ကဝ်ဒူလေဝ်၊ ဂျူလာၚ်(၁၂)
ပ္ဍဲတိဍာ်အုပ်ဓုပ် ကဝ်ဒူလေဝ် ဗော်သွးကောန်ဂကူကရေၚ် KNU ဂှ် ပ္ဍဲပွိုၚ် ၆ ဂိတုသၞာံဏံ အကြာဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကောန်ဂကူကရေၚ် (K.N.L.A)၊ ဒပ်ပၞာန်စဵုဒၞာကောန်ဂကူကရေၚ် (K.N.D.O) ဒပ်ပံၚ်ကောံတအ် အပံၚ်လၟိဟ်ပေါဲဗတိုက် စဵုကဵု ၂၀၀၀ ဝါပြၚ် က္တဵုဒှ်လဝ်ရဂှ် ဗဟဵု KNU လလောၚ်တြးလဝ်ရ။
ပ္ဍဲတိဍာအုပ်ဓုပ်ကဝ်ဒူလေဝ်ဂှ် နူဂိတုဂျာန္နဝါရဳ စၟတ်တ္ၚဲ (၁) သၞာံဏံ စဵုကဵုဂိတုဂျောန် စၟတ်တ္ၚဲ (၃၀) ပ္ဍဲပွိုၚ် (၆) ဂိတုဏံ အကြာဒပ်ပံၚ်ကောံကဵု ဒပ်ကံၚ်ဇြဳပၞာန်တအ် လၟိဟ်ပေါဲဗတိုက်ဇၞော်ဍောတ် အပံၚ်လၟိဟ် (၂၄၉၅) ဝါ က္တဵုဒှ်လဝ်ရဂှ် ဓမံက်လဝ် ပ္ဍဲတၚ်လလောၚ်တြးရ။
ပ္ဍဲကဵုပေါဲဗတိုက်တအ်ဂှ် လ္ပာ်ကံၚ်ဇြဳပၞာန် ပါလုပ် သီုသ္ကိုပ်တံဒပ် (၅)တၠ၊ ဒုသ္ကိုပ်တံဒပ် (၅)တၠ၊ ဗိုလ်ဇၞော် (၉)တၠ၊ ဗိုလ် (၄)တၠ၊ အရန်ဗိုလ် (၅)တၠ အပံၚ်လၟိဟ်(၂၆၃၂)တၠ ဒးချိုတ်လဝ်တုဲ သီုဒုသ္ကိုပ်တံဒပ်(၁)တၠ အပံၚ်လၟိဟ် ၁၆၈၅ တၠ ဇီုကပိုက်ဂွံလဝ်ဘဲဝပ်ရဂှ် ဓမံက်လဝ် ပ္ဍဲတၚ်လောၚ်တြးရ။
ပ္ဍဲပေါဲဗတိုက် ပွိုၚ်(၆)ဂိတုဂှ် လ္ပာ် KNLA,KNDO ဒပ်ပံၚ်ကောံတအ် ဒးပြဟ်လလုဲလဝ် (၇၆)တၠ ဇီုကပိုက်ဂွံလဝ်ဘဲဝပ် (၂၅၇)တၠတုဲ ကွဳစက်ဒပ်ကံၚ်ဇြဳပၞာန် သုၚ်စောဲဒၟံၚ် ပ္ဍဲပရေၚ်ချဳဒရာၚ်ပၞာန် (၉၉)ဖ္ဍိုက် ဒးလီုလာ်လဝ်ရဂှ် သ္ဂးလဝ်ရ။
ညးမၞုံအခေါၚ်ဟီုဂး KNU ပဒိုဝ်သဝ်ကလေဝ်ဇြေဂှ်မ္ဂး ပ္ဍဲပေါဲဗတိုက် ပွိုၚ် (၆) ဂိတုဏံ ဟိုတ်နူပရေၚ်ချဳဒရာၚ်ပၞာန်ပံၚ်တောဲတုဲ ပ္ဍဲအရာဗတိုက်ကဵုဒပ်ပၞာန်သၞဒ္တန်ဂှ် လဂွံကဵုပရေၚ်ပၞာန် ဂွံလဝ်ပၞောန်လ္တူရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲတိဍာ်ထိၚ်ဒဝ်ကဝ်ဒူလေဝ်ဂှ် မ္ၚးနူပေါဲဗတိုက်တုဲ ဟိုတ်နူဒပ်ကံၚ်ဇြဳပၞာန် ကလိလောန်ဒၟံၚ် ဒုဟ်ရာဇဝတ်ပၞာန် ကေုာံပရေၚ်ဖံက်ပ္ကဝ် အခေါၚ်အရာမၞိဟ် ဗီုပြၚ်နာနာဂှ်ရ လၟိဟ်ညးပါဲဘဲပၞာန် နွံကၠုၚ် စဵုကဵုဗ္ဒာဲ (၆) ကိုတ်တုဲ သွက်ညးပါဲဒဴဘဲပၞာန်တအ်ဂှ် ဒးဆေၚ်ဒၟံၚ်မုက်ကဵု အခက်ခုဲဗွဲမဂၠိုၚ်ရဂှ် ဓမံက်ထ္ၜးလဝ်ရ။
ဟိုတ်နူဒှ်ဒၟံၚ်ရာသဳကသီုတုဲ ညးဍုၚ်ကွာန်ပါဲဘဲပၞာန်တအ် ဒးဆဵုဂဗဒၟံၚ်ကဵုအကာဲအရာကၟဳဗ္ဒၚ် ဇွောံမစၞစ ဟွံရုမ်ဂပ်တုဲ နွံဒၟံၚ်ပၟိက်ကဵု အရီုဗၚ်ဗ္စာရဏာပရေၚ်မၞိဟ်ရဂှ် KNU လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – KNU
sanlontai