ဟိုတ်နူပရေၚ်ဍဵုဍိုက်စကာ ဒပ်ပၞာန်တံတုဲ ပ္ဍဲတွဵုရးဍုၚ်မန် ဗၠာဲသၟိၚ်ဂြိပ်တိတ်တံ သာတုဲဂၠိုၚ်ကၠုၚ် 

မတ်မလီု၊ ဂျူလိုၚ်(၆) 

ပ္ဍဲတွဵုရးဍုၚ်မန် ပ္ဍဲကာလဒပ်ပၞာန်သီအဝဵုပွိုၚ်ၜါသၞာံပြၚ်ဏံ ဟိုတ်နူပရေၚ်ဍဵုဍိုက်စကာ ဒပ်ကံၚ်ဇြဳပၞာန်တံတုဲ နူဗ္ဒိုပ်ဗၠာဲသၟိၚ်တံဂှ် လၟိဟ်ဂကောံဒပ်ဗၠာဲသၟိၚ် ဂြိပ်တိတ်မံၚ်တံ သာတုဲဂၠိုၚ်ကၠုၚ်ရဂှ် ညးစုက်လုက်ကဵုဒပ်ဗၠာဲသၟိၚ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။ 

ဂကောံဒပ်ဗၠာဲသၟိၚ်တံဂှ် ဟိုတ်နူဗ္ဒိုပ်ဗၠာဲသၟိၚ်တံ ဒးဒုၚ်ဗ္တိုက်မွဲဏှမွဲဏှကီု၊ သၞာဲဒဴဒပ်ကံၚ်ဇြဳပၞာန်တံကဵု ဇြဟတ်ဂရိုဟ်ဗွဲအဓမ္မကီု၊ ပရေၚ်စဵုဒၞါကၟိန်ဍုၚ်သ္ဂးတုဲ ပံၚ်ကဵု ကောန်ပၞာန်တံတုဲ သ္ကဵုပံၚ်တောဲကၠောန်သ္ပ ပေါဲဗ္တိုက်ဗလးတိတံကီု၊ ဟိုတ်နူဒးဒုၚ်ပဆုဲပြံၚ် ဒၞါဲဒေသတိဍာ်ဟွံညိၚ်ဝတ်တံဂှ်တုဲ မၞိဟ်ဂြိပ်တိတ်တံ သာတုဲဂၠိုၚ်ကၠုၚ်ရ။ 

အတိုၚ်တၚ်နၚ် သြၚ်လောန်တိုၚ်မ် က္လိဂွံလဝ်ဂှ်မ္ဂး တုဲကၠုၚ် ဂိတုဂျောန် သတ္တဟတတိယမွဲသတ္တဟဓဝ်ဂှ် သ္ကိုပ်ဗ္ဒိုပ် ဗ္ဒိုပ်ဗၠာဲသၟိၚ်တိဍာ်ကေန်မန်ချံၚ် ဒုသ္ကိုပ်ဗၠာဲသၟိၚ် ဇြဝ်မေန်အံၚ်မပါလုပ် ဂကောံဒပ်ဗၠာဲသၟိၚ်(၄)တၠ ဂြိပ်တိတ်လဝ်တုဲ ပ္ဍဲဗ္ဒိုပ်ကၚ်ဗၠာဲသၟိၚ်ကျာ်ဣသိယဵုဂှ်လေဝ် လၟေၚ်ဒဒှ်ဂြိပ်တိတ်တံ နွံမံၚ်ရ။ 

ညးတာလျိုၚ် PDF ခရိုၚ်သဓီု ကိုဝ်အေမေန်ထောန် မဒှ်အကြာပ်ဒပ်ဇၞော် CDM မွဲတၠဂှ်တှ်ေ ပရေၚ်ဗၠာဲသၟိၚ်ဂြိပ်တိတ်တံသာတုဲဂၠိုၚ်ကၠုၚ်ဂှ် မ္ၚးနူဒးဒုၚ်ဍဵုဍိုက်ဂှ် မၞိဟ်နူဒပ်ပၞာန်တံ ကေတ်ကၠုၚ်ဒၞါဲဂၠိုၚ်ကၠုၚ်ဂှ်ရ ဗၠာဲသၟိၚ်ဂြိပ်တိတ်တံ ဂၠိုၚ်ကၠုၚ်ရဂှ် ဟီုကဵုဌာန်ပရိုၚ် သြၚ်လောန်တိုၚ်မ်ရ။ 

“ဗၠာဲသၟိၚ်ဂြိပ်တိတ်ဂွံဂၠိုၚ်ကၠုၚ်ဂှ် အတိုၚ်တီလဝ်ဂှ်ရလေဝ်။ ပွဍဵုဍိုက်ဍေံတံလေဝ်ပါမံၚ်။ တုဲပၠန် ဟိုတ်နူဍေံတံကျပရေၚ်တံလေဝ် ပါကီုရဏး။ လၟုဟ်ဟီုမ္ဂးတှ်ေ ဇၟာပ်ဒၞါဲဒးဒုၚ်ဗ္တိုက်ဂှ် ဗၠာဲသၟိၚ်တံသၟးရလေဝ်။ ဗၠာဲသၟိၚ်တံသၟးရ ဒးဒုၚ်ဗ္တိုက်မံၚ်တှ်ေ လအ်ကၠုၚ်တှ်ေ ဗၠာဲသၟိၚ်တံလေဝ် ဟွံမိက်ကၠောန် ပ္ဍဲဂကောံဒပ်ညးတံကီုရ၊ ဒးဒုၚ်ဍဵုဍိုက်ကဵုဍေံတံကီု၊ လ္ၚဵုတံဂှ် မၞိဟ်ဆက်ကၠောန်မံၚ်တံလေဝ် နွံရ။ လ္ၚဵုဂှ် ဂြောဝ်ဂတာတံဂှ် စွံလဝ်အပ္ဍဲဂှ် နကဵုဗီုပြၚ် ကောန်ထံၚ်တံကီုရ။ ဗၠာဲသၟိၚ်ဂြိပ်တိတ်တံဂှ် ဂၠိုၚ်ကၠုၚ်တွဵုရလေဝ် မုဟိုတ်ရောဟီုတှ်ေ လၟုဟ်ဂှ် ဍေံတံ နူဒပ်ဂှ် စိုပ်ကၠုၚ်ပ္ဍဲဗၠာဲသၟိၚ်တံရ။ မၞိဟ်မွဲခရက်တံဂှ် ရဲဒှ်ဒုသ္ကိုပ်ဗၠာဲသၟိၚ်ဂှ်ဒှ်၊ မၞိဟ်မွဲဍောၚ်တံဂှ်လေဝ် ရဲဒှ်သ္ကိုပ်ဗၠာဲသၟိၚ်ဂှ်ဒှ်၊ မံၚ်မွဲလစုတ်ဂှ် ဍေံတံ ကဆံၚ်တိုန်အာရလေဝ်၊ ဍေံတံပြံၚ်ကၠုၚ်တုဲ ဟွံလအ်ပုဟ် (၆)ဂိတုတှ်ေ သၠုၚ်တိုန်မွဲကဆံၚ်ရ။ လအ်ကၠုၚ်တှ်ေ ဂကောံဒပ်ဗၠာဲသၟိၚ်တံလေဝ် တၚ်ဒုၚ်စသိုၚ်ဍေံတံ နွံတွဵုရ။ လ္ၚဵုတံဂှ်လေဝ် နွံမံၚ်ရ။ ရဲသ္ပ CDM တံ ဒှ်ဂွံတၟာဂလိုၚ်ရ။ ဗၠာဲသၟိၚ်ဂြိပ်တိတ်တံဂှ် လအ်လအ်တှ်ေ ဂၠိုၚ်ကၠုၚ်ဏောၚ်ဂှ် ပိုဲတံ တၟော်လဝ်တုဲတုဲရလေဝ်၊ ဟီုတပ်ပ်တှ်ေ ညးမွဲမှလေဝ် စိုတ်မိက်ဂွံကၠောန် ဟွံမွဲရပုဟ်” ဂှ် သ္ဂးရ။ 

ဟိုတ်နူဗၠာဲသၟိၚ်ဂြိပ်တိတ်တံ ဂၠိုၚ်ကၠုၚ်ဂှ်ရ ဂကောံဒပ်ဗၠာဲသၟိၚ်ကံၚ်ဇြဳပၞာန်တံ ပ္ဍဲအရာဂေတ်ပရေၚ်ဂီုကၠီုပ္ဍဲဍုၚ်ဂှ် ဒးယှအ်ဖျေံလဝ်လၟိဟ်တံနွံတုဲ ကၠာတေံ ဒၞါဲဂေတ်ကၚ်ကဵု ဂကောံဒပ်ဗၠာဲသၟိၚ်(၁၀)တၠဂှ် လက်ကရဴဏံ နကဵုဂကောံဒပ်ဗၠာဲသၟိၚ်(၅)တၠဓဝ်ရ ဂေတ်ကၠုၚ်ကၚ်မာန်ဂှ် ဂွံတီကေတ် နူဇရေၚ် ညးစုက်လုက်ကဵု ဂကောံဒပ်ဗၠာဲသၟိၚ်တံရ။ 

ဟိုတ်နူဟွံမိက်ယိုက်ဂၠေၚ်တာလျိုၚ် သၟဝ်တဲကံၚ်ဇြဳပၞာန်ရတုဲ ဂကောံဒပ်ဗၠာဲသၟိၚ်ဂြိပ်တိတ်ကၠုၚ်လ္ၚဵုတံဂှ် သွက်ဂွံသ္ပ CDM ဂှ်ကေတ်ကၠုၚ်အဆက်တံနွံတုဲ လ္ၚဵုတံဂှ်တှ်ေ ဂြိပ်ဒဴပါဲဓလေတ်အာ လ္ပာ်ဍုၚ်ဇိုၚ်ဝုတ်ဒိုဟ်တံ နွံမံၚ်ရ။ 

ကိုဝ်အေမေန်ထောန်ဂှ်တှ်ေ ဟွံသ္ပ CDM မွဲသာ် နကဵုဗၠာဲသၟိၚ်ယိုက်ဂၠေၚ်မံၚ်တာလျိုၚ်တံ သွက်ပြဝပကီုပရာပ်ကံၚ်ဇြဳပၞာန်တံဂှ် ရံၚ်မုက်ညးဍုၚ်ကွာန်တံတုဲ သွက်ဂွံသ္ပကဵု CDMဂှ် ဖ္တိုက်ဖ္အောဝ်လဝ်ရ။ 

“ဗၠာဲသၟိၚ် CDMဟွံသေၚ်တံဂှ် အဲဂှ်မိက်ဂွံဒုၚ်ဂုဏ်ဂှ်တှ်ေ သ္ပ CDMအိုတ်ညိ ဏး။ သွက်ဂွံရံၚ်မုက်ညးဍုၚ်ကွာန်တံရ။ လၟုဟ်ဂှ်တှ်ေ ဇၟာပ်ဒၞါဲ ပွစံၚ်သ္ၚိတံ၊ နူကဵုကံၚ်ဇြဳပၞာန်တံ စံၚ်သ္ၚိတံ၊ ဂစိုတ်ဂယျိုၚ်ညးဍုၚ်ကွာန်ဓဇန်ဓဇန်တံဂှ် ဂွံဆဵုဂၠိုၚ်အိုတ်ရလေဝ်။ ပိုဲဂှ် ဗၠာဲသၟိၚ်ညးဍုၚ်ကွာန် စမံၚ်သြန်ဂိတုညးဍုၚ်ကွာန်၊ ဗၠာဲသၟိၚ်ညးဍုၚ်ကွာန်ဟီုဂှ် သွက်ဂွံနွံမံၚ်လ္ပာ်ညးဍုၚ်ကွာန်တံလၟိုန်ဂှ် သ္ဒးစုတ်လဝ်ပ္ဍဲက္ဍဟ်ဏောၚ်လေဝ်။ အဲလေဝ် နွံမံၚ်လ္ပာ်ညးဍုၚ်ကွာန်ရ။ သွက်ဂွံဒတူလိုၚ်လ္ပာ်ညးဍုၚ်ကွာန်တံဂှ် အဲလုပ်ကၠုၚ်ပ္ဍဲပၠန်ဂတးတုဲ သ္ပထောံ CDM ပ္ဍဲဂကောံဒပ်ဗၠာဲသၟိၚ်ရ။ လၟုဟ်အဲဆက်ကၠောန်မံၚ် ပရေၚ်ပၠန်ဂတးရ။ ဣဏံဂှ် တၚ်ရန်တၟအ်အဲရလေဝ်၊ အဲဒတူလိုၚ်လ္ပာ်ညးဍုၚ်ကွာန်တံ ဗိုန်န်ခိုၚ်ၚ်ရ။ ဟိုတ်ဂှ်ရ ဂကောံဒပ်ဗၠာဲသၟိၚ်သီုဖအိုတ်တံလေဝ် အတိုၚ်ညးဟီုဗၠာဲသၟိၚ်ညးဍုၚ်ကွာန်ဂှ် ဒတူလိုၚ်လ္ပာ်ညးဍုၚ်ကွာန်တံအိုတ်ညိ။ သစ္စပိုဲဖ္ဍောတ်လဝ် ပ္ဍဲတန်ဗ္တောန် နွံမံၚ်(၄)တၚ်လေဝ်၊ သစ္စ(၄)တၚ်ဏံ ပိုဲတံ သွက်ဂွံကေမ်စွံလဝ်သကေမ်တဲပိုဲလၟိုန်ဂှ် ပၟိက်ဇၞော်မံၚ်”ဂှ် သ္ဂးရ။ 

အတိုၚ်တၚ်လလောၚ်တြးအလဵုအသဳညဳသၟဟ်ဂကူ NUGဂှ်မ္ဂး ပ္ဍဲဍုၚ်ဗၟာ ပ္ဍဲကာလဒပ်ပၞာန်သီအဝဵု ပွိုၚ်ၜါသၞာံပြၚ်ဏံ ဂကောံဒပ်ဗၠာဲသၟိၚ် ၉၀၀၀ ပြၚ်တံဂှ် ပါလုပ်လဝ် ပ္ဍဲပရေၚ်ချဳဒရာၚ်ဒစဵုဒစးအဝဵု နနဲဟွံပကီုပရာပ် CDM ရဂှ် တုဲကၠုၚ် လ္ပာ်သၞာံမံက်တေံ လလောၚ်တြးလဝ်ရ။

ဂကောံဒပ်ဗၠာဲသၟိၚ်သ္ပလဝ် CDM လ္ၚဵုတံဂှ် ပါလုပ်လဝ် ပ္ဍဲအရာကလေၚ်ဗ္တိုက်ပ္တိတ် ဒပ်ကံၚ်ဇြဳပၞာန်တံတုဲ ဂကောံဒပ်ဗၠာဲသၟိၚ်လ္ၚဵုတံဂှ်တှ်ေ လ္ပာ်သ္ပမာန်တံဂှ် ရီုဗၚ်ကဵုမံၚ်ပရေၚ်ပၠန်ဂတးတံ နွံမံၚ်ရ။ 

ပရိုၚ်- သြၚ်လောန်တိုၚ်မ် 

ဗီု- Social Media