ရုၚ်ဂအုပ် ဗော် NLD ပွိုၚ်ဍုၚ်ဇြပ်ဗု ဒးဒုၚ်ကၟာတ်ဒၞာလဝ်

ဇြပ်ဗု၊ ဂျူလာၚ်(၇)

တွဵုရးဍုၚ်မန် ဗ္ဒမ်သုၚ်စောဲလဝ် နဒဒှ်ရုၚ် ဗော်ဒဳမဝ်ကရေဇြဳကောန်ဂကူ NLD ပွိုၚ်ဍုၚ်ဇြပ်ဗုဂှ် ဒပ်ကံၚ်ဇြဳပၞာန် ကဵုဂကောံပရေၚ်အုပ်ဓုပ်တအ် ကၠုၚ်စိုပ်ကၟာတ်ဒၞာလဝ်ရဂှ် ကောန်ဍုၚ်ဇြပ်ဗုတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။ 

ရုၚ်ဗော် NLD ပွိုၚ်ဍုၚ် မၞုံအရာပ်အံၚ်ဇေယျ ဍုၚ်ဇြပ်ဗုဂှ် ပ္ဍဲဂိတုဂျူလာၚ် စၟတ်တ္ၚဲ (၅)အခိၚ်နူဂယး ၜိုတ် (၁၁) နာဍဳဂှ် ကံၚ်ဇြဳပၞာန် ကၠုၚ်စိုပ်ကၟာတ်ဒၞာ သီကေတ်လဝ်ရ။ 

ဗ္ဒမ်ဒးဒုၚ်ကၟာတ်ဒၞာလဝ်ဂှ် ဒှ်ဗ္ဒမ်ကောန်ဍုၚ်ဇြပ်ဗု ဒဝ်မျေအ်မျေအ်ခိုၚ် ပိုၚ်ပြဳလဝ်တုဲ နကဵုတၚ်စောတ်စောဲ ညးစၞးကၠတ်ထဝ်ဒဝ်မျေတ်ဒဳတာထောန် လိၚ်သုၚ်စောဲဒၟံၚ် ဗ္ဒမ်ဂှ် ကံၚ်ဇြဳပၞာန် ကၟာတ်ဒၞာသီကေတ်လဝ်ရ။ 

ညးစၞးကၠတ်ထဝ်ကောန်ဂကူ ပွိုၚ်ဍုၚ်ဇြပ်ဗု ဒဝ်မျေတ်ဒဳတာထောန်ဂှ် မ္ၚးနူသၞောဝ်ဥပဒေဗတိုက်သရိုဟ် ပွပ္ကီုပရာပ်တုဲ ကံၚ်ဇြဳပၞာန် ပံက်လဝ်ဂဗုတ် နကဵုၝောံပိုဒ် ရာဇသာတ်ဇၞော်ရ။ 

ပ္ဍဲဂိတုဂျောန် စၟတ်တ္ၚဲ(၂၀) တုဲကၠုၚ်တေံလေဝ် ကံၚ်ဇြဳပၞာန် ကၟာတ်ဒၞာလဝ် သ္ၚိဒၟံၚ်ညးစၞးကၠတ်ထဝ်ဗော် NLD ပွိုၚ်ဍုၚ်ကျာ်မြဟ် ဒဝ်ခေန်မျိုဝ်မျေတ် နကဵုတၚ်စောတ်စောဲ ဆက်စပ်ဒၟံၚ်ကဵု ဂကောံပ္ကီုပရာပ်ရ။ 

အလုံမွဲကၟိန်ဍုၚ် ပ္ဍဲအခိၚ်ဒပ်ပၞာန်သီလဝ်အဝဵု ပွိုၚ်ၜါသၞာံဏံ ကံၚ်ဇြဳပၞာန် ကၟာတ်ဒၞာ သီကေတ်လဝ် သ္ၚိဒၟံၚ်ကီု သီုပရေၚ်ပိုၚ်ပြဳ ညးစၞးကၠတ်ထဝ် ဗော် NLD ၊ ကောန်ဗော် NLD ကေုာံကောန်အရာပ်ညးဍုၚ်ကွာန်တအ် (၆၀၀)ပြၚ်ရဂှ် ဗဟဵုဗော် NLD လလောၚ်တြးလဝ် ပ္ဍဲဂိတုဂျောန် စၟတ်တ္ၚဲ ၁၃ ဂှ်ရ။ 

ပရိုၚ်-သြၚ်လောန်တိုၚ်(မ်)

ဗီုရုပ်-SBM