ပ္ဍဲဂၠံၚ်ကွဳစက်လဂုၚ်-မတ်မလီု ညးတြုံမွဲတၠ လိုန်ဒးမာၚ်တိုပ်တိတုဲ ဒးဂွိၚ်ဒၟံၚ်ကဵုအန္တရာယ်လမျီု

သဓီု၊ ဂျူလာၚ်(၁၂)

တွဵုရးဍုၚ်မန်၊ ပွိုၚ်ဍုၚ်သဓီု၊ ကွာန်မျေနဳကုမ်၊ ပ္ဍဲသ္ကဲဂၠံၚ်ကွဳစက် လဂုၚ်-မတ်မလီု ဗ္ဒာဲဘာလကျာ်ဂှ် ဂိတုဂျူလာၚ်စၟတ်တ္ၚဲ (၁၁) အခိၚ်နူဂယးဂှ် ဟိုတ်နူလိုန်ဒးမာၚ်တိုပ်တိတုဲ သၟာကွဳလိုန်ဓာတ်သၠာပိမွဲတၠ ဂွံဘဲဝပ်သ္ကာတ်မြဟ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ပ္ဍဲတ္ၚဲဂှ် အခိၚ်နူဂယးၜိုတ် (၇)နာဍဳ သၟာကွဳလိုန်ဓာတ်သၠာပိ နူကွာန်နံၚ်ကုလာ ပွိုၚ်ဍုၚ်သဓီု ဒဳကၠုၚ်လ္ပာ်ဍုၚ်သဓီု အခိၚ်စိုပ်ကၠုၚ် ပ္ဍဲကွာန်မျေနဳကုမ် ဃောဒိုဟ်ဒၟံၚ် သ္ကဲဂၠံၚ်ကွဳစက်မွဲချိုန်ခနဂှ် လိုန်ဒးလဝ်မာၚ်ရ။

ဟိုတ်နူမာၚ်တိုပ်တိပါ်ခတိုဟ်တုဲ ဥူအောၚ်မျေအ်ကျဳ အာယုက် (၄၅)သၞာံ ဂွံလဝ်ဘဲဝပ် ကဝေက်မာၚ်ဖံက်လုပ်ဂွံလဝ် ပ္ဍဲဗုၚ်၊ ပ္ဍဲသြိုဟ် ကေုာံ ပ္ဍဲဇိုၚ်တအ်တုဲ ဒးဒှ်ဒၟံၚ်ဓဝိၚ်ကဵု အန္တရာယ်လမျီုရဂှ် ဂွံတီကေတ်ရ။

ဥူအောၚ်မျေအ်ကျဳ လိုန်ဒးလဝ်မာၚ်ဂှ် နူရုၚ်ဂဥုဲညးဍုၚ်ကွာန်ခရိုၚ်သဓီု သၠောဲပြံၚ် ပလံၚ်ဗစိုပ်လဝ် ရုၚ်ဂဥုဲဇၞော်လဂုၚ်ရဂှ် ညးတာလျိုၚ် ဂကောံရီုဗၚ်ပရေၚ်မၞိဟ်မွဲတၠ ဟီုသ္ဂးလဝ်ရ။

ပ္ဍဲဂၠံၚ်ကွဳစက် လဂုၚ်-မတ်မလီု ညးတြုံကောန်ဒေသ လိုန်ဒးလဝ်မာၚ်ဂှ် မ္ၚးနူဒပ်ကံၚ်ဇြဳပၞာန်တုဲ ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ်လေဝ် ချဳဒရာၚ်ဒၟံၚ်ပရေၚ်ပၞာန်ရ။

ပ္ဍဲအကံက်တေဝ်လဳဂရာမ် ဠဝ်ဗဳဒပ်ပၞာန်တအ်ဂှ် မာၚ်တိုပ်တိ ဥူအောၚ်မျေအ်ကျဳ လိုန်ဒးလဝ်ဂှ် ဒှ်မာၚ် ဒပ်ပံၚ်ကောံ ဗော်သွးကောန်ဂကူကရေၚ် KNU ကဵု PDF တအ် ပါံစွံလဝ်ရဂှ် ပရေၚ်တြးဒၟံၚ်ဝါဒ နွံရ။

ပ္ဍဲဂၠံၚ်ကွဳဳစက် လဂုၚ်-မတ်မလီုဂှ် ပ္ဍဲမွဲကာလဒပ်ပၞာန်သီအဝဵုဏံ အကြာဒပ်ကံၚ်ဇြဳပၞာန် ကဵုဂကောံဇြဟတ်ပၠန်ဂတးတအ် ပေါဲဗတိုက်က္တဵုဒှ်ဒၟံၚ် ခြာဟွံလအ်ဟွံလအ်တုဲ ဟိုတ်နူမာၚ်ပါ်ခတိုဟ် ကေုာံ ဒးဒုၚ်ကြတ်ပန်ပှော်အကြာတုဲ ပရေၚ်ကောန်အရာပ်ညးဍုၚ်ကွာန် ဇီုကပိုက်ဒးချိုတ်ဒၟံၚ် နွံရ။

ပရိုၚ် – သြၚ်လောန်တိုၚ်(မ်)

ဗီုရုပ် – Social Media