ပ္ဍဲၜဳကလေၚ် ဟိုတ်နူလွဟ်ဇၞော်စှ်ေတုဲ ညးဒေသ (၆) တၠ ဒးလဝ်ဘဲဝပ်

ၜဳကလေၚ်၊ ဂျူလာၚ်(၉)

တွဵုရးဍုၚ်မန် ပွိုၚ်ဍုၚ်ၜဳကလေၚ် ပ္ဍဲကွာန်ယှိုဲယောၚ်ပျ ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ညးဒေသ ကောန်အရာပ်ညးဍုၚ်ကွာန် (၆)တၠ ပါလုပ်သီုကောန်ၚာ်သၟတ် (၂)တၠ ဒးလဝ်ဘဲဝပ်ရဂှ် KNU ခရိုၚ်သဓီု လလောၚ်တြးလဝ် ပ္ဍဲဂိတုဂျူလာၚ် စၟတ်တ္ၚဲ (၈)ရ။

ပ္ဍဲဂိတုဂျူလာၚ် စၟတ်တ္ၚဲ (၇) အခိၚ်နူဂယး ၜိုတ် (၁၁)နာဍဳဂှ် နူဒပ်အမၠံက်ကံၚ်ဇြဳပၞာန် စၟတ် (၃၁၄) ဖျေံသ္ဇိုၚ်ဇြဳဝေါန် သီုပေါဲဗတိုက်ဟၟဲမွဲသာ် ပန်ဖျေံလဝ်လွဟ်ဇၞ်ော ပ္ဍဲကွာန်ယှိုဲယောၚ်ပျ ကြာန်န်ရ။

မကမ်လွဟ်ဇၞော်ဒပ်ကံၚ်ဇြဳပၞာန် ပန်ဖျေံလဝ်ဂှ် ဒတုံစှ်ေ ပါ်ခတိုဟ်လဝ် ဗ္ဒာဲသ္ၚိနဝ်တေန်အေ ကွာန်ယှိုဲယောၚ်ပျရ။

ဟိုတ်နူလွဟ်ဇၞော်ဒတုံစှ်ေပါ်ခတိုဟ်လဝ်တုဲ ကောန်ၚာ်သၟတ်အာယုက် (၅)သၞာံကဵု အာယုက် (၆)သၞာံ (၂)တၠ ဂွံလဝ်ဘဲဝပ်တုဲ ညးဒေသ (၄)တၠ ပါလုပ်သီုနဝ်တေန်အေ အာယုက် (၅၇)သၞာံ ဒးလဝ်ဘဲဝပ်ရ။

ညးဒေသဒးလဝ်ဘဲဝပ်လွဟ်ဇၞော်တအ်ဂှ် ဒပ်ဂဥုဲ ဗော်သွးကောန်ဂကူကရေၚ် KNU လွဳလွတ်ကဵုဒၟံၚ် နဒဒှ်ကာတၟေၚ်ရဂှ် ဂွံတီကေတ်ရ။

ဒပ်အမၠံက်ကံၚ်ဇြဳပၞာန် စၟတ် (၃၁၄)ဂှ် ကြဴနူဒပ်ပံၚ်ကောံ KNLA တအ် လုပ်ထောံဖျေံဗုမ် နကဵုဒရုမ် ပ္ဍဲဂိတုဂျူလာၚ် စၟတ်တ္ၚဲ (၇) အခိၚ်နူဂယးပြဟ်တုဲဂှ် ဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော် ပ္ဍဲကွာန်သီုဟိုတ်ဟၟဲမွဲသာ်ရ။

ပ္ဍဲပရေၚ်ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ဗတိုက်ထောံဖျေံလဝ်ဗုမ် နကဵုဒရုမ်ဂှ် စပ်ကဵုကောန်ဒပ်ကံၚ်ဇြဳပၞာန် ဇီုကပိုက်ချိုတ်ဂျိုၚ်လဝ်နွံဟၟဲ နကဵုသြၚ်လောန်တိုၚ်(မ်) ဆက်ဂၠိုက်ဂၠာဲဒၟံၚ်ဖိုဟ်ရ။

ပွိုၚ်ဍုၚ်ၜဳကလေၚ် ပ္ဍဲမွဲကာလဒပ်ပၞာန်သီအဝဵုဏံ ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော်တုဲ ပရေၚ်ကောန်အရာပ်ညးဍုၚ်ကွာန် ဒးချိုတ်လဝ် က္တဵုဒှ်ဒၟံၚ် အဆက်က်ရဂှ် ဂွံတီကေတ် အတိုၚ်တၚ်လလောၚ်တြး KNU ခရိုၚ်သဓီုရ။

ပရိုၚ်-သြၚ်လောၚ်တိုၚ်(မ်)

ဗီုရုပ်-KNU