ဗုံခတိုဟ်လဝ် ဗ္ဒာဲရုၚ်လဝက ထဝါဲ ၊ ညးတြုံ (၁)တၠ ဒးလဝ်ဘဲဝပ်

ထဝါဲ၊ ဂျူလာၚ်(၉)

ရးဒေသဇၞော်တၞၚ်သြဳ ဗ္ဒာဲရုၚ်ပရေၚ်ကောပ်ကာဲမၞိဟ်လုပ်တိတ်ကံၚ်ဇြဳပၞာန် မၞုံဍုၚ်ထဝါဲဂှ် ဂဗုတ်ဗုမ်ပါ်ခတိုဟ် က္တဵုဒှ်လဝ်တုဲ ညးတြုံမွဲတၠ ဂွံလဝ်ဘဲဝပ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

တ္ၚဲဏံ ဂိတုဂျူလာၚ် စၟတ်တ္ၚဲ (၈) ပ္ဍဲအခိၚ်ဒေါဝ်တ္ၚဲ ၜိုတ် (၁၂) နာဍဳ ပ္ဍဲဂၠံၚ်ဗ္ဒာဲရုၚ်လဝကဂှ် ဂဗုတ်ဗုမ်ပါ်ခတိုဟ် က္တဵုဒှ်လဝ်ရ။

ဟိုတ်နူဗုံပါ်ခတိုဟ်လဝ်တုဲ ညးတြုံ အာယုက် (၃၀)ပြၚ် ဒၟံၚ်အရာပ်ဝေဝ်ကျောန် ဍုၚ်ထဝါဲ ကၠုၚ်ကၠောန်တၞးကာဒ်ကောန်ဍုၚ်မွဲတၠဂှ် ဒးလဝ်ဘဲဝပ်ကဝေက်မာၚ် ပ္ဍဲဇိုၚ်ကဵု ပ္ဍဲဇကုတုဲ ပလံၚ်ဗစိုပ်ဏာလဝ် ရုၚ်ဂဥုဲထဝါဲ နဒဒှ်ကာတၟေၚ်ရဂှ် ဂွံတီကေတ်ရ။

ကြဴနူဂဗုတ်ဗုမ်ခတိုဟ် ဒှ်လဝ်တုဲဂှ် ကောန်ဒပ်ကံၚ်ဇြဳပၞာန်စိုပ်ကၠုၚ်တုဲ စၟဳစၟတ်ဒၟံၚ် မၞိဟ်အာကၠုၚ် အကြာဂၠံၚ်ကီု သီုလုပ်စၟဳစၟတ်လဝ် ပ္ဍဲရုၚ်လဝကရဂှ်ရ။

ဆ္ဂးဂှ်ပရေၚ်ဒဒှ်ဗုမ်ပါ်ခတိုဟ်ဏံဂှ် လ္ပာ်ဒပ်စဵုဒၞာညးဍုၚ်ကွာန် PDF တအ်လေဝ် လလောၚ်တြးလဝ် မမိက်ကဵုမွဲမွဲ ဟွံဂွံဆဵုလဝ်ဏီရ။

ပ္ဍဲဂိတုအဝ်ဂေတ် စၟတ်တ္ၚဲ (၃၀)တုဲကၠုၚ်တေံလေဝ် ရုၚ်လဝကကဵု ကညန မၞုံဍုၚ်ထဝါဲဂှ် ဒးဒုၚ်ဗတိုက်လဝ်တုဲ ဟိုတ်နူဗၠာဲသၟိၚ်ထိၚ်ယာန်တြေံ ဥူညောအ်ယှိုဲ တိတ်ကၠုၚ်နူရုၚ်လဝက ဒးဒုၚ်ပန်ဂစိုတ်လဝ်တုဲ ဒးချိုတ်လဝ်ရ။

ရးဒေသဇၞော်တၞၚ်သြဳ ပ္ဍဲကအ်သံၚ်ဂှ်လေဝ် ဟိုတ်နူပရိုၚ် PDF တအ်လုပ်ဏောၚ်ဂးတုဲ ဒပ်ကံၚ်ဇြဳပၞာန် ပတေၚ်ဂြတ်လဝ် ပရေၚ်ဂီုကၠီု ပ္ဍဲဍုၚ်မ္ၚးဍုၚ်တုဲ ကၟာတ်ဒၞာ ဂၠိုက်ဂၠာဲ စၟဳစၟတ်ဒၟံၚ်ရဂှ် ဂွံတီကေတ် နူညးဒေသတအ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – Social Media