ပ္ဍဲရးတၞၚ်သဳ အပ္ဍဲပွိုၚ်မွဲဂိတု ကောန်အရာပ် ၂၃ တၠ ဒးဒုၚ်ဂစိုတ်တုဲ ၁၇၀ တၠ ဒးဒုၚ်ရပ်ဒက်

တၞၚ်သဳ၊ ဂျူလာၚ် (၁၁)

ပ္ဍဲကဵုပွိုၚ်ဍုၚ်ရးဒေသဇၞော်တၞၚ်သဳတံဂှ် အပ္ဍဲဂိတုဂျောန်မွဲဂိတုတုဲကၠုၚ်တေံ ညးဍုၚ်ကွာန်ကောန်အရာပ် ၂၃ တၠ ဒးဒုၚ်ဂစိုတ်ဂယိုၚ်လဝ်တုဲ ညးဒေသ ၁၇၀ တၠပြၚ် ဒးဒုၚ်ရပ်ဒက်လဝ်ရောၚ် ဂွံတီကေတ် အတိုၚ်တၚ်လလောၚ်တြး ဂကောံသုတေသန FE5 Tanintharyi ရ။

ပ္ဍဲကဵုညးချိုတ်အာဂမၠိုၚ် ဟိုတ်နူလ္ပာ်ကံၚ်ဇြဳပၞာန် ပန်ဂစိုတ်တုဲ ၁၀ တၠ ချိုတ်အာတုဲ နူကဵုလ္ပာ်ဂကောံဒပ်စဵုဒၞါညးဍုၚ်ကွာန် PDF တံ ပသောၚ်လဝ် နကဵုဟိုတ် ဒှ်ရဲကဵုပရိုၚ်ဂှ် (၆) တၠ ကေုာံ တၠတဲဟွံမံက်တုဲ မၞိဟ်ဒးဒုၚ်ဂစိုတ်လဝ်ဂှ် (၇) တၠ နွံဒၟံၚ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ပ္ဍဲကဵုဂိတုဏံဂှ် လ္ပာ်ကံၚ်ဇြဳပၞာန်တံ ရပ်ဒက်လဝ် ညးဍုၚ်ကွာန်ကောန်အရာပ် (၁၇၀) ဟွံအောန်တုဲ (၁၀၀) ပြၚ်ဂှ် ၜိုန်ရကလေၚ်ဗလးကဵုလဝ်ကီုလေဝ် ညးဍုၚ်ကွာန်ကောန်အရာပ်သှ်ေတံဂှ် ဆက်ဒးဒုၚ်ရပ်ဒက်စၟဳတ်ဒၟံၚ်တုဲ ပံက်လဝ်ဂဗုတ် ကေတ်လဝ်ဒုဟ် နကဵုၝောံပိုဒ်ဒုဟ်ဒဏ်ဇၞော်ဇၞော်တံရောၚ်ဂှ် သ္ဂးရ။

ကောန်အရာပ်ချိုတ်အာဂှ်မ္ဂး ပ္ဍဲကဵုပွိုၚ်ဍုၚ်ပဠဝ်ဂှ် ၈ တၠ၊ ပ္ဍဲကဵုပွိုၚ်ဍုၚ်ကအ်သံၚ်၊ ပွိုၚ်ဍုၚ်လံၚ်လုၚ် ကေုာံ ပွိုၚ်ဍုၚ်တယိတ်ချံၚ်ဂှ် (၃) တၠ စၟအ်အ်၊ ပ္ဍဲကဵုပွိုၚ်ဍုၚ်ဗိက်ကဵု ပွိုၚ်ဍုၚ်တၞၚ်သဳတံဂှ် ၂ တၠစၟအ်အ် ကေုာံ ပ္ဍဲပွိုၚ်ဍုၚ်သှ်ေတံဂှ် ၁ တၠစၟအ်အ် ပါလုပ်ရ။

ကောန်အရာပ်ချိုတ်အာဂှ်ဝွံ ယဝ်ရၜတ်ကၞာတ်ကဵု ဂိတုမေတုဲကၠုၚ်မ္ဂး ဂၠိုၚ်တိုန်ကၠုၚ် ၂ တၠတုဲ ပ္ဍဲဂိတုမဂှ်ေ ကောန်အရာပ် ၂၁ တၠ ဒးဒုၚ်ဂစိုတ်လဝ်ရ။

ပ္ဍဲရးတၞၚ်သဳဂှ် အပ္ဍဲဂိတုတုဲကၠုၚ်တေံ ပေါဲဗ္တိုက်ၜါလ္ပာ်အပံၚ် ၄၁ ဝါ က္တဵုဒှ်လဝ်တုဲ ပေါဲဗ္တိုက်ဗွဲမဂၠိုၚ်ဝွံ နူကဵုလ္ပာ်ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ အာစိုပ်ဗ္တိုက် တမ်ဒပ်ကံၚ်ဇြဳပၞာန်၊ ဗ္ဒိုပ်ဒပ်တံတုဲ က္တဵုဒှ်လဝ်ရ။

ဟိုတ်နူပေါဲဗ္တိုက်ဂမၠိုၚ်တုဲ လၟိဟ်ညးပါဲဒဴဘဲပၞာန် မဒးဂြိပ်ဒဴပါဲဒလေတ်ဒၟံၚ် ပ္ဍဲရးတၞၚ်သဳတံဂှ် နွံကၠုၚ် စဵုကဵု (၃၅၀၀၀) ပြၚ်ယျဂှ် ဂွံတီကေတ် အတိုၚ်တၚ်လလောၚ်တြး FE5 Tanintharyi ရ။

ပရိုၚ်−သြၚ်လောန်တိုၚ်(မ်)

ဗီု−The Tanintharyi Times