရေၚ်ပၞာန်တံဂှ်တုဲ သွက်ဂွံအာကၠုၚ်အိုတ်ဂှ် ကဵုလဝ်သတိရ။

သ္အာၚ်နူဂှ်ပၠန် ညံၚ်ဂွိုအ်ကၠောန်သ္ပ ပွမအာကၠုၚ် ပ္ဍဲကဵုဒၞါဲမစုက်လုက်ကဵု ဒပ်ကံၚ်ဇြဳပၞာန်တံဂှ်ကီု၊ ညံၚ်ဂွံဝေၚ်ပါဲ ဒၞါဲပေါဲဗ္တိုက်က္တဵုဒှ်မာန်တံဂှ်ကဵု ပေါဲဗ္တိုက်လေပ်က္တဵုဒှ်ဒၟံၚ်တံဂှ်ကီု၊ ညံၚ်ဂွိုအ်ကၠောန်သ္ပ ပါလုပ်ရီုဗၚ်ဒး ကုဒပ်ကံၚ်ဇြဳပၞာန်တံ နကဵုကပေါတ်ကဵုဒှ် နကဵုဇြဟတ်မၞိဟ်ကဵုဒှ်ဂှ်ကီု ကေုာံ ညံၚ်ဂွိုအ်ဒှ် မၞိဟ်ဒးဒုၚ်ရပ်စပ်စကာဂှ်လေဝ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီုဓာတ်−Yawng Htang