ဒပ်ပံၚ်ကောံလုပ်ဗတိုက် ကုန်ဗဒိုပ်တိုၚ်တာဝါ ပရေၚ်ဆက်စၠောံဒပ်ပၞာန် မၞုံပွိုၚ်ဍုၚ်ရေဝ်

ရေဝ်၊ ဂျူလာၚ်(၈)

ကုန်ဗဒိုပ်တိုၚ်တာဝါ ပရေၚ်ဆက်စၠောံကံၚ်ဇြဳပၞာန် ဖျေံလဝ်သ္ဇိုၚ် ပ္ဍဲလ္တူဒဵု ကွာန် (၁၄)မိုၚ် ပွိုၚ်ဍုၚ်ရေဝ် တွဵုရးဍုၚ်မန်ဂှ် ဒပ်ပံၚ်ကောံ ဂကောံဇြဟတ်ပၠန်ဂတးတအ် လုပ်စိုပ်ဗတိုက်လဝ်ရဂှ် ဒပ်ဒမၠုက်ရေဝ် လလောၚ်တြးလဝ်ရ။

ကုန်ဗဒိုပ် သီုသၞာဲဒဴဒပ်ပၞာန် ဇြဟတ်ဒပ်နွံ (၁၀)တၠပြၚ် ဖျေံလဝ်ဗဒိုပ်ဂှ် ပ္ဍဲဂိတုဂျူလာၚ် စၟတ်တ္ၚဲ (၆) အခိၚ်ဗ္တံ ၜိုတ် (၁၁) နာဍဳဂှ် ဒပ်ပၞာန်ဗၠးၜးကောန်ဂကူကရေၚ် KNLA တံဒပ် (၂၇) ကေုာံဒပ်ဒမၠုက်ရေဝ်တအ် လုပ်စိုပ်ဗတိုက်လဝ်ရ။

ဃောလုပ်စိုပ်ဗတိုက်လဝ် ကုန်ဗဒိုပ်ဂှ် ဟိုတ်နူပရေၚ်ကလေၚ်ပန်ဗတိုက် နူလ္ပာ်ကံၚ်ဇြဳပၞာန် ဟၟဲဂှ်ရ စံၚ်ပလီုလဝ် တိုၚ်တာဝါဆက်စၠောံကီု သီုကဵုဒၞာဲဗဒိုပ်ကုန်ရဂှ် ညးတာလျိုၚ်ဒပ်ဒမၠုက်ရေဝ် ဗိုလ်ကျာန်ယျေတ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ပရေၚ်လုပ်စိုပ်ဗတိုက်လဝ်ဂှ် ဟိုတ်နူဒှ်ဒၟံၚ်အခိၚ်ဗ္တံတုဲ ပရေၚ်ဇီုကပိုက်ချိုတ်ဂျိုၚ်ဂှ် သ္ပဒ္တန် နမတ်ဟွံမာန်တုဲ ကောန်ဒပ်ကံၚ်ဇြဳပၞာန်တအ် ဂြိပ်ဒဴ ပါဲဓလေတ်လဝ်ရဂှ် ဟီုသ္ဂးလဝ်ရ။

ပ္ဍဲပရေၚ်လုပ်ဗတိုက်လဝ် ကုန်ဗဒိုပ်ဂှ် သီဂွံလဝ် မိုၚ်တိတ်ဂတ၊ ဗုမ်ကၠဟ်၊ မကမ်၊ ဖျေဲကမ်၊ မကမ် ၄၀ မမ ကေုာံ ကပေါတ်ဆက်စပ် နူကံၚ်ဇြဳပၞာန်ရဂှ် ဒပ်ဒမၠုက်ဍုၚ်ရေဝ် လလောၚ်တြးလဝ်ရ။

ကုန်ဗဒိုပ်တိုၚ်တာဝါဆက်စၠောံဂှ် ဒှ်ဒၞာဲသွက်ဂွံဆက်စၠောံ စက်ဆက်စၠောံကံၚ်ဇြဳပၞာန် ရးတၞၚ်သြဳကဵု တွဵုရးဍုၚ်မန် ဒၞာဲပၟိက်ကိစ္စဇၞော် မွဲဒၞာဲတုဲ နွံခြာတိတ်ဒၟံၚ် နူတံဒပ်ပၞာန်တိုက် ခမရ (၂၉၉) ခရာမွဲမိုၚ်ရ။

ပ္ဍဲဂိတုဂျောန် စၟတ်တ္ၚဲ (၂၅)တုဲကၠုၚ်တေံလေဝ် ဟိုတ်နူကောန်ဒပ်ကံၚ်ဇြဳပၞာန် ဖျေံလဝ်ဗဒိုပ် ပ္ဍဲဗဒိုပ်ကၚ်ဗၠာဲသၟိၚ် မၞုံကွာန်နှေဟ်ခြေၚ်ဂှ် ဒးဒုၚ်ဗတိုက်လဝ်တုဲ ဗၠာဲသၟိၚ်မွဲတၠ ဒးချိုတ်လဝ်တုဲ ကောန်ပၞာန်မွဲတၠ ဂွံလဝ်ဘဲဝပ်ရ။

ပွိုၚ်ဍုၚ်ရေဝ် လလောၚ်တြးလဝ် ပရေၚ်အုပ်ဓုပ်ပၞာန်ဂှ် သ္ပတံနူ ဂိတုဂျောန် သၞာံသီလဝ်အဝဵုဏံတုဲ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်က္တဵုဒှ်ဒၟံၚ် ကြဳကြဳသိၚ်ၚ်တုဲ ပရေၚ်ပၞာန်ၜါလ္ပာ် သာတုဲ ကြံၚ်မ္ၚိုဟ်ကၠုၚ်ဒၟံၚ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် -Ye Guerrilla Force