ပ္ဍဲမိုဝ်ဗျာ ဒပ်ပၞာန်ပြိုက်ဂစိုတ်လဝ် ကောန်အရာပ် (၃၀) ပြၚ်

မိုဝ်ဗျာ – ဂျူလာၚ်(၇)

ပ္ဍဲဍုၚ်မိုဝ်ဗျာ ဗ္စပ်တွဵုရးသေံဇၞော်ကဵု တွဵုရးကရေၚ်ဍာဲဂှ် ဒပ်ကံၚ်ဇြဳပၞာန် ပြိုက်ဂစိုတ်လဝ် ကောန်အရာပ် (၃၃)တၠရဂှ် ဒပ်စဵုဒၞာကောန်ဂကူကရေၚ်ဍာဲ KNDF ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဒပ်ကံၚ်ဇြဳပၞာန် ပ္တိတ်ဒၟံၚ်ဇြဟတ် သွက်ဂွံဖျေံသ္ဇိုၚ် လ္တူဍုၚ်မိုဝ်ဗျာဂှ် သ္ပတံနူ ဂိတုဂျောန်သ္ကုတ်ကၠာတုဲ လုပ်စိုပ်ကၠုၚ် လ္တူဍုၚ်တုဲဂှ် ပန်ဂစိုတ်လဝ် ညးဒေသ ဒးဒုၚ်ကၟာတ်ဂွံလဝ် ပ္ဍဲဍုၚ်တအ် နကဵုလွဟ်တုဲ လ္ၚဵုဂှ် ဒးလဝ်လွဟ်ကံၚ်ဇြဳပၞာန်တုဲ ဒးချိုတ်လဝ်ရ။

ဟိုတ်နူကံၚ်ဇြဳပၞာန်တုဲ မ္ၚးနူကောန်အရာပ်ဒးချိုတ်လဝ် (၃၃)တၠတုဲ မၞိဟ်ကၠေံဒၟံၚ်သှ်ေနူဂှ်လေဝ် နွံရဂှ် ညးတာလျိုၚ်လလောၚ်ပရိုၚ် KNDF ကိုဝ်ဖျိုဝ် ဟီုသ္ဂးလဝ်ရ။

“ကံၚ်ဇြဳပၞာန် သုၚ်စောဲဇြဟတ်စေဝ်လ္တူတုဲ ဗတိုက်လဝ်ရ ကောန်အရာပ်ဒးဒုၚ်ကၟာတ်ဂွံလဝ် ပ္ဍဲဒၞာဲဂှ် သှ်ေဒၟံၚ် ဗွဲမဂၠိုၚ်ရ။ ကောန်အရာပ်သှ်ေဒၟံၚ် လ္တူဍုၚ်နွံရ။ ကောန်အရာပ်ၜက်သှ်ေဒၟံၚ်တအ်ဂှ် ဍေံတအ်ပန်ဂစိုတ်လဝ်ရ။ အဓိကဂှ်တှ်ေ (၃၃)တၠဟီုဂှ် ဇွညးတအ်ရလေဝ်ဏး။ ရိုဟ်လဝ် မၞိဟ်ဂွံလဝ် ပြဟ်ဟ်လၟုဟ်ဏံရ။ မၞိဟ်ကၠေံဒၟံၚ်တၞဟ်တအ်ဂှ် ဒးဒုၚ်ဂစိုတ်လဝ် ပ္ဍဲဍုၚ်တုဲ ကလေၚ်ကပှ်ကေတ်ဇွ ဟွံဂွံဏီ နွံတၟာဂလိုၚ်ရ” ဂှ် ညးဟီုသ္ဂးလဝ်ရ။

ဟိုတ်နူကံၚ်ဇြဳပၞာန်ပြိုက်ဂစိုတ်လဝ်တုဲ ပရေၚ်ကောန်အရာပ်ဇီုကပိုက်ဒးချိုတ်လဝ် ပါလုပ် သီုကောန်ၚာ်သၟတ် အာယုက် (၁၀)သၞာံမွဲတၠ နွံတုဲ အခိၚ်လၟုဟ်ဏံ သီကေတ်လဝ် သီုဍုၚ်မိုဝ်ဗျာမွဲတုဲ ဖျေံလဝ်သ္ဇိုၚ်ရဂှ် ဂွံတီကေတ်ရ။

သ္အာၚ်နူဂှ်ပၠန် ကံၚ်ဇြဳပၞာန် ရပ်ဒက်ပြိုက်ဂစိုတ်လဝ် ကောန်အရာပ်လ္ၚဵုဂှ် သီုတၚ်ရန်တၟံနွံနွံတုဲ လ္ၚဵုဂှ်မ္ဂး ဃောအာကၠုၚ်ဒၟံၚ်အကြာဂၠံၚ်ဍာန် ပန်ပှ်ောလဝ် ဒှ်မာန်ရဂှ် ဂွံတီကေတ်ရ။

အတိုၚ်တၚ်လဟီု KNDF မ္ဂး ဃောအာကၠုၚ်ဒၟံၚ်ကဵုကွဳလိုန်ဓာတ် ဟိုတ်နူဒးဒုၚ်ပန်လဝ်တုဲ မၞိဟ်ဒးချိုတ်ဒၟံၚ်ပ္ဍဲဗ္ဒာဲကွဳလိုန်ဓာတ်နွံဒၟံၚ်တုဲ ပ္ဍဲကွဳလိုန်ဓာတ်ဂှ် ဂွံညာတ်ကေတ်လဝ် ပၞေတ်မကမ်ဗွဲမဂၠိုၚ်ရဂှ် ဂွံတီကေတ်ရ။

ပ္ဍဲမွဲကာလဒပ်ပၞာန်သီအဝဵုဏံ ပ္ဍဲတွဵုရးကရေၚ်ဍာဲဂှ် ကောန်အရာပ်ဒးချိုတ်လဝ် ဟိုတ်နူကံၚ်ဇြဳပၞာန် စဵုကဵု (၃၆၅)တၠ နွံရဂှ် ဓမံက်ထ္ၜးလဝ် ပ္ဍဲတၚ်ဂၞၚ် ဂကောံဇြဟတ်တဴတက် ညးဍုၚ်ကွာန်ကရေၚ်ဍာဲ PKPF ရ။

ပရိုၚ် – သြၚ်လောန်တိုၚ်(မ်)

ဗီုရုပ် – Mobye People Defense Force