ကိစ္စကောံဓရီုပရေၚ်ၜိုဟ်လလမ် ကံၚ်ဇြဳပၞာန်ဂှ် ဗော်ဍုၚ်မန်တၟိ ဟွံဒုၚ်တဲပုဟ်ဂှ် ပရိုၚ်မံက်တိတ်

နေဗျဳဒဝ်၊ ဂျူလာၚ် (၉)

ပ္ဍဲပေါဲသဳကၠဳ ကံၚ်ဇြဳပၞာန်ကဵု ဗော်ဍုၚ်မန်တၟိ ပွိုၚ်ၜါတ္ၚဲ ပ္ဍဲကဵုနေဗျဳဒဝ်ဂှ် စပ်ကဵုကိစ္စပရေၚ်ကၠောန်ဗဒှ် ကောံဓရီုပရေၚ်ၜိုဟ်လလမ်ကၟိန်ဍုၚ် ကံၚ်ဇြဳပၞာန် မလလောၚ်ပ္တိတ်လဝ်ဂှ်တုဲ လ္ပာ်ဗော်ဍုၚ်မန်တၟိ ထ္ပက်လဝ်စၟတ်တဲဟွံမွဲပုဟ်ဂှ် ပရိုၚ်ဂမၠိုၚ် မံက်တိတ်ဒၟံၚ်ရ။

တုဲကၠုၚ် ဂိတုဂျူလာၚ် (၅) ကဵု (၆) တေံ ညးစၞးကမ္မတဳပ္ညဳပ္ညပ် ထ္မံက်ရုပ်ရဴပရေၚ်ၜိုဟ်လလမ် ကေုာံ နူကဵုဗော်ဍုၚ်မန်တၟိ ဒုဥက္ကဌ နာဲအံၚ်မေန်၊ ကေၚ်ကာဗော်နာဲဗညာလဴ ကေုာံ နာဲအံၚ်မ္ၚဵုတံ ဆဵုဂဗလဝ်ညးသ္ကအ်ရ။

ပ္ဍဲကဵုဆဵုဂဗတ္ၚဲကၠာဂှ် သဳကၠဳလဝ် တၚ်တုပ်စိုတ် မကလိဂွံလဝ် နူကဵုပေါဲသဳကၠဳကၠာတေံဂှ်ကဵု လညာတ်ကမ္မတဳဗဟဵု ဗော်ဍုၚ်မန်တၟိတံဂှ်တုဲ တ္ၚဲဒုတိယဂှ် သဳကၠဳလဝ် တၚ်ရန်တၟံ မကၠောန်ဗဒှ် ကောံဓရီုပရေၚ်ၜိုဟ်လလမ်ကၟိန်ဍုၚ်ကဵု ကိစ္စစပ်ကဵုပရေၚ်ဖောအ်ဗြေဝ်ဒေသတံ ဗွဲမဍုက်ကေဝ်ဂှ် ဂွံတီကေတ်ရ။

ကြဴနူဂှ် သွက်ဂွံထ္မံက်ရုပ်ရဴ တၚ်တုပ်စိုတ် မကလိဂွံလဝ် နူကဵုပေါဲသဳကၠဳကၠာတေံမာန်ဂှ် ကလေၚ်ပကောံပကေဝ်တုဲ ထ္ပက်လဝ်စၟတ်တဲ နဒဒှ်တၚ်တုပ်စိုတ်ဂှ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ကီုလေဝ် တၚ်လဵု ထ္ပက်လဝ်စၟတ်တဲရောဟီုဂှ် သီုၜါလ္ပာ် လလောၚ်ပ္တိတ်လဝ် ဗွဲလစှ်ေဟွံမွဲဏီရ။

လ္တူကိစ္စပရေၚ်ကၠောန်ဗဒှ် ကောံဓရီုပရေၚ်ၜိုဟ်လလမ်ကၟိန်ဍုၚ် နူကဵုကံၚ်ဇြဳပၞာန်တံ မပ္တိုန်ထ္ၜးလဝ်ဂှ် နကဵုဗော်ဍုၚ်မန်တၟိ ထ္ပက်လဝ်စၟတ်တဲ ဟွံမွဲပုဟ်ဂှ် ဂွံတီကေတ် နူကဵုက္ဍိုပ်သ္ကိုပ်ဗော်ဍုၚ်မန်တၟိမွဲတၠ အခေါၚ်ထ္မံက်ယၟုဟွံမွဲဂှ်တုဲ ဌာန်ပရိုၚ်ကဴဝဴ ချူပ္တိုန်လဝ် ပ္ဍဲမုက်လိက်ဇာဇၞိက်ပရေၚ်မၞိဟ်ညးတံရ။

သ္အာၚ်နူဂှ်ပၠန် လ္ဂောံကဵုအကာဲအရာပရေၚ်ဍုၚ်ကွာန် မက္တဵုဒှ်ဒၟံၚ်လၟုဟ်တုဲ ပ္ဍဲကဵုလၟေၚ်ကမၠောန်ပရေၚ်ၜိုဟ်လလမ်ဂှ် ဟိုတ်နူဟွံဂွံအခေါၚ်ထ္မံက်ရုပ်ရဴ လိက်ကသုက် NCA ဂှ်ရဂှ်တုဲ နကဵုဗော်ဍုၚ်မန်တၟိ ကၠာဂွိုအ်ထ္ပက်စၟတ်တဲ ပ္ဍဲလိက်ကသုက် NC‌A တေံဂှ်ရ သွက်ဂွံဆက်ဒတူလိုၚ်အာ အတိုၚ် Bilateral Agreement မတုပ်လဝ်စိုတ် ကုအလဵုအသဳ နွံဒၟံၚ်ဂှ် ထ္မံက်ထ္ၜးလဝ်ရ။

နကဵုသြၚ်လောန်တိုၚ်(မ်) စပ်ကဵုကိစ္စပရူပရာ ဗော်ဍုၚ်မန်တၟိ ကေုာံ ကံၚ်ဇြဳပၞာန်တံ မသဳကၠဳလဝ်ပွိုၚ်ၜါတ္ၚဲဂှ်ကီု သီုကဵုကိစ္စ မထ္ပက်လဝ်စၟတ်တဲတၚ်တုပ်စိုတ်တံဂှ်တုဲ ၜိုန်ရဆက်စၠောံလဝ်ဖုၚ် ကေၚ်ကာဗော်ဍုၚ်မန်တၟိ မတိုန်စိုပ်လဝ် ပေါဲသဳကၠဳ နာဲဗညာလဴ ကဵု နာဲအံၚ်မ္ၚဵုတံၜါတၠ စဵုကဵုပန်ဝါကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။

ဟိုတ်နူအကာဲအရာတံဏံတုဲ စပ်ကဵုကိစ္စကၠောန်ဗဒှ် ကောံဓရီုပရေၚ်ၜိုဟ်လလမ်ကၟိန်ဍုၚ်ဂှ်တုဲ လ္တူဗော်ဍုၚ်မန်တၟိ ထ္ပက်လဝ်စၟတ်တဲ ဟွံမွဲဂှ် သ္ပဒတန်တၞဟ်ခြာဟွံမာန်ဏီရ။

ဗော်ဍုၚ်မန်တၟိ မကေတ်လဝ်တာလျိုၚ်က္ဍိုပ်သ္ကိုပ် ပ္ဍဲဂကောံက္ဍိုက်ပ် လၟေၚ်ကမၠောန်ပရေၚ်ၜိုဟ်လလမ် PPST မထ္ပက်လဝ်စၟတ်တဲဒေါအ်ပန်ပှော် ပ္ဍဲလိက်ကသုက် NCA ဂှ်ဝွံ တုဲကၠုၚ်ပ္ဍဲဂိတုဨပရဴ လ္ပာ်လက္ကရဴဏံတုဲ ပ္တိုန်လဝ်လိက်နုက်တိတ် နူကဵု PPST ရ။

ညံၚ်ဂွိုအ်တိုန်စိုပ်ပရေၚ်ၜိုဟ်လလမ် က္ဍိုပ်သ္ကိုပ်ပၞာန် မကော်ဘိက်ဂှ် လ္ပာ်ဂကူမန်တံ ဒစဵုဒစးဒၟံၚ်နွံကီုလေဝ် ဗော်ဍုၚ်မန်တၟိဂှ် တိုန်စိုပ်သဳကၠဳလဝ် စဵုကဵု (၆) ဝါကိတ်တ်ရ။

ပရိုၚ်−သြၚ်လောန်တိုၚ်(မ်)

ဗီု−ရုၚ် သ္ကိုပ်က္ဍိုက်ပ်ပၞာန်ကာစဵုဒၞါ