ဗော်ဍုၚ်မန်တၟိကဵု ကံၚ်ဇြဳပၞာန်တအ် ထပ်ဆဵုဂဗသဳကၠဳဒၟံၚ် ပရေၚ်ၜိုဟ်လလံ

နေပျဳဒဝ်၊ ဂျူလာၚ်(၇)

ဗော်ဍုၚ်မန်တၟိ ဒှ်ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲလိက်ကသုက် ဒေါံပန်ပှော် NCA ဂှ် ထပ်ဆဵုဂဗသဳကကၠဳလဝ် ပရေၚ်ၜိုဟ်လလံကဵု ညးစၞးကံၚ်ဇြဳပၞာန် ပ္ဍဲဂိတုဂျူလာၚ် သ္ပတံနူ စၟတ်တ္ၚဲ (၅) ပ္ဍဲနေပျဳဒဝ် ရဂှ် ကံၚ်ဇြဳပၞာန် လလောၚ်တြးလဝ်ရ။

ပေါဲသဳကၠဳပရေၚ်ၜိုဟ်လလံဏံ ညးစၞးကဝ်မတဳပ္ညဳပ္ညပ် ပရေၚ်ညဳသၟဟ်ကောန်ဂကူ ကေုာံပရေၚ် ၜိုဟ်လလံ (NSPNC) ကံၚ်ဇြဳပၞာန်ကဵု ဒုတိယဥက္ကဋ္ဌ ဗော်ဍုၚ်မန်တၟိ နာဲအံၚ်မေန်၊ ကဝ်မတဳရေၚ်တၠုၚ် ကေၚ်ကာဗဟဵု နာဲဗညာလဴ ကေုာံ နာဲအံၚ်မ္ၚဵုတအ် တိုန်စိုပ် သဳကၠဳလဝ်ရ။

ပ္ဍဲပရေၚ်ဆဵုဂဗသဳကၠဳဂှ် သောၚ်ကလးသဳကၠဳညးလဝ်ညးသ္ကအ် တၚ်တုပ်စိုပ်ဂွံလဝ် နူပေါဲသဳကၠဳကၠာတေံကဵု လစွံစိုတ် ကဝ်မတဳဗဟဵုဗော်ဍုၚ်မန်တၟိရဂှ် လ္ပာ်ကံၚ်ဇြဳပၞာန် လလောၚ်တြးလဝ် ပရိုၚ်ရ။

ပေါဲသဳကၠဳတ္ၚဲဒုတိယဂှ်မ္ဂး ဆက်ကၠောန်ဗဒှ်အာ ပ္ဍဲဂိတုဂျူလာၚ် စၟတ်တ္ၚဲ (၆)တုဲ ပ္ဍဲလ္တူပေါဲဆဵုဂဗသဳကၠဳဏံ နူလ္ပာ်ဗော်ဍုၚ်မန်တၟိ လလောၚ်တြးလဝ် မမိက်ကဵုမွဲမွဲ ဟၟဲဏီရ။

နကဵုဌာန်ပရိုၚ်သြၚ်လောန်တိုၚ်(မ်) ၜိုန်ရပ္တိတ်လဝ်ဇြဟတ် သွက်ဂွံဆက်စၠောံသၟာန်သွဟ်ကဵု ညးလုပ်ဂ ကောံ ကဝ်မတဳရေၚ်တၠုၚ်ကေၚ်ကာဗဟဵု ဗော်ဍုၚ်မန်တၟိ နာဲအံၚ်မ္ၚဵု နကဵုတေဝ်လဳဖုၚ်ကီုလေဝ် ဒုၚ်တဲ ဟီုသှ်ကဵုလဝ်ဟၟဲရ။

ကြဴနူဒပ်ပၞာန်သီအဝဵုတုဲ သ္ကုတ်လကြဴ သၞာံ ၂၀၂၁ တုဲဏံဂှ် ပေါဲသဳကၠဳပရေၚ်ၜိုဟ်လလံ က္ဍိုပ်သ္ကိုပ်ပၞာန် ဂအုပ်သ္ကိုပ်ဗိုလ်ဇၞော် မေန်အံၚ်လှာၚ်ကော်ဘိက်လဝ်ဂှ် ဂကောံရပ်လွဟ်ကောန်ဍုၚ်အရၚ် (၁၀)ဂကောံ တအ် တိုန်စိုပ်သဳကၠဳလဝ် ဟွံအောန်နူ (၅)ဝါရ။

ပ္ဍဲကဵုဂှ် ဗော်ဍုၚ်မန်တၟိမ္ဂး လ္တူနူကဵုဂကောံရပ်လွဟ်ကောန်ဍုၚ််အရၚ်တၞဟ်သ္အာၚ် လၟိဟ်အခိၚ်ဆဵုဂဗသဳ ကၠဳလဝ်ကဵု ကံၚ်ဇြဳပၞာန် ဂၠိုၚ်ဒၟံၚ်တုဲ ယဝ်ရတၟော်စုတ် သီုပရေၚ်သဳကၠဳလၟုဟ်ဏံမ္ဂး မၞုံကၠုၚ် စဵုကဵု (၆)ဝါရ။

ပ္ဍဲလ္တူဆဵုဂဗသဳကၠဳကဵုကံၚ်ဇြဳပၞာန်ဂှ် ပရေၚ်ပါ်ပါဲ ဒစဵုဒစး အကြာညးဍုၚ်ကွာန်မန်တအ် ၜိုန်ရနွံကီုလေဝ် နကဵုဗော်ဍုၚ်မန်တၟိ ဒတူလာၚ်အာ လ္တူဂၠံၚ်တရဴပၠန်ဂတးရပ်လွဟ်ဗိုန်န်ခိုၚ်ၚ်တုဲ သောၚ်ကလးအာ ပြသၞာပရေၚ်ဍုၚ်ကွာန် နပရေၚ်ဆဵုဂဗသဳကၠဳ ကုအလဵုအသဳအဆက်က်ရောၚ်ဂှ် ဂကောံရေၚ်တၠုၚ် ကေၚ်ကာဗဟဵု လလောၚ်တြးလဝ် တၚ်လစွံစိုတ် ပ္ဍဲဂိတုဖေဖဝ်ဝါရဳ စၟတ်တ္ၚဲ (၅)ဂှ်ရ။

ပရိုၚ်-သြၚ်လောန်တိုၚ်(မ်)

ဗီုရုပ်-MOI