ဂကောံကၠုၚ်ပလေဝ် ဒဒန်ဂျုၚ်အုက်ၜဳကလေၚ် ဒးဒုၚ်ဗ္တိုက်

ၜဳကလေၚ်၊ ဂျူလာၚ် (၇)

ဂကောံကၠုၚ်ပလေဝ် ဒဒန်ဂျုၚ်အုက်ၜဳကလေၚ် လ္တူဂၠံၚ်ကွဳစက်မတ်မလီု−လ္ဂုၚ် မဒးဒုၚ်ဖံက်ဗ္တိုဟ် လဝ်မာၚ်ဂှ်ဝွံ ပ္ဍဲဂိတုဂျူလာၚ် (၇) အခိၚ်နူဂယး ၜိုတ် (၇) နာဍဳဂှ် ဒးဒုၚ်ဗ္တိုက်လဝ် ကဵုဒရုၚ်ဂှ်ရ ကလိဂွံဝပ်ဇီုကပိုက်တံ နွံလဝ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒဒန်ဂျုၚ်အုက် မၞုံလ္တူဂၠံၚ်လ္ဂုၚ်−မတ်မလီု ဗ္ဒါဲကွာန်ယှိုဲယျံၚ်ပျ အကြာပွိုၚ်ဍုၚ်ၜဳကလေၚ်ကဵု ပွိုၚ်ဍုၚ်သဓီု တွဵုရးဍုၚ်မန်တံဂှ် ပ္ဍဲဂိတုဂျောန် (၂၉) အခိၚ်နူဂယး ၜိုတ် (၄) နာဍဳကဝက်ဂှ် ဂကောံဒပ်ပံၚ် ကောံပၠန်ဂတးတံ ဖံက်ဗ္တိုဟ်လဝ်မာၚ်ရ။

ပ္ဍဲကဵုဒဒန်ဂျုၚ်အုက် မဒးဒုၚ်ဖံက်ဗ္တိုဟ်လဝ်မာၚ် ပလီုပလာ်လဝ်ဂှ် သွက်ဂွံထ္ပက်ဒဒန်ဘေလဳယာယဳ အခိၚ်ဒပ်ကံၚ်ဇြဳပၞာန်၊ ဌာနက္ဍိုက်ပ်ဂၠံၚ်တံကဵု ညးယိုက်ဝန် နူကမ္ပဏဳယှိုဲတာန်လွေန်တံ ကၠုၚ်စိုပ်ပလေဝ် ပလေတ်ဂှ် ဂကောံဒပ်ဗၠးၜးကောန်ဂကူကရေၚ် KNLA, ဂကောံဒပ်ပံၚ်ကောံ PDF တံ ထောံဗုမ်ကဵုဒရုၚ် (၃) မတုဲ ဗ္တိုက်လဝ်ရ။

ဟိုတ်နူဒးဒုၚ်ဗ္တိုက်လဝ်ကဵုဒရုၚ်ဂှ်ရ ကောန်ဒပ်ကံၚ်ဇြဳပၞာန် (၁) တၠ၊ ညးယိုက်ဝန် ကၠုၚ်စိုပ်ပလေဝ်ဒဒန် (၂) တၠ ကလိဂွံလဝ်ဝပ်ဂှ်ရ ပလံၚ်ဗစိုပ်လွဳလဝ် ပ္ဍဲကဵုရုၚ်ဂဥုဲဒုၚ်သုက်ကဵု ရုၚ်ဂဥုဲခရိုၚ်သဓီုတံရ။

ကြဴနူဂကောံကၠုၚ်စိုပ်ပလေဝ်ဒဒန် ဒးဒုၚ်ဗ္တိုက်တုဲဂှ် ကံၚ်ဇြဳပၞာန်ဂှ် ဒေါအ်ထောံလဝ် လၟေၚ်ကမၠောန် သ္ဂောံထ္ပက်ဒဒန်ဘေလဳယာယဳဂှ် ဂွံတီကေတ်ရ။

ပရေၚ်ဖံက်ဗ္တိုဟ် ဒဒန်ဂျုၚ်အုက်ဂှ်ဝွံ လ္ဂောံကဵုပရေၚ်ပၞာန်တုဲ ထပိုတ်လဝ် ဂၠံၚ်တရဴထံက်ပၚ်ဇွောံမ ဒပ်ကံၚ်ဇြဳပၞာန်တံရောၚ်ဂှ် ဥက္ကဌကမ္မတဳကောပ်ကာဲကေၚ်ကာမိတ် ခရိုၚ်သဓီု KNU ဟီုဂးလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။

တ္ၚဲဏံလေဝ် ဂကောံဒပ်ပံၚ်ကောံ PDF, KNLA တံ အာစိုပ်ဗ္တိုက်လဝ် ဌာန်ဂအုပ် ၝောံဒပ်ကံၚ်ဇြဳပၞာန် ၄၄ ဖျေံသ္ဇိုၚ်ပွိုၚ်ဍုၚ်ကျာ်ထဝ်ဂှ်ကဵု ဒပ်အမၠံက် ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်ၜဳကလေၚ်တံဂှ်တုဲ အကာဲအရာဇီုကပိုက်ချိုတ်ဂျိုၚ် ဗွဲလစှ်ေ ဂှ် ဟွံဂွံတီကေတ်ဏီရ။

ပ္ဍဲကဵုပရေၚ်ဖံက်ဗ္တိုဟ်မာၚ် ဒဒန်ဂျုၚ်အုက်ဂှ် ထပ်ဗ္တိုက်လဝ် ဒပ်ကံၚ်ဇြဳပၞာန်ကဵု ဌာနမဆေၚ်စပ် ကၠုၚ်စၟဳတ်တံပၠန်ဂှ်ရ ညးယိုက်ဝန်နူကဵုဌာနမဆေၚ်စပ်တံ (၃) တၠ ချိုတ်တုဲ (၂၆) တၠ ကလိဂွံလဝ်ဝပ်ဏီရ။

ပရိုၚ်−သြၚ်လောန်တိုၚ်(မ်)

ဗီု−Social Media