ဒဒန်ပ္ဍဲဂၠံၚ်ကွဳစက် သဓီု-ဘာအၚ်မွဲတၞုၚ် ဒးဒုၚ်ဖံၚ်ခတိုဟ်လဝ်မာၚ်

ဘာအၚ်၊ ဂျူလာၚ်(၁၁)

တွဵုရးကရေၚ်၊ ပွိုၚ်ဍုၚ်ဘာအၚ် ဒဒန်အကြာဝါဘိုဝ်တဝ်ကဵု ဂိုဟ်ထီုဖယျေန်ညဳနံၚ်(ဘုရင်ညီနောင်ဂူ) ဗ္ဒာဲကွာန်ဝါဘိုဝ်တဝ်မွဲတၞုၚ်ဂှ် ပ္ဍဲဂိတုဂျူလာၚ် စၟတ်တ္ၚဲ (၁၀) အခိၚ်နူဂယးပြဟ် ဒးဒုၚ်ဖံက်ခတိုဟ်မာၚ် ဒးဒုၚ်ပလီုပလာ်လဝ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဒဒှ်မၞုံဇမၠိၚ် (၈၀) ပေ အနာမ်မၞုံ ၜိုတ် (၃၀) ပေဏံဂှ် ဂကောံရပ်လွဟ်ဟွံတီယၟုမွဲဂကောံ ဖံက်ခတိုဟ် ပလီုပလာ်လဝ်ရ။

ဟိုတ်နူဒးဒုၚ်ဖံက်ခတိုဟ်လဝ်မာၚ် ဒးဒုၚ်ပလီုပလာ်လဝ်တုဲ ဗလးဒဒန်ကၠိုဟ်ထောၚ်အာလဝ်ကီု၊ ဟိုတ်နူဗလဲဒဒန် ဇီုကပိုက် ဒးလီုလာ်လဝ်ကီုဂှ်ရ ကၟာတ်လဝ်အခေါၚ် တတ်ကၠောံအာာကၠုၚ် မွဲချိုန်ခနရ။

ဆ္ဂး သ္ပတံနူ အခိၚ်နူဂယး (၉) နာဍဳတုဲ ကဵုလဝ်အခေါၚ်ကွဳစက်သ္ၚိ ကေုာံကွဳလိုန်ဓာတ်တအ် တတ်ကၠောံ အာကၠုၚ်တုဲ ပ္ဍဲအခိၚ်ဒေါဝ်တ္ၚဲ ၜိုတ် ၁၂ နာဍဳဂှ်မ္ဂး ကဵုလဝ်အခေါၚ်ကွဳစက်ပ္ဍိုက်ဗၞိက် သီုကဵုကွဳစက်ညးအာတရဴတအ် တတ်ကၠောံအာကၠုၚ်ရ။

ဒဒန်ဒးဒုၚ်ဖံက်ခတိုဟ်လဝ်မာၚ်ဂှ် နွံဒၟံၚ်ပ္ဍဲသ္ကုတ်ဂၠံၚ်ဆက်စၠောံဗၞိက် ဗြဝတဳ၊ ဘာအၚ်၊ သဓီု၊ လဂုၚ် အဓိကတုဲ ပ္ဍဲဂၠံၚ်ကွဳစက်သဓီု-ဘာအၚ်ဂှ် ဒှ်ဒဒန်ဂၠိၚ်အိုတ် မွဲတၞုၚ်ရဂှ် ဂွံတီကေတ်ရ။

စပ်ကဵုပရေၚ်ဖံက်ခတိုဟ်လဝ်မာၚ် ပ္ဍဲဒဒန်ဂှ် နကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်လဝ်ကဵု ညးတာလျိုၚ် ဗော်သွးကောန်ဂကူကရေၚ် KNU ဒပ်မဟာ (၁) ခရိုၚ်သဓီုကီုလေဝ် စဵုကဵုအခိၚ်လၟုဟ် ဆက်စၠောံဟွံဂွံဏီရ၊

ပ္ဍဲဂိတုဂျောန် စၟတ်တ္ၚဲ (၂၉)တုဲကၠုၚ်တေံလေဝ် အကြာပွိုၚ်ဍုၚ်သဓီုကဵု ပွိုၚ်ဍုၚ်ၜဳကလေၚ် တွဵုရးဍုၚ်မန် ဗ္ဒာဲကွာန်ယှိုဲယောၚ်ပျဂှ် ဒဒန်ကြုၚ်အုက် ပ္ဍဲဂၠံၚ်ကွဳစက်လဂုၚ် – မတ်မလီုဂှ် ဒပ်ပံၚ်ကောံ KNLA တအ် ဖံက်ခတိုဟ်ပလီုပလာ်လဝ်တုဲ ဒဒန်ခရိုဟ်စှ်ေလဝ် မွဲကရေက်ရ။

ပရေၚ်ဖံၚ်ခတိုၚ်ပလီုပလာ်လဝ်ဒဒန်ကြုၚ်အုက်ဂှ် ဒှ်ကုတ်ဗပိုတ်ဂၠံၚ်ထံက်ပလံၚ် ဒပ်ကံၚ်ဇြဳပၞာန်ရဂှ် ကဝ်မတဳကောပ်ကာဲကေၚ်ကာမိတ်ခရိုၚ်သဓီု KNU ဟီုသ္ဂးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – CJ