သေတ်ဒိုဲ၊ ဂျူလာၚ်(၁၂)
နကဵုဒပ်ပၞာန်သီအဝဵု ပံက်လဝ်မုက်ပၞာန် ကြပ်အလုံဍုၚ်မွဲဂှ် ညံၚ်ပရေၚ်ကောံကဠောံပ္ဍဲဒပ် ဟွံဂွံသရိုဟ်လီုဂှ် သွက်ဂွံစွံကဵုသတိဗွဲတၟေၚ်အိုတ်ညိဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှုာၚ်ဂှ် ထပ်ဟီုဗ္ကန်လဝ် ပ္ဍဲလၟေၚ်တရဴရခေၚ်ညးရဂှ် လလောၚ်တြးလဝ် ပ္ဍဲလိက်ပရိုၚ်တြးဝါဒတံရ။
ဂိတုဂျူလာၚ် စၟတ်တ္ၚဲ ၁၀ ပ္ဍဲလၟေၚ်တရဴညးအာစိုပ်လဝ် တွဵုရးရခေၚ်ဂှ် အဃောဆဵုဂဗကဵု သၞာဲဒဴရးဒပ် ယတေအ်ဒံၚ်(ရသေ့တောၚ်)ကဵု ဗူတဳဒံၚ်တံ၊ သီုကောန်သ္ဂံၚ်၊ သီုဂကောံသ္ၚိကၟိန်ကောန်ဒပ်တံဂှ် က္ဍိုပ်သ္ကိုပ်ပၞာန် သွက်ဂွံကောံကဠောံပ္ဍဲဒပ်တံဂှ် သ္ဒးထပ်ကဵုလဝ်သတိပၠန် မဒှ်ရ။
က္ဍိုပ်သ္ကိုပ်ပၞာန်ဂှ် နကဵုကောန်သ္ဂံၚ် မၞုံရခေၚ်တံဂှ် သွက်ဂွံဒတုဲဖဵုရေၚ်သ္ကအ် ဗွဲမဍုက်ကေဝ်ဆာန်ကၟိန် ကုညးဒေသတံဂှ် နွံပၟိက်တုဲ အပ္ဍဲဒပ်မ္ၚးဒပ် ညံၚ်ပရေၚ်ကောံကဠောံသ္ဂောံနွံ သွက်ဂွံဂ္စာန်ရေၚ် တၠုၚ်ကဵုအိုတ်ဂှ် နွံပၟိက်ရောင် ဟီုဂးလဝ်ရ။
သ္အာၚ်နူဂှ်ပၠန် နကဵုကောန်ဂကောံဒပ်တံဂှ်လေဝ် တၞဟ်နသ္ဂောံစဵုဒၞါကၟိန်ဍုၚ်ဂှ် သွက်ဂွံပ္ကတ်ပကေၚ် လဝ်ကွတ်ပၞာန်တံ ဗွဲမစိုန်သကီုကဵု သွက်ဂွံထိၚ်ဒဝ်မၚ်မွဲ ပရေၚ်စသုၚ်ဗ္ၜူဓလူတံအိုတ်ဂှ် ဟီုဗ္ကန်လဝ်ရ။
လၟေၚ်တရဴက္ဍိုပ်သ္ကိုပ်ပၞာန်ဏံဂှ် ကြဴနူလဗိုတ်ကျာမိုဝ်ခါလပိုက်တုဲ ဒှ်လၟေၚ်တရဴ ကၠုၚ်စိုပ်တွဵုရးရ ခေၚ်အလန်ဒုတိယတုဲ ပ္ဍဲလၟေၚ်တရဴဏံဂှ်တှ်ေ ဆက်ရေၚ်တၠုၚ်အာကဵု ကမၠောန်သ္ဂောံကလေၚ် ယိုပ်ယာကၠုၚ်တံဏောၚ်ဂှ် ကဵုလဝ်ကတိ မဒှ်ရ။
က္ဍိုပ်သ္ကိုပ်ပၞာန်တံဂှ် ပ္ဍဲလၟေၚ်တရဴ ရးကေုာံတွဵုရး ညးတံဂှ် ဇၟာပ်ဆဵုဂဗကုသၞာဲဒဴ၊ ကောန်သ္ဂံၚ်တံမပါလုပ် ဂကောံသ္ၚိကၟိန်ကောန်ဒပ်တံဂှ် အပ္ဍဲဒပ် သွက်ဂွံကောံကဠောံအိုတ်ညိဂှ် ဒးဟီုဗ္ကန်မံၚ်လၟိုန်ရ။
တုဲကၠုၚ် ဂိတုဨဗြဴစၟတ်တ္ၚဲ ၇ ဂှ်လေဝ် ပ္ဍဲလၟေၚ်တရဴ ဒုက္ဍိုပ်သ္ကိုပ်ပၞာန် ဒုသ္ကိုပ်ပၞာန်ဇၞော် သဵုဝေန် ကၠုၚ်စိုပ် လဝ်တွဵုရးသေံဂှ်လေဝ် ပ္ဍဲဒပ် ညံၚ်ပရေၚ်ညဳသၟဟ်ကောံကဠောံ ဂွံသရိုဟ်လီုအာ၊ ညံၚ်ဇြဟတ်ဒပ်ဂွံဍိုန် လျအာဂှ် ဂကောံပ္ဍဲဍုၚ်မ္ၚးဍုၚ်တံကဵု မဳဒဳယာတံ ဂ္စာန်မံၚ်အိုတ်ရောၚ်ဂှ် စောတ်စောဲလဝ်ရ။
ပရိုၚ်- သြၚ်လောန်တိုၚ်မ်
ဗီု-MOI
sanlontai