ဝါယှေန်တာန် – ဂျူလာၚ် (၉)
ကြဴနူလၟေၚ်တရဴ အာန်တိုဝ်နဳဘလေန်ကာန် ပ္ဍဲဒေသအာဇြဳယာန်မံက်တိတ်ကၠုၚ်တုဲ သွက်ဂွံရေၚ်တၠုၚ် ပလန်တဲကေတ်အရေဝ် ကုက္ဍိုပ်သ္ကိုပ်ပၞာန်ဗၟာ ကေုာံ သွက်ဂွံဘာတ်ပ္တိတ်ကမၠောန်ပွကြုက် ပ္ဍဲက္ၜဳကြုုက်သၠုၚ်ကျာဂှ် အလဵုအသဳကာန် ဟီုသ္ဂးလဝ်ရ။
ဝန်ဇၞော်ပရေၚ်ဍုၚ်သ္အာၚ် အလဵုအသဳအမေရိကာန်ဘလေန်ကာန်ဂှ် သွက်ဂွံတိုန်စိုပ်ကောံဓရီု ဝန်ဇၞော်ဍုၚ်သ္အာၚ်အာဇြဳယာန် ဒးအာစိုပ် ကၟိန်ဍုၚ်အေန်ဒေါနဳယှာ နွံရ။
အမာတ်ကလုတ်အမေရိကာန်ဆေၚ်စပ်ကဵု အာယှဒိုဟ်ဗၟံက်ဂှ် ပရေၚ်ကၟိန်ဍုၚ်ဗၟာ ဒးဆဵုဂဗဒၟံၚ်ကဵု အကာဲအရာပရေံ ဟိုတ်နူဒပ်ပၞာန်သီလဝ်အဝဵု နူသၞာံ ၂၀၂၁ ဂှ် ဒှ်ပရေၚ်ပရောသဳကၠဳအာ ပ္ဍဲကောံဓရီု ဂျာကာတာအဓိကရောၚ်ဂှ် သ္ဂးလဝ်ရ။
ညးလုပ်ဂကောံအာဇြဳယာန်တအ်ဂှ် ၜိုန်ရကၟာတ်လဒဵုလဝ် အခေါၚ်က္ဍိုပ်သ္ကိုပ်ပၞာန်ဗၟာ တိုန်စိုပ်ကောံဓရီု ကဆံၚ်သၠုၚ်ကီုလေဝ် ဍုၚ်သေံဂှ် ညံၚ်ဂွံက္လေၚ်ကဵုအခေါၚ်တိုန်စိုပ်ဂှ် ပတိုန်လဝ်ဂလာန်ရ။
တိုက်သြန်ဗၟာသုၚ်စောဲဒၟံၚ် သွက်ဂွံပၠုပ်နၚ် ကပေါတ်သုၚ်စောဲ ပ္ဍဲအရာဗတိုက်သရိုဟ် ဂကောံဒစဵု ဒစးတၠအဝဵုပၞာန်ကီု သွက်ဂွံသၠာဲဂတးသြန်ဍုၚ်သ္အာၚ်ဂှ်လေဝ် အလဵုအသဳအမေရိကာန် ဖျေံလဝ်တၚ်ကေန်အရေဝ်ကၟာတ်လဒဵုရ။
သ္အာၚ်နူဂှ်ပၠန် ပ္ဍဲကဵုက္ၜဳကြုက်သၠုၚ်ကျာဂှ် စပ်ကဵုပရေၚ်ပလာပ်ပထုဲအလဵုအသဳကြုက်တုဲ ပရေၚ်ဓမံက် ထ္ၜးဟီုဂး ညံၚ်ဇြဟတ်ကောံကလောံ ဂွံခိုဟ်ကၠုၚ် ပ္ဍဲအရာသောၚ်ကလးပြသၞာဗလးက္ၜဳဂှ် နကဵုအာဇြဳ ယာန် ထေက်ကဵုဒးရေၚ်တၠုၚ် ညံၚ်ဂွံတဴတက်တိုန်ထေက်ရောၚ်ဂှ် အမာတ်ကလုတ်အမေရိကာန် ဟီုသ္ဂးလဝ်ရ။
“အရီုဗၚ်လေဝ်ဟွံဒှ် ကမၠောန်ပြဝကြုက် ဟၟဲကဵုပရေၚ်ကေတ်လျိုၚ်ဂမၠိုၚ်” ဂှ် သွက်ဂွံဘာတ်ပ္တိတ်မာန် အလဵုအသဳအမေရိကာန် ကၠောန်အာကမၠောန် ကရောံညးလုပ်ဂကောံအာဇြဳယာန် မၞုံပ္ဍဲဂျာကာတာရောၚ်ဂှ် ဟီုသ္ဂးလဝ်ရ။
Ref: Reuters
sanlontai