ဌာန်ဂအုပ်တမ်ဒပ်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်လှာဒကှ်တံ ဒးဒုၚ်ဗ္တိုက်ဒၟံၚ် အဆက်က်

လှာဒကှ်၊ ဂျူလာၚ် (၆)

ဌာန်ဂအုပ်တမ်ဒပ်ကံၚ်ဇြဳပၞာန်၊ ဗ္ဒိုပ်သၞေဟ်ကၚ် ကေုာံ ဒၞါဲဒပ်ကံၚ်ဇြဳပၞာန် မဖျေံလဝ်သ္ဇိုၚ် မၞုံအပ္ဍဲပွိုၚ်ဍုၚ် လှာဒကှ် တွဵုရးကရေၚ်တံဂှ် ဂကောံဇြဟတ်ပၠန်ဂတးတံ ကၠောန်သ္ပဒၟံၚ် ပရေၚ်ဗ္တိုက်တံ လၟေၚ်တ္ၚဲရောၚ် ဂှ် ဂွံတီကေတ် ဇရေၚ်ဂကောံဒပ်ပံၚ်ကောံတံရ။

KNLA, ဂကောံဒပ်ပြုပြေၚ်ပၞာန်တၟေၚ်− S.O.F ၊ ဂကောံဒပ်ဒရုၚ် Cloud Wings ကေုာံ ဂကောံ မဟာမိတ်တံ ပံၚ်တောဲတုဲ ဌာန်ဂအုပ်တမ်ဒပ် ခလရကံၚ်ဇြဳပၞာန် (၂၈၃) မၞုံပွိုၚ်ဍုၚ်လှာဒကှ်၊ ဗ္ဒိုပ်ပၞာန် ခုတ်ခွါ၊ သၞေဟ်ကၚ်ကံၚ်ဇြဳပၞာန် ပ္ဍဲအၜေတ်၊ ဗ္ဒိုပ်ဗၠာဲသၟိၚ်အခၠဵု တဂေါန်ဒေၚ် ကေုာံ ဒၞါဲကောန်ဒပ်ကံၚ် ဇြဳပၞာန် မဖျေံလဝ်သ္ဇိုၚ် ဗွဲမဂၠိုၚ်ဂၠေၚ်ဂှ် ဗ္တိုက်ဒၟံၚ်အရိုဟ်ဒဒှ်တ္ၚဲရ။

ပပ္တံနူဂိတုဂျောန် (၂၉) စဵုကဵုဂိတုဂျူလာၚ် ၅ ဂှ် ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ အာစိုပ်ဗ္တိုက်လဝ် ဒၞါဲဒပ်ကံၚ်ဇြဳပၞာန် ဗွဲမဂၠိုၚ်ဂၠေၚ် ပါလုပ်သီုကဵုဌာန်ဂအုပ်တမ်ဒပ်ကံၚ်ဇြဳပၞာန်တံ နကဵုဒရုၚ် (၂၀) ဝါပြၚ်ရ။

ဟိုတ်နူပရေၚ်ဗ္တိုက်တံဏံတုဲ ဒၞါဲဖျေံသ္ဇိုၚ်ကောန်ဒပ်ကံၚ်ဇြဳပၞာန်တံ သရိုဟ်လီုလာ်အာဒၟံၚ်တုဲ ဒပ်အမၠံက် (၃၁၈) သၟဝ်ဒပ်ကံၚ်ဇြဳပၞာန်ဂှ် ဗိုလ် (၁) တၠ ကဵု ကောန်ဒပ် (၁) တၠ ချိုတ်အာလဝ်တုဲ ကောန်ဒပ်ကံၚ်ဇြဳ ပၞာန် ဟွံအောန်နူကဵု (၅) တၠ ကလိဂွံလဝ်ဝပ်ဗွဲမသ္ကာတ်မြဟ်ရောၚ် ဂကောံဒပ်ပြုပြေၚ်ပရေၚ်ပၞာန်− S.O.F လလောၚ်ပ္တိတ်လဝ်ရ။

လ္ပာ်ကံၚ်ဇြဳပၞာန်ဂှ် ၜိုန်ရပန်ပှော်လဝ် လွဟ်ဇၞော် (၁၂၀ မမ) ၊ (၈၁ မမ) (၆၀ မမ) တံ ဒၞါဲပြးဇးကီုလေဝ် မၞိဟ်ကီု ကပေါတ်ကညောတ်ကီု လ္ပာ်ဂကောံဒပ်ပံၚ်ကောံ KNLA, S.O.F, Cloud Wings ဇကုတံ ဇီုကပိုက်ဆောံလေၚ်ဒးလဝ် ဟွံမွဲပုဟ်ဂှ် ဂကောံဒပ်ပြုပြေၚ်ပရေၚ်ပၞာန်ဗွဲတၟေၚ် S.O.F သ္ဂးရ။

အခိၚ်လၟုဟ် ကရောၚ်ပၞာန်ဒပ်ကံၚ်ဇြဳပၞာန် ဟိုတ်နူလုပ်စိုပ်ချဳဒရာၚ်ကၠုၚ် ဟိုတ်နူပန်ပှော်လွဟ် ဇၞော်ကြာန်န် အပ္ဍဲဂကောံကွာန်အခၠဵုတဂေါန်ဒေၚ်၊ ပွိုၚ်ဍုၚ်ဝေန်ယျေ၊ တိဍာ်ဒပ်မဟာ ၆ KNU ဂှ်တုဲ ညးဍုၚ်ကွာန်ဒေသဂၠိုၚ်ကဵုလ္ၚီ နူကဵုကွာန် (၅) ကွာန်ဟွံအောန်တံဂှ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ်ဂှ် ဂွံတီကေတ် အတိုၚ်ဂလာန် ညးဒေသတံရ။

ပရိုၚ်−သြၚ်လောန်တိုၚ်(မ်)

ဗီု−SOF