ပြသၞာပရေၚ်ဍုၚ်ကွာန်ဂှ် သောၚ်ကလးအာ နနဲကဲဂၠံၚ်တရဴပရေၚ်ဍုၚ်ကွာန်ဏောၚ် ဗော်ဍုၚ်မန်တၟိဟီု

မတ်မလီု၊ ဂျူလာၚ်(၈)

ဗော်ဍုၚ်မန်တၟိ ဒှ်ဗော်ရပ်လွဟ်ကောန်ဍုၚ်အရၚ် ဒေါံပန်ပှော်မွဲဂကောံဂှ် ပြသၞာပရေၚ်ဍုၚ်ကွာန်ဂှ် သောၚ်ကလးအာ နနဲကဲဂၠံၚ်တရဴပရေၚ်ဍုၚ်ကွာန်ရောၚ်ဂှ် က္ဍိုပ်သ္ကိုပ်ဗော်ကဆံၚ်လ္တူလ္ၚဵုတအ် ဟီုသ္ဂးလဝ်ရ။

ပ္ဍဲဂိတုဂျူလာၚ်စၟတ်တ္ၚဲ (၅)ကဵု စၟတ်တ္ၚဲ(၆)တုဲကၠုၚ်ဏံ ဒုတိယဥက္ကဋ္ဌ ဗော်ဍုၚ်မန်တၟိနာဲအံၚ်မေန်၊ ကဝ်မတဳရေၚ်တၠုၚ်ကေၚ်ကာဗဟဵု နာဲဗညာလဴ ကေုာံ နာဲအံၚ်မ္ၚဵုတအ် အာစိုပ်ဆဵုဂဗလဝ်ကဵု ညးစၞးကဝ်မတဳပ္ညဳပ္ညပ်ဓမံက်ရုပ်ရဴ ပရေၚ်ညဳသၟဟ်ကောန်ဂကူ ကေုာံ ပရေၚ်ၜိုဟ်လလံ (NSPNC)ရ။

စပ်ကဵုပရေၚ်ဆဵုဂဗဏံတုဲ နူမုက်လိက် Facebook လလောၚ်ပရိုၚ်ဗော်ဍုၚ်တၟိ လလောၚ်တြးလဝ် အစဳဇန်သၟာန်သွဟ် နာဲဗညာလဴ၊ နာဲအံၚ်မ္ၚဵု မဒှ်ကဝ်မတဳရေၚ်တၠုၚ်ကေၚ်ကာဗဟဵုဗဟဵုတအ် နကဵုဘာသာမန်ရ။

အတိုၚ်တၚ်လဟီု နာဲဗညာလဴမ္ဂး စပ်ကဵုတၚ်ဒတူလာၚ်ဗော်ဍုၚ်မန်တၟိ အခိၚ်တ္ၚဲဏံတုဲ ပြသၞာပရေၚ် ဍုၚ်ကွာန်ဂှ် သွက်ဂွံသောၚ်ကလးအာ နနဲကဲဂၠံၚ်တရဴပရေၚ်ဍုၚ်ကွာန် ကေံဇြာပ်လဝ်လၟိုန်ရဂှ် ဟီုသ္ဂးလဝ်ရ။

ပ္ဍဲပေါဲသဳကၠဳပရေၚ်ဍုၚ်ကွာန် အာဂတဏံ ဂကောံသီုဖအိုတ်ဒးပါလုပ်တုဲ ကြဴနူဒပ်ပၞာန်သီကေတ်အဝဵု တုဲဂှ် ဟိုတ်နူဂကောံဒစဵုဒစးတအ် မံက်ဂတဝ်တိတ်ကၠုၚ် ဗွဲမဂၠိုၚ်ဂှ်ရ ဆၜိုတ်သဳကၠဳကဵု ဂကောံ EAO (၁၀)ဂကောံဓဝ် ကလိဂွံသွဟ်ခိုဟ်မာန် ဟွံသေၚ်ရဂှ် ညးဆက်ဟီုလဝ်ရ။

ညံၚ်သွဟ်ခိုဟ်ဂွံတိတ်ကၠုၚ် ဗော်ပရေၚ်ဍုၚ်ကွာန်သီုဖအိုတ် ဒးပါလုပ်တုဲ ဂကောံဒစဵုဒစး သီုဖအိုတ်လေဝ် ဒးပါလုပ်ရောၚ်ဂှ်ရ ဗော် SNLD ကေုာံ NLD မဒှ် ဗော်ပရေၚ်ဍုၚ်ကွာန်ဝှ်ကြံၚ်တအ် ဒးပါလုပ် ၜိုတ်ထေက်ကြိုက်ဟေၚ်မှ ဗော်ဍုၚ်မန်တၟိ ဆက်ပါလုပ်အာ ပ္ဍဲပေါဲသဳကၠဳပရေၚ် ၜိုဟ်လလံမာန်ရောၚ်ဂှ် နာဲဗညာလဴ ဟီုသ္ဂးလဝ်ရ။

ဆ္ဂးဂှ် ဥက္ကဋ္ဌဗော်ဍုၚ်မန်တၟိနာဲဟံသာဂှ်မ္ဂး ပ္ဍဲပေါဲဗတိုက် ဗတိုက်သရိုဟ်သၞောတ်တၠအဝဵုပၞာန် ပရေၚ်ပၠန်ဂတးက္ညၚ်ဏံ ယဝ်ဂကောံရပ်လွဟ်ကောန်ဍုၚ်အရၚ်တအ် ပါလုပ်သီုဖအိုတ်မ္ဂး ညးတအ် လေဝ် ပါလုပ်အာကီုဏောၚ်ဂှ် ဟီုသှ်လဝ် ပ္ဍဲအေန်တာဗျူဌာန်ပရိုၚ်ဗၠးၜးမန် ပ္ဍဲဂိတုဂျောန် တုဲကၠုၚ်တေံရ။

ကြဴနူဒပ်ပၞာန်သီအဝဵုတုဲ ဂကောံ EAO ထ္ပက်စၟတ်တဲဒေါံပန်ပှော် (၇) ဂကောံကဵု ဂကောံ EAO ဟွံဂွံထ္ပက်စၟတ်တဲ (၃) ဂကောံ တိုန်စိုပ်လဝ် ပေါဲသဳကၠဳပရေၚ်ၜိုဟ်လလံ က္ဍိုပ်သ္ကိုပ်ပၞာန် ဂအုပ်သ္ကိုပ် ဗိုလ်ဇၞော်မေန်အံၚ်လှာၚ် ကော်ဘိက်လဝ် ဟွံအောန်နူ (၅)ဝါရ။

ပ္ဍဲကဵုဂှ် ဗော်ဍုၚ်မန်တၟိ ဒှ်ဂကောံရပ်လွဟ်ကောန်ဍုၚ်အရၚ်မန် အကြာညးဍုၚ်ကွာန်မန်တအ် ဒစဵုဒစးဆေဝ်တာဒၟံၚ်ဂှ် တိုန်စိုပ်သဳကၠဳလဝ်ကဵုကံၚ်ဇြဳပၞာန် နမွဲဂကောံကီု အကြာဂကောံဂမၠိုၚ်ကီု စဵုကဵု (၆) ဝါရ။

ပရိုၚ်-သြၚ်လောန်တိုၚ်(မ်)

ဗီုရုပ်-NMSP