ဟိုတ်နူဒပ်ပၞာန် ထ္ပက်လုပ်ကရောၚ်ပၞာန်တုဲ ညးဒေသညံၚ်လေဝ်ပေန် ဗ္ဒာဲ ၅,၀၀၀ ဒးဂြိပ်ဒဴဒၟံၚ်

ညံၚ်လေဝ်ပေန်၊ ဂျူလာၚ်(၉)

ဒပ်ကံၚ်ဇြဳပၞာန် ထ္ပက်လုပ်ကၠုၚ်ပၞာန် ပ္ဍဲတိဍာ်ဗော်သွးကောန်ဂကူကရေၚ် KNU ခရိုၚ်ညံၚ်လေဝ်ပေန် ဒပ်မဟာ (၃)တုဲ ဟိုတ်နူပန်ဖျေံဒၟံၚ်လွဟ်ဇၞော် အဆက်ဟွံပိုတ်သ္ကုတ်ဂှ်ရ ညးဒေသ ဗ္ဒာဲ ၅,၀၀၀ တၠ ဒးဂြိပ်ဒဴဒၟံၚ်ရဂှ် ဗဟဵု KNU လလောၚ်တြးလဝ်ရ။

ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်တုဲ ပ္ဍဲခရိုၚ်ညံၚ်လေဝ်ပေန် KNU ဂှ် သ္ပတံနူ ဂိတုဂျူလာၚ် စၟတ်တ္ၚဲ (၁) စဵုကဵု စၟတ်တ္ၚဲ(၅) အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ဒပ်မဟာ(၃)တအ် ပေါဲဗတိုက်ဒှ်လဝ် ဟွံအောန်နူ(၉)ဝါရ။

ပ္ဍဲကဵုပေါဲဗတိုက်ဂှ် ဒပ်ကံၚ်ဇြဳပၞာန် ကၠောန်သ္ပဒၟံၚ် ပွမပန်ဖျေံလွဟ်ဇၞော်ပ္ဍဲကွာန်၊ ရပ်ဒက်ဒၟံၚ် ကောန်အရာပ်ညးဍုၚ်ကွာန် ပ္ဍဲမွဲဒမြိပ်ဂၠံၚ် ထ္ပက်လုပ်ကၠုၚ်ဒၟံၚ်ကရောၚ်ပၞာန်ဂှ် အဆက်ဆက်ရ။

ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်တုဲ ဟိုတ်နူပန်ဖျေံလွဟ်ဇၞော် ဍောတ် ပ္ဍဲကွာန်ဂမၠိုၚ် သီုတၚ်ရန်တၟံနွံနွံဂှ်ရ ကောန်အရာပ်ညးဍုၚ်ကွာန် (၂)တၠ ဒးချိုတ်လဝ်တုဲ ဇီုကပိုက်ဂွံလဝ်ဘဲဝပ် (၆)တၠရဂှ် ဓမံက်လဝ် ပ္ဍဲတၚ်လလောၚ်တြးရ။

ဟိုတ်နူပရေၚ်ပန်ဖျေံလွဟ်ဇၞော်တုဲ သ္ၚိဒၟံၚ် (၁၃)မ၊ တာဲအှော် (၁)မ၊ စက်ဗာ်ချောဲ (၁)မွဲမ ဒးခရိုဟ်လီု ဆောံလေၚ်လဝ်တုဲ ဂၠဴ(၃)လေဝ် ဒးချိုတ်လဝ်ရဂှ် ဟီုသ္ဂးလဝ်ရ။

သီုဟိုတ်ဟၟဲမွဲသာ် ဒပ်ကံၚ်ဇြဳပၞာန် ရပ်ဒက်လဝ် ကောန်အရာပ်ညးဍုၚ်ကွာန် ပါဲဓလေဝ်ဒၟံၚ်ဘဲပၞာန် ပ္ဍဲဘာလကျာ် မၞုံပ္ဍဲခရိုၚ်ညံၚ်လေဝ်ပေန်(၁)ဘာတုဲ လကြဴဏံ ၜိုန်ရကလေၚ်ဗလးကဵုကီုလေဝ် မ္ၚးသီကေတ်လဝ် ဖုၚ်(၇)မကဵု သြန် (၂၅)ကိုတ် နူညးဍုၚ်ကွာန်ရပ်ကေတ်လဝ် ဗွဲအဓမ္မတုဲ သီုကၠောန်သ္ပစံၚ်ပလီုလဝ် မပ္တံကဵုသ္ၚိဒၟံၚ်၊ ကွဳလိုန်ဓာတ်၊ ကိရိယာစက် ကပေါတ်အရပ်စပ်တအ်ရဂှ် KNU လလောၚ်တြးလဝ်ရ။

ဟိုတ်နူပရေၚ်ချဳဒရာၚ် ဒပ်ကံၚ်ဇြဳပၞာန် ကေုာံ ပရေၚ်ဖံက်ပ္ကဝ်အခေါၚ်အရာမၞိဟ်တုဲ ပ္ဍဲပွိုၚ် (၅)တ္ၚဲဂှ် ကောန်ဒေသညးဍုၚ်ကွာန် နူမပ္တံကဵု ကွာန်ယျေတွောန်ကုမ်ဂျဳ၊ ဥယှေတ်ကုမ်၊ အုမ်ပေန်သု၊ တပျေကုမ်၊ ၚဖေဝ်အေန် မၞုံခရိုၚ်ညံၚ်လေဝ်ပေန် KNU ဂှ် လၟိဟ် (၄၆၇၂)တၠ ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဌာန်ဗၠးဘဲရ။

သ္အာၚ်နူဂှ်ပၠန် ကွာန်မပ္တံကဵုအေန်ပရိ၊ ကျောက်တာန်၊ ကညေၚ်ကျိုဝ်၊ လေတ်ခါန်၊ ဒိုဝ်တာန်၊ ကာန်ကလေဝ်၊ ယျေတွောန်ကုမ် ဟွံဂွံလဝ်စရၚ်မၞိဟ်ချိုတ်တ်ပၠိုတ်တ်ဏီကီု သီုညးဍုၚ်ကွာန် နူကွာန်သ္ပဒ္တန်ဟွံမာန်ဏီ ဗွဲမဂၠိုၚ်လေဝ် ဒးဂြိပ်ပါဲဓလေတ်ဒၟံၚ် ဒၞာဲဗၠးဘဲရဂှ် KNU လလောၚ်တြးလဝ်ရ။

မွဲကရောံကဵုပေါဲဗတိုက်သ္ကာတ်မြဟ်ကၠုၚ်ဒၟံၚ်ဂှ် ညးဍုၚ်ကွာန်ပါဲဓလေတ်ဒၟံၚ်ဘဲပၞာန်ဗွဲမဂၠိုၚ်တအ် အခိၚ်လၟုဟ်ပြဟ်ဟ်ဏံ ဆက်နွံဒၟံၚ်ပၟိက် အရီုဗၚ်ဗ္စာရဏာပရေၚ်မၞိဟ် နဒဒှ်ကာတၟေၚ်ဖိုဟ်ဏီရဂှ် ဂကောံပရေၚ်မၞိဟ်ကရေၚ်တအ် ဟီုသ္ဂးလဝ်ရ။

ပရိုၚ် -သြၚ်လောန်တိုၚ်(မ်)

ဗီုရုပ် -KNU