သေတ်တွေ -ဂျူလာၚ်(၂)
ကၠာဟွံစိုပ် လၟေၚ်တရဴတွဵုရးရခေၚ် က္ဍိုပ်သ္ကိုပ်ပၞာန်သီအဝဵု ဂအုပ်သ္ကိုပ်ဗိုလ်ဇၞော် မေန်အံၚ်လှာၚ် ၜိုတ် (၃)တ္ၚဲတေံဏီဂှ် ဟိုတ်နူပတေၚ်ဂြတ်လဝ် ပရေၚ်ဂီုကၠီု ပ္ဍဲဍုၚ်သေတ်တွေ အရာဟၟဲပၟိက်တအ်တုဲ ညးဍုၚ်ကွာန်တအ် ဒးလကိုတ်တ္ၚဵုဒၟံၚ်ရဂှ် ညးဒေသတအ်ဟီုသ္ဂးလဝ်ရ။
တ္ၚဲဏံ ဂိတုဂျူလာၚ် စၟတ်တ္ၚဲ (၁၀) အခိၚ်နူဂယး ၜိုတ် (၈)နာဍဳဂှ် စိုပ်ကၠုၚ်ဍုၚ်သေတ်တွေ တွဵုရးရခေၚ်တုဲဂှ် ဂေတ်ဗဵုရံၚ် ဒၞာဲဒးလီုလာ်ဆောံလေၚ်လဝ် ဟိုတ်နူလဗိုတ်ကျာမိုဝ်ခါ မွဲဒမြိပ်ပ္ၚံက်ယှူခေန်တာ ဍုၚ်သေတ်တွေတုဲ ဆက်တိတ်အာ ဒၞာဲ ဒ.စ.က ဖျေံစွံလဝ်ရုၚ်ရဂှ် ဂွံတီကေတ်ရ။
“ဍေံပါမံၚ်ဂှ်တှ်ေ ချိုတ်ပၠိုတ်ရ။ မၞိဟ်သှ်ေနူဂှ် ညးဂှ်ပါရော ဟွံတီကေတ်ချိုတ်တ်ပၠိုတ်ပၠိုတ်ဏီပုဟ်။ ပိုဲလေဝ် ဍေံကၠုၚ်ဏောၚ်တှ်ေ အရာနွံပၟိက်ကီု ဟၟဲပၟိက်ကီု ဒးကၠောန်ကဵုဒၟံၚ်ဖအိုတ်ရ” ဂှ် ညးယိုက်ဝန်အလဵုအသဳ ဟွံမိက်ဓမံက်ယၟု မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ က္ဍိုပ်သ္ကိုပ်ပၞာန် ကၠုၚ်စိုပ်တွဵုရးရခေၚ် သီုအလန်ဏံမ္ဂး ဒှ်ဂွံ လၟိဟ် (၄)ဝါ ရဂှ် ဂွံတီကေတ်ရ။
ညးဍုၚ်ကွာန် ဒးဒုၚ်လဝ်ဘဲဒဏ်လဗိုတ်ကျာသ္ကာတ်မြဟ်တအ်ဂှ် က္ဍိုပ်သ္ကိုပ်ပၞာန် ကၠုၚ်စိုပ်ဗီုလၟုဟ်ဏံ ဒှ်ဒၟံၚ်ဗီုပြၚ် ကၠုၚ်ဂြာတ်ကြုဲလ္ၚဴရဂှ် ဟီုသ္ဂးလဝ်ရ။
“ဍေံ တတ်အာဂတမုက်သ္ၚိဇကုသိုၚ်လဝ်တုဲ ညံၚ်ဍေံတအ်ကဵုလဝ် ညံၚ်ညံၚ် မုညံၚ်ညံၚ် မိက်ဂွံကၠုၚ်ကြုဲလ္ၚဴတုဲ ကၠုၚ်ဒှ်ဂွံရ။ ဒဵုကဵုလၟုဟ် ကံၚ်ဇြဳပၞာန်ကဵုလဝ်ဟီုတှ်ေ သ္ၚုၜါတၠတ်၊ ဖၞံစိန်မာမဳ ၜါဓုပ်ကဵု ခၟာဲစာၚ်မွဲမရ ကေၚ်ဂွံလဝ်နွံ”ဂှ် ညးဒေသရခေၚ် ဟွံမိက်ဓမံက်ယၟုမွဲတၠ ဟီုသ္ဂးလဝ်ရ။
က္ဍိုပ်သ္ကိုပ်ပၞာန်ဂှ် တ္ၚဲဏံ အခိၚ်ဇိုၚ်သဝ်တ္ၚဲ ကၠုၚ်စိုပ်ဗဵုကျောဝ်ရံၚ်လဝ် ဗလးဝေၚ်ဇြဟတ်ဝေသာလဳဖကီု တ္ၚဲယးဂတတေံမ္ဂး သွက်ဂွံကၠောန်သ္ပ ပေါဲဆဵုဂဗ ပ္ဍဲလွဳမာန်သာသနာ ပ္ဍဲကျာ်စေတဳလောကာနန္ဒာ ဍုၚ်သေတ်တွေ နွံဒၟံၚ်ရဂှ် ဌာန်ပရိုၚ်သြၚ်လောန်တိုၚ်(မ်) ဂၠိုက်ဂၠာဲ ဂွံတီကေတ်လဝ်ရ။
ပရိုၚ်/ဗီုရုပ် – သြၚ်လောန်တိုၚ်(မ်)
sanlontai