ပ္ဍဲပံၚ် သီဂွံလဝ် လွဟ်လက်နက် ပၞာန်ညးဍုၚ်ကွာန် ဒုၚ်ဩဇာဒပ်ပၞာန်

ပံၚ် – ဂျူလာၚ်(၁၂)

တွဵုရးဍုၚ်မန်၊ ပွိုၚ်ဍုၚ်ပံၚ် သီဂွံလဝ် နူကဵုပၞာန်ညးဍုၚ်ကွာန် ဒုၚ်ဩဇာသၟဝ်တဲကံၚ်ဇြဳပၞာန် မၞုံပ္ဍဲကြုၚ် မျလေဝ်(မြလေးချောင်) သတာန်ဂါန် သီုလွဟ် (၆)ဒကိုအ် ဖျေဲကမ် (၈)မ မ္ၚးနူဂှ် မကမ် (၁၀၀)မရဂှ် ကရောၚ်ပၞာန်တပေန်ယှိုဲထဳ လလောၚ်တြးလဝ် ပရိုၚ်ရ။

ပ္ဍဲဂိတုဂျူလာၚ် စၟတ်တ္ၚဲ (၉)တုဲကၠုၚ် အခိၚ်ဇိုၚ်သဝ်တ္ၚဲတေံဂှ် အခိၚ်သ္ဂံၚ် UG နူတံဒပ် KNLA/PDF ပံၚ်ကောံ ခရိုၚ်သဓီု စၟတ်(၂) အခိၚ်လုပ်စၟဳစၟတ်သ္ၚိဒၟံၚ် က္ဍိုပ်သ္ကိုပ်ပၞာန်ညးဍုၚ်ကွာန် ယှိုဲမျအတိုၚ် ဂွံလဝ်ပရိုၚ်ဂှ် သီဂွံလဝ် လွဟ်ရိုၚ်ဖေဝ် (၃)ဒကိုအ်၊ သတာန်ဂါန် BA52 (၁)ဒကိုအ်၊ ဖျေဲကမ် (၆)မ ကေုာံ ကပေါတ်ဆက်စပ်တအ်ရ။

သ္အာၚ်နူဂှ်ပၠန် အတိုၚ်ထပ်စၟဳစၟတ်ဂွံလဝ်ဂှ် ထပ်သီဂွံ လွဟ်ရိုၚ်ဖေဝ် နူကဵုသ္ၚိဒၟံၚ် ညးလုပ်ဂကောံပၞာန် ညးဍုၚ်ကွာန်(၂)တၠ လွဟ်မွဲမွဲဒကိုအ် ဖျေဲကမ် (၂)မရဂှ် ဂွံတီကေတ်ရ။

ပၞာန်ညးဍုၚ်ကွာန် ဒုၚ်ဩဇာဒပ်ပၞာန်တအ် ၜိုန်ရဒးဒုၚ်သီကေတ်လွဟ်လက်နက်ကီုလေဝ် ဟိုတ်နူဟွံကလေၚ်ပန်ပှော်တုဲ ဖျေံလဝ်လွဟ်ဂှ်ရ ဟွံသ္ပအန္တရာယ်လမျီု ဟွံကေတ်အရေဝ် မမိက်ကဵုမွဲသာ် ကဵုလဝ်သတိတုဲ သ္ဂံၚ် UG တအ် ကလေၚ်ဆုတ်တိတ်ကၠုၚ် သီုဟၟဲကဵုဘဲဗွဲမဂီုကၠီုရဂှ် ဂွံတီကေတ်ရ။

ပရိုၚ်-သြၚ်လောန်တိုၚ်(မ်)

ဗီုရုပ် – ကရောၚ်ပၞာန်တပေန်ယှိုဲထဳ