ပ္ဍဲအိန္ဒိယ ဟိုတ်နူဍာ်ဇၞော်တုဲ မၞိဟ် (၁၅) တၠဟွံအောန် ချိုတ်တုဲ ဒးကၟာတ်လဝ်ဘာ

နျူဒေလဳ၊ ဂျူလာၚ် (၁၁)

ပ္ဍဲဍုၚ်ဇၞော်အိန္ဒိယ နျူဒေလဳ ကြဴနူဗြဲမုဟ်သုန်ဂူတုဲဂှ် ပ္ဍဲကဵုသ္ကုတ်သၟဝ်ကျာကၟိန်ဍုၚ်ဂှ် ဟိုတ်နူတိလာ်၊ ဍာ်ဇၞော်တံ က္တဵုဒှ်လဝ်ဂှ်ရ အပ္ဍဲပွိုၚ်ပိတ္ၚဲ တုဲကၠုၚ်တေံ မၞိဟ် (၁၅) တၠ ဟွံက ချိုတ်အာတုဲဂှ် ဘာဗ္တောန် လိက်မၞုံဍုၚ်နျူဒေလဳဂမၠိုၚ် စနူဂိတုဂျူလာၚ် (၁၀) ဏံတုဲ ဒးကၟာတ်လဝ်ဂှ် ဂွံတီကေတ်ရ။

သတ္တာဟတုဲကၠုၚ်တေံ ဟိုတ်နူဗြဲရိုပ်ဂူလဝ်ဂှ်ရ ပ္ဍဲကဵုဒၞါဲလ္ၚဵုလ္ၚဵု မၞုံဍုၚ်နျူဒေလဳတံဂှ် ဍာ်ပေၚ်ဟး ဂၠံၚ်ဗၠိုက်အာလဝ်တုဲ ညးဒေသတံ သှ်ေၜက်ခက်ဒၟံၚ်ဒၞါဲတံဂှ်အိုတ်ရ။ တွဵုရး ကုန်ဒဵုနွံ နူကဵုသ္ကုတ်သၟဝ် ကျာကၟိန်ဍုၚ်တံဂှ်ဝွံ ဒးဒုၚ်စသိုၚ်လဝ်ပရေံအိုတ်တုဲ ဟိုတ်နူဍာ်ဇၞော်ဍာ်ကလိုပ် တိလာ် ပ္ဍဲကဵုတွဵုရး အေတ္တရာဟာမ် ကေုာံ ဟေန်မာချေဝ်ပါရာဒါတ်ချ်တံဂှ်တုဲ မၞိဟ် (၁၀) တၠ ချိုတ်အာလဝ်ရောၚ် အေဂျေန်ဇြဳဌာန်ပရိုၚ် Press Trust of India ထ္မံက်ထ္ၜးလဝ်ရ။

ပ္ဍဲကဵုနျူဒေလဳဂှ် မၞိဟ် (၁) တၠ ချိုတ်အာလဝ်တုဲ (၄) တၠဂှ် ချိုတ်အာလဝ် ပ္ဍဲကဵုကာတ်ယှမဳယျာ မဒှ်ဒေသ အိန္ဒိယမထိၚ်ဒက်လဝ်ဂှ်ရ။

ဒၟါနူဗြဲဂူတုဲ တိလာ်တံက္တဵုဒှ်လဝ်တုဲ ဂၠံၚ်ဇၞော် တွဵုရးကုန်ဒဵု အေတ္တရာဟာမ် မၞုံလ္တူရေၚ်ဒဵုဟိမဝန်တံ လီုလာ်တုဲ ပရေၚ်အာကၠုၚ် ပိုတ်အာလဝ်တုဲ နကဵုညးဒေသဂမၠိုၚ် ဟွံမွဲပၟိက်မွဲသာ် ညံၚ်ဂွိုအ်တိတ် မ္ၚးသ္ၚိအိုတ်ဂှ် လလောၚ်ပ္တိတ်လဝ် တၚ်ကဵုသတိဂမၠိုၚ်ရ။

ပ္ဍဲကဵုပါရာဒါချ် ဇိုၚ်ဝုတ်ဒိုဟ်ဂှ်လေဝ် ဟိုတ်နူဒဒန်တံ သ္ၚိတံ ဟဳဗက်အာကီုဂှ်ရ သၟိၚ်တၠအဝဵုဒေသတံ သွက်ဂွံဟံၚ်ပြာ်မၞိဟ်ဂမၠိုၚ်ဂှ် ဒးသုၚ်စောဲလဝ် က္ၜၚ်ကျာသၞေၚ်ဝဲတံရ။

အေဂျေန်ဇြဳဗြဲကျာ ဍုၚ်အိန္ဒိယဂှ် အပ္ဍဲတ္ၚဲကၠုၚ်စိုပ်တံဏံ ပ္ဍဲကဵုသ္ကုတ်သၟဝ်ကျာဂှ် ဗြဲရိုပ်ဂူဏောၚ် ချိၚ်ခယျလဝ်တုဲ ဗြဲမုဟ်သုန်ဂူ အလုံမွဲကၟိန်ဍုၚ်ဂှ် ဗ္ၜတ်ဍာ်ဗြဲ ဗၞတ် (၂) တၟံကၠံ ဂၠိုၚ်နူကဵုဓမ္မတာယျဂှ်လေဝ် သ္ဂးလဝ်ရ။

ဍုၚ်အိန္ဒိယဝွံ နူကဵုဂိတုဂျောန် စဵုကဵုဂိတုသေပ်တေမ်ဗာ အပ္ဍဲရာသဳမုဟ်သုန်ဂှ် ဍာ်ဇၞော်ဍာ်ကလိုပ် အသိၚ်သ္ကာတ်တံ လေပ်က္တဵုဒှ်တုဲ ဟိုတ်နူဗ္ၜတ်ဍာ်ဗြဲ အာယှသၠုၚ်ကျာ လၟေၚ်သၞာံဂှ်တုဲ သွက်စၞစ တဵုလွဳလဝ် အခိၚ်ကသီုတံဂှ် ဗ္ၜတ်ဍာ်ဗြဲဏံဝွံ ၜိုန်ရပၟိက်ဇၞော်ဗွဲမလောန်ကီုလေဝ် သ္ကဵုပရေၚ်လီုလာ်တံ သ္ကဵုက္တဵုဒှ်ဒၟံၚ် မွဲဏှမွဲဏှရ။

ဟိုတ်နူရာသဳဥတုဖံက်ပၠန် ကေုာံ ဂၠးတိက္တဴကၠုၚ်ဂှ်တုဲ ရာသဳမုဟ်သုန်ဝွံ ပြံၚ်လှာဲကၠုၚ်ဂၠိုၚ်တုဲ ပ္ဍဲကဵုသ္ကုတ် သၟဝ်ကျာ ဟိမဝန္တာ အိန္ဒိယဂှ် တိလာ်မွဲဏှမွဲဏှကီု ဍာ်ဇၞော်ဍာ်ကလိုပ် က္တဵုဒှ်လွာဲဂှ်ကီု အရာတံဏံဂှ် သ္ကဵုဒှ်ကၠေံရောၚ် တၠပညာသိပ္ပံဂမၠိုၚ် ဟီုဂးလဝ်ရ။

ဟိုတ်နူဗြဲမုဟ်သုန်ဂူတုဲလေဝ် ပ္ဍဲကဵုဍုၚ်ပါကေဿတာန် ဇိုၚ်ဝုတ်ဒိုဟ်ဂှ် ဍာ်ကၟိုန်နူအိန္ဒိယ မဇွောဝ်စှ်ေဒၟံၚ် ပါကေဿတာန်ဂှ် ကြဴနူပြံၚ်ထောံဂၠံၚ်ဍာ် လ္ပာ်ၜဳရာဗဳတုဲဂှ် သွက်ဍာ်ကလိုပ်သၞာံဏံ အလန်ကိုပ်ကၠာ အိုတ်ဂှ် သၟိၚ်တၠအဝဵုတံ လလောၚ်ပ္တိတ်လဝ် တၚ်ကဵုသတိဗွဲတၟေၚ်တံရ။

သ္ကုတ်တိသဝ်ဝ် မၞုံဗၟံက်တွဵုရးပါန်ဂျာပ်တံဂှ် အေဂျေန်ဇြဳကောပ်ကာဲဖန်ဇန်ဘဲအန္တရာယ်သဘာဝ ပါကေဿတာန် ဒဒှ်ရကၠောန်ဒၟံၚ် ပရေၚ်ဆုဲပြံၚ်တံဂှ် ဟီုဂးလဝ်ရ။ မၞိဟ် (၅၀၀) ပြၚ် နူကဵုဒၞါဲတၞဟ်ဟ် တံဂှ်လေဝ် ဒဒှ်ရဆုဲပြံၚ်လဝ်ဂှ် ညးတာလျိုၚ်ဂမၠိုၚ် ထပ်ဟီုဂးလဝ်ရ။

ပ္ဍဲပါကေဿတာန်ဂှ် နူကဵုဂိတုဂျောန် (၂၅) တေံ ဟိုတ်နူဗြဲရိုပ်ဂူ ဗွဲမသ္ကာတ်မြဟ်ဂှ်တုဲ မၞိဟ်ဟွံအောန် နူကဵု (၈၀) တၠ ချိုတ်အာလဝ်တုဲ (၁၈၂) တၠ ကလိဂွံလဝ်ဝပ်ရ။ သ္ကိုပ်ဝန်ဇၞော် ပါကေဿတာန်ဂှ် ပ္တိုန်လဝ်စရာဲ ကုညးဟံၚ်ပြာ်ကဵုလဝ် မၞိဟ်မသှ်ေၜက်ဒၟံၚ် ပ္ဍဲပါန်ဂျာပ်တံဂှ်ရ။

ပါကေဿတာန် သြန်မကြေပ်ဂြတ်ဒၟံၚ်ဂှ်ဝွံ ဟိုတ်နူပရေၚ်ဍာ်ဇၞော်တုဲကၠုၚ်တေံတုဲ အပံၚ်မၞိဟ် (၁၇၃၅) တၠ ချိုတ်အာလဝ်တုဲ သွက်ဂွံကလေၚ်ဂွံ ၚုဟ်မးဆောံလေၚ်လီုလာ် (၃၀) ဗဳလျာန်ဒဝ်ဠာဂှ် ဒးရုန်ဂ္စါန်ဒၟံၚ်ဖိုဟ်ဏောၚ် မဒှ်ရ။

Ref: Washingtontimes