ဗ္ဒါဲဍုၚ်လိုၚ်ဇြာ ဌာန်ဂအုပ် KIO ဂှ် ဒပ်ကံၚ်ဇြဳပၞာန် ပန်ပှော်ဒၟံၚ် လွဟ်ဇၞော်အဆက်က်

လိုၚ်ဇြာ၊ ဂျူလာၚ် (၁၁)

ဒပ်ကံၚ်ဇြဳပၞာန် မထ္ပက်လဝ်ကရောၚ်ပၞာန် မွဲဒမြိပ်ဗ္ဒါဲဍုၚ်လိုၚ်ဇြာ တွဵုရးကချေၚ်ဂှ်ဝွံ စနူဂိတုဂျူလာၚ် (၈) တုဲ ပန်ပှော်ဒၟံၚ် နကဵုလွဟ်ဇၞော် အဆက်က်ရောၚ်ဂှ် ညးဒုၚ်တာလျိုၚ်လလောၚ်ပရိုၚ် ဂကောံဗၠးၜးကချေၚ် KIO သ္ကိုပ်ဗိုလ်ဇၞော်နဝ်ဘူ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပပ္တံနူဂိတုဂျူလာၚ် (၈) အခိၚ်နူဂယးတုဲကၠုၚ်တေံတုဲ နူကဵုဖောန်ပါန်ဗောန် ဒၞါဲဗ္ဒိုပ်ဒပ်ကံၚ်ဇြဳပၞာန်တံဂှ် ပန်ပှော်ဒၟံၚ်လွဟ်ဇၞော် ပ္ဍဲကဵုကွာန်နာမ်သာန်ယာန်၊ ပွိုၚ်ဍုၚ်ဝိုၚ်မဝ် သ္ၚောဲနူကဵု ဍုၚ်လိုၚ်ဇြာ ဒၞါဲဒတန်ဌာန်ဂအုပ်ဗဟဵု ဂကောံဗၠးၜးကချေၚ် (KIO) မၞုံ ၜိုတ် (၁၁) မိုၚ်ဂှ်ရ။

စပ်ကဵုအကာဲအရာဏံတုဲ သ္ကိုပ်ဗိုလ်ဇၞော်နဝ်ဘူဂှ် နူကဵုလ္ပာ်ကံၚ်ဇြဳပၞာန်တံ (၃) တ္ၚဲအဆက်က် ဟိုတ်နူပန်ပှော်ဒၟံၚ်လွဟ်ဇၞော် ကြာန်န်ဂှ်ရ ညးပန်အဲပန်ဂှ် နွံဒၟံၚ်ကီုလေဝ် စဵုကဵုဂိတုဂျူလာၚ် (၁၀) အခိၚ်နူဂယးဂှ် ဗရုပန်ပှော် ဗ္ဒါဲဍုၚ်လိုၚ်ဇြာဂှ် ဟွံဂွံမိၚ်ဏီပုဟ်ဂှ် သ္ဂးရ။

“ပြဟ်ဟ်ဏံ (စဵုကဵုဂိတုဂျူလာၚ် ၁၀ အခိၚ်နူဂယး ၜိုတ် ၁၁ နာဍဳ) ဂှ် ဟွံဂွံမိၚ်ကေတ် ဗရုသေနာတ်ဏီပုဟ်။ ဂိတုဂျူလာၚ် ၈ ဂှ် ပန်ပှော်လဝ်လွဟ်ဇၞော် လ္ပာ်လိုၚ်ဇြာဂှ် နွံ။ စၟတ်တ္ၚဲ ၉ ဂှ်လေဝ် ပန်။ စၟတ်တ္ၚဲ ၁၀ ဂှ်လေဝ် ပန်။ ဆ္ဂး လ္ပာ်အရာပ်မၞိဟ်ဒၟံၚ် လိုၚ်ဇြာဂှ် ဟွံသေၚ်ပုဟ်။ ဒှ်ဒၟံၚ်လ္ပာ်ကွာန်နာမ်သာန်ယာန် အဓိကဏောၚ်။ ဒှ်ဒၟံၚ်လ္ပာ်ဒၞါဲဍေံတံ ထ္ပက်ကရောၚ်ပၞာန်ဏောၚ်။ နကဵုတရဴကျာဂှ်ဟွံသေၚ်။ ပန်ပှော်လဝ်နကဵုလွဟ်ဇၞော် ကြာန်န်တုဲ ညးပန်အဲပန်ညးသ္ကအ်ရဏောၚ်” သာ်ဝွံ ညးသ္ဂးရ။

ဆ္ဂး အကာဲအရာပရေၚ်ပၞာန် ကွာန်နာမ်သာန်ယာန် မက္တဵုဒှ်ဒၟံၚ်ပေါဲဗ္တိုက် သောဲသောဲဗြောဲဗြောဲဂှ် ဟွံဂွံတီကေတ်ဏီဂှ်ကဵု ဟိုတ်နူပရေၚ်ပန်ပှော်ဗ္တိုက်လွဟ်ဇၞော် ဒပ်ကံၚ်ဇြဳပၞာန်တံဂှ်တုဲ ပေါဲဗ္တိုက်တံ သ္ကာတ်မြဟ်ကၠုၚ်မာန်ရောၚ် ညးဆက်ဟီုရ။

တုဲကၠုၚ် ဂိတုဂျူလာၚ် ၈ အခိၚ်နူဂယး ၜိုတ် ၄ နာဍဳဂှ်  ပ္ဍဲကဵုကွာန်ယှထူသောတ် တိဍာ်တမ်ဒပ် ၁၄ ဒပ်ပၞာန်ဗၠးၜးကောန်ဂကူကချေၚ် KIA ဂှ် နူကဵု KIA တံ လုပ်စိုပ်ဍိုက်ဗ္တိုက်လဝ် သ္ၚိဒၟံၚ်က္ဍိုပ်သ္ကိုပ်ပၞာန်ညးဍုၚ်ကွာန် ဥူမေန်ဇြေန်တ သီုကဵုဗ္ဒိုပ်ပၞာန်ညးဍုၚ်ကွာန် ၃ ရ။

လ္ပာ်ဂကောံပၞာန်ညးဍုၚ်ကွာန် ဝါရာသောတ်ဂှ် အပ္ဍဲပေါဲဗ္တိုက်ဂှ် သီဂိုၚ်ဂွံလဝ် ဇွကောန်ဒပ် လ္ပာ် KIA ၅ တၠ မဒးချိုတ်အာဂှ်ကဵု သေနာတ် ၅ ဇကိုအ်ဂှ်တုဲ နူကဵုဂကောံဒပ်ဇကုတံဂှ် ကောန်ဒပ်လ္ၚဵု ဒးပြဟ်လလုဲအာလဝ်တုဲ (၂) တၠ ကလိဂွံလဝ်ဝပ်ဟွံဒးဂွိၚ်ရောၚ် ထ္မံက်ထ္ၜးလဝ် ပ္ဍဲကဵုထလဳဂရာမ်ချာန်နေဝ်ရ။

စပ်ကဵုပရေၚ်ကောန်ဒပ် KIA (၅) တၠ ချိုတ်အာဂှ်တုဲ ဟွံဂွံတီကေတ် ချိုတ်တ်ပၠိုတ်တ်ဏီတုဲ ဗီုဓာတ်လ္ပာ်ဂကောံဒပ်ပၞာန်ညးဍုၚ်ကွာန်ဝါရာသောတ်တံ မပ္တိုန်လဝ်ဂှ်ဝွံ ဒှ်ဒၟံၚ်ဗီုနူကဵုသၞာံ ၂၀၂၁ တေံ ဗီုတြေံရောၚ်ဂှ် သ္ကိုပ်ဗိုလ်ဇၞော် နဝ်ဘူ ကလေၚ်ခၠေဝ်ပၠန်လဝ်ရ။

မွဲအဆက်ဓဝ် အပ္ဍဲဂိတုဂျူလာၚ် ၈ တေံ ပ္ဍဲကဵုဗ္ဒါဲကွာန်နာမ်သာန်ယာန် လ္တူဂၠံၚ်မျေတ်ကျဳနာ−ဗာန်မဝ် ပွဳပွူဗ္ဒါဲမိုၚ်သက်ပါဂှ်လေဝ် KIA ကဵု ဒပ်ကံၚ်ဇြဳပၞာန်တံ ဒှ်လဝ်ပေါဲဗ္တိုက်ရောၚ် ဌာန်ပရိုၚ်အပ္ဍဲဒေသတံ ထ္မံက်ထ္ၜးလဝ်အိုတ်ရ။

သ္အာၚ်နူဂှ်ပၠန် ကရောၚ်ပၞာန်ကံၚ်ဇြဳပၞာန် မတိုန်ကၠုၚ် သွက်ဂွံကဵုအရီုဗၚ်ပၞာန် လ္ပာ်ကွာန်မိုၚ်သက်ပါ ကေုာံ ကွာန်နာမ်သာန်ယာန် နူကဵုဍုၚ်ဒအ်ဖုၚ်ယာန် ပွိုၚ်ဍုၚ်မိုဝ်မံက်ဂှ် KIA ကြတ်ဗ္တိုက်လဝ်အကြာဂၠံၚ်ဂှ်ဝွံ ဒးကၠောန်လဝ် လ္ဂောံကဵုပရေၚ်ပၞာန်ရောၚ် သ္ကိုပ်ဗိုလ်ဇၞော်နဝ်ဘူ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

နူကဵုဒပ်ကံၚ်ဇြဳပၞာန်တံ ဟိုတ်နူသၠဲပ္တိုန်ဇြဟတ်ပၞာန် ချဳဒရာၚ်လဝ် ပ္ဍဲကွာန်နာမ်သာန်ယာန် မၞုံဗ္ဒါဲဍုၚ်လိုၚ်ဇြာ တိဍာ်ဒပ်မဟာ ၅ ဒပ်ပၞာန်ဗၠးၜးကချေၚ် KIA တံဂှ်တုဲ စနူဂိတုဂျူလာၚ် (၁) တေံတုဲ စဵုကဵုဂိတုဂျူလာၚ် (၁၀) လလအ်ပွိုၚ် (၁၀) တ္ၚဲဂှ် နကဵုပေါဲဗ္တိုက်သ္ကာတ်မြဟ်ၜါလ္ပာ်ဂှ် ပရေၚ်ပၞာန်တံ ကြံၚ်မ္ၚိုဟ်ဒၟံၚ်ဖိုဟ်ရ။

ပရိုၚ်−သြၚ်လောန်တိုၚ်(မ်)

ဗီု−CNDF (အခိၚ်ဂွံဆဵုကေတ် ဒပ်ပၞာန်ဗၟာ ပ္ကတ်ပ္ကေၚ်ပရေၚ်ပၞာန် သၞာံ ၂၀၁၉)