ဗ္ဒိုပ်ဗၠာဲသၟိၚ် မၞုံပွိုၚ်ဍုၚ်လှာဒကှ်ကဵု ပွိုၚ်ဍုၚ်ဇြပ်ဗု  (၂) ဗ္ဒိုပ် ဒးဒုၚ်ဗ္တိုက်တုဲ ရုၚ်ဇြဟတ်ဓာတ်လလဳပါ် ဒးဒုၚ်ဖံက်ဗ္တိုဟ်မာၚ်

ဇြပ်ဗု၊ ဂျူလာၚ် (၁၁)

ဗ္ဒိုပ်ဗၠာဲသၟိၚ်တၟအ်ဗြဴ ပွိုၚ်ဍုၚ်ဇြပ်ဗု တွဵုရးဍုၚ်မန်၊ ဗ္ဒိုပ်ဗၠာဲသၟိၚ်အခၠဵုတဂေါန်ဒေၚ် ပွိုၚ်ဍုၚ်လှာဒကှ်ကဵု ရုၚ်ဇြဟတ်ဓာတ်လလဳပါ် ပွိုၚ်ဍုၚ်လှာဒကှ်တံဂှ် နူကဵု KNLA, ဂကောံဒပ်ပြုပြေၚ်ပၞာန်တၟေၚ် S.O.F ကေုာံ နူကဵုဂကောံဒပ်ဒရုၚ် cloud wings တံ သုၚ်စောဲမိုၚ်၊ သုၚ်စောဲမဗုမ် နကဵုဒရုၚ်တံတုဲ ဖံက်ဗ္တိုဟ်ဗ္တိုက်လဝ်ရောၚ် လလောၚ်ပ္တိတ်လဝ်ရ။

တုဲကၠုၚ် ဂိတုဂျူလာၚ် (၆) တေံ ဒပ်ပၞာန်ဗၠးၜးကောန်ဂကူကရေၚ် KNLA ဂကောံဒပ်ပြုပြေၚ်ပၞာန်တၟေၚ် S.O.F ကေုာံ ဂကောံဒပ်ဒရုၚ် Cloud Wings တံ သုၚ်စောဲဒရုၚ်တုဲ ဗ္တိုက်လဝ်ဗ္ဒိုပ်ဗၠာဲသၟိၚ်တၟအ်ဗြဴ မၞုံတွဵုရးဍုၚ်မန် ကဵု ဗ္ဒိုပ်ဗၠာဲသၟိၚ်အခၠဵုတဂေါန်ဒေၚ် မၞုံပွိုၚ်ဍုၚ်လှာဒကှ် တွဵုရးကရေၚ်တံ နကဵုမဗုမ် ၆၀ မမ၊ ၈၁ မမတံရ။

ဟိုတ်နူပရေၚ်ဗ္တိုက်သာ်ဏံတုဲ ဗၠာဲသၟိၚ် နူကဵုဗ္ဒိုပ်ဗၠာဲသၟိၚ်တၟအ်ဗြဴဂှ် (၂) တၠ ချိုတ်တုဲ မွဲတၠ ကလိဂွံလဝ်ဝပ်သ္ကာတ်မြဟ်ဂှ် ထ္မံက်ထ္ၜးလဝ် ပ္ဍဲကဵုတၚ်လလောၚ်တြးဂှ်ရ။

သ္အာၚ်နူဂှ်ပၠန် ပ္ဍဲဂိတုဂျူလာၚ် (၇) တေံဂှ်လေဝ် သုၚ်စောဲမာၚ် ကေုာံ မဗုမ် ၆၀ မမ၊ ၈၁ မမ တံဂှ်တုဲ ဆက်ဖံက်ဗ္တိုဟ်လဝ် ရုၚ်ဇြဟတ်ဓာတ်လလဳပါ် ပွိုၚ်ဍုၚ်လှာဒကှ်ကဵု ဗ္ဒိုပ်ဗၠာဲသၟိၚ်အခၠဵုတဂေါန်ဒေၚ်တံဂှ်တုဲ ကောန်ဒပ်ကံၚ်ဇြဳပၞာန် မၞုံဗ္ဒိုပ်ဗၠာဲသၟိၚ်အခၠဵုတဂေါန်ဒေၚ် (၁) တၠ ချိုတ်တုဲ (၅) တၠ ကလိဂွံလဝ်ဝပ်သ္ကာတ်မြဟ်ရ။

အပ္ဍဲပရေၚ်ပြုပြေၚ်ပၞာန်ဒရုၚ် ဂကောံဒပ်ပံၚ်ကောံ ဂကောံဇြဟတ်ပၠန်ဂတး KNLA တံ ဗ္တိုက်ဒၟံၚ်ဂှ်ကဵု ကြဴနူဗ္တိုက်တုဲဂှ် လ္ပာ်ဒပ်ကံၚ်ဇြဳပၞာန်တံ ပန်ပှော်လဝ် နကဵုလွဟ်ဇၞော်၊ လွဟ်ဍောတ် ကြာန်န်ဂှ် သ္ကိုပ်ဒပ်ညးဒုၚ်တာလျိုၚ် S.O.F ဟီုရ။

ဟိုတ်မ္ဒးပလီုပလာ်ဖံက်ဗ္တိုဟ်မာၚ် ရုၚ်ဇြဟတ်ဓာတ်လလဳပါ် ပွိုၚ်ဍုၚ်လှာဒကှ်ဂှ်ဝွံ ဓာတ်လလဳ နူကဵုရုၚ်ဇြဟတ်ဓာတ်ပါ်ဂမၠိုၚ်ဝွံ ကဵုဒၟံၚ်ညးဍုၚ်ကွာန်တံဟွံသေၚ်တုဲ ဟိုတ်နူလ္ပာ်ဒပ်ကံၚ်ဇြဳပၞာန်တံသၟး ဂွံသုၚ်စောဲဒၟံၚ်ဂှ်တုဲ ဓာတ်လလဳ နူကဵုရုၚ်ပါ်တံဏံဂှ် သုၚ်စောဲဒၟံၚ် ပ္ဍဲတမ်ဒပ်၊ ဗ္ဒိုပ်ဗၠာဲသၟိၚ်၊ ဗျူဟာ၊ CCTV မၞုံအပ္ဍဲဍုၚ်တံကဵု ကမၠောန်ဇာဇၞိက်ပရေၚ်ဆက်စၠောံတံ ဂၠိုၚ်အိုတ်ဂှ်ရ ဒးဗ္တိုက်ဒၟံၚ်ရောၚ်ဂှ် S.O.F လလောၚ်ပ္တိတ်ဟီုဂးလဝ်ရ။

သ္အာၚ်နူဂှ်ပၠန် ညးယိုက်ဝန် (၂) တၠ နူကဵုရုၚ်ဇြဟတ်ဓာတ်လလဳပါ်ဂှ် ဂကောံဇြဟတ်ပၠန်ဂတးတံ ကော်စၟဳတ်တုဲ ဟိုတ်နူဒုဟ်ဟွံမွဲဂှ်ရ ကဵုပါဲလဝ်ဒၞါဲဗၠးဘဲဂှ်တုဲ ကောန်သ္ဂံၚ်ပၠန်ဂတးဂမၠိုၚ် ဟွံဒးဘဲမွဲသာ် ဆုတ်ကလေၚ်မာန်လဝ်ရောၚ် ဂကောံဒပ်ပြုပြေၚ်ပၞာန်တၟေၚ် S.O.F ကဵုလဝ်သမ္တီရ။

ပရိုၚ်−သြၚ်လောန်တိုၚ်(မ်)

ဗီု−S.O.F